12 Dec 2017, 17:01
އިންޑިއާގެ ކްރިކެޓް ޓީމް ކެޕްޓަން ވިރާތު ކޯލީއާއި ބޮލީވުޑް ބަތަލާ އަނުޝްކާ ޝަރްމާ، އިއްޔެ އިޓަލީގެ މިލާންގައި ކައިވެނިކޮށްފައިވާ އިރު މި މަހު 21ގައި އެ ދެ މީހުންގެ ކައިވެނި ހަފްލާ ބޭއްވުމަށް ހަމަޖައްސައިފިއެވެ.
އެ ދެތަރިން ވަނީ ދެ ކައިވެނި ހަފްލާއެއް ބޭއްވުމަށް ހަމަޖައްސައިފައެވެ. މި މަހު 21ގައި ފުރަތަމަ ހަފްލާ ހާއްސަކޮށްފައިވަނީ އެ ދެ މީހުންގެ އާއިލާ ތަކުގެ މެންބަރުންނަށެވެ.
އަދި ޑިސެމްބަރު 26ގައި މުމްބާއީގައި ބާއްވާ ކައިވެނި ހަފްލާ ހާއްސަކޮށްފައި ވަނީ އަނުޝްކާގެ ބޮލީވުޑް ރަހުމަތްތެރިންނާއި ވިރާޓްގެ ކްރިކެޓް ޓީމްގެ މެންބަރުންގެ އިތުރުން އެ ދެ މީހުންގެ އިތުރު ރަހުމަތްތެރިންނަށެވެ.
ދެމީހުން އާއިލާއާއެކު ކައިވެންޏަށް އިޓަލީއަށް ފުރާފައި ވަނީ ކައިވެނި ކުރުމަށް ކަމަށް ރިޕޯޓު ކުރި ނަމަވެސް އެންމެ ފަހު ވަގުތާ ޖެހެންދެން ވެސް ދެމީހުން ވަނީ ރިޕޯޓުތައް ދޮގުކޮށްފައެވެ.
ނަމަވެސް އެ ދެ މީހުން ކައިވެނީގެ ޚަބަރު ހިއްސާކޮށްފައި ވަނީ ވަރަށް އުފަލުންނެވެ. އަދި އެންމެންގެ ފަރާތުން ލިބޭ ލޯތްބާއި އެއްބާރުލުމަށް ދެމީހުން ވަނީ ޝުކުރު އަދާކޮށްފައެވެ.
ވިރާތާއި އަނުޝްކާ ކައިވެނި ކޮށްފައި މިވަނީ ލޯބީގެ ގޮތުން ގުޅިގެން އުޅޭތާ ގާތްގަނޑަކަށް ފަސް ވަރަކަށް އަހަރު ފަހުންނެވެ.