18 Dec 2017, 12:31
ދުނިޔޭގެ މާލީ އިދާރާ ވޯލްޑް ބޭންކުން މިހާތަނަށް ރާއްޖެއަށް ދިން އެންމެ ބޮޑު އެހީއެއް ދީފައި ވަނީ މަސްވެރިކަމުގެ ދާއިރާ ކުރިއެރުވުމަށް ކަމަށާއި އެއިން ދޭހަކޮށްދެނީ މި ސަރުކާރުން މަސްވެރިކަން ކުރިއަރުވަން ކުރަމުންދާ މަސައްކަތް ކަމަށް ފިޝަރީޒް މިނިސްޓަރު ޑރ. މުހައްމަދު ޝައިނީ ވިދާޅުވެއްޖެ އެވެ.
ހއ. އިހަވަންދޫގައި ބޭއްވި 37 ވަނަ މަސްވެރިންގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ޝައިނީ ވިދާޅުވީ ވޭތުވެ ދިޔަ ހަތަރު އަހަރު މަސްވެރިކަމުގެ ދާއިރާއިން މަސައްކަތްތަކެއް ކުރެވިފައިވާކަން ދޭހަކޮށްދެނީ ވޯލްޑް ބޭންކުން ރާއްޖެ އަށް މިހާތަނަށް ވެދިން އެންމެ ބޮޑު އެހީ އެ ދާއިރާ ކުރިއެރުވުމަށް ވެދިނުން ކަމަށެވެ. އަދި މަސްވެރިކަމުގެ ދާއިރާއިން ކަމެއް ނުކުރެވޭ ނަމަ އެފަދަ އެހީތައް ނުލިބޭނެ ކަމަށް ޝައިނީ ވިދާޅުވި އެވެ.
"ވޯލްޑް ބޭންކުން މިހާތަނަށް ދިން އެންމެ ބޮޑު އެހީ ދީފައިވަނީ މިދާއިރާއަށް. އެއީ19 މިލިއަން ޑޮލަރު. ހަމަ ތިއްބަކާ ލިބޭ ލާރިއެއް ނޫން އެއީކީ،" ޑރ .ޝައިނީ ވިދާޅުވި އެވެ.
ޝައިނީ ވިދާޅުވީ އެ އެހީގެ ބޮޑު ބައި ހަރަދު ކުރާނީ ރާއްޖޭގައި "އެކުއަ ކަލްޗާ" ފުޅާ ކުރަން ކަމަށެވެ. އެގޮތުން މިހާރު ވެސް މަސްވެރިންގެ ފަރާތުން އެންވެރިކަން ދަށަށްދާ ކަމަށް ބުނެ ޝަކުވާތައް ލިބެމުންދާ ކަމަށާއި ސަރުކާރުގެ އެންމެ ބޮޑު އެއް އަމާޒަކީ އެންވެރިކަން ރަނގަޅު ކުރުމަށް ހަރުދަނާ "އެކުއާ ކަލްޗާ" ޕްރޮގްރާމެއް ކުރިއަށް ގެންދިޔުން ކަމަށެވެ.
ޝައިނީ ވިދާޅުވީ މި ސަރުކާރުން ވެރިކަމާ ހަވާލުވި ދުވަސްކޮޅަކީ ޔޫރަގެ އިގްތިސާދު ވަރަށް ބޮޑަށް ދަށަށް ގޮސްފައިވާ ދުވަސްކޮޅެއް ކަމަށެވެ. އަދި އެކަމުގެ ސަބަބުން ކޮންމެވެސް ވަރަކަށް މަސްވެރިން އެކްސްޕޯޓް ކުރާ މަހަށް ލިބޭ އާމްދަނީ ދަށަށް ދިޔަ ނަމަވެސް އެކަން މަސްވެރިންނަށް އިހުސާސްވިޔަ ނުދީ ހިފަހައްޓާލެވުނީ ސަރުކާރުގެ ހަރުދަނާ ސިޔާސަތުތަކުގެ ސަބަބުން ކަމަށެވެ.
ޝައިނީ ވިދާޅުވީ ކުރިއަށް އޮތް ތަނުގައި ވެސް މަސްވެރިން ބަނާ މަހަށް އެކަށީގެންވާ އަގެއް ލިބޭނެ ގޮތް ސަރުކާރުން ހަދާނެ ކަމަށާއި އެގޮތުގެ މަތިން މިހާރު ވެސް މަސް ގަންނަ ކުންފުނިތަކާ ވާހަކަ ދައްކަމުންދާ ކަމަށެވެ. އަދި އަގުތައް އެއް ހަމައެއްގައި ބަހެއްޓޭނެ ކަމުގެ ޔަގީންކަން ކުންފުނިތަކުން ދީފައިވާ ކަމަށް ޝައިނީ ވިދާޅުވި އެވެ.
އޭނާ ވިދާޅުވީ މަސްވެރިކަމުގެ ދާއިރާއިން އިތުރު ކުރިއެރުންތައް ހޯދަން ބޭނުން ނަމަ ރައީސް އަބްދުﷲ ޔާމީނަށް އިތުރު ފުރުޞަތެއް ދޭން ޖެހޭ ކަމަށެވެ. އަދި އަންނަ އަހަރަކީ މަސްވެރިކަމުގެ ތެރެއިން އިތުރު ކަންކަން ހާސިލް ވެގެންދާނެ އަހަރެއް ކަމަށް ވެސް ޝައިނީ ވިދާޅުވި އެވެ.