06 Dec 2017, 20:14
ރާއްޖޭގެ އެތެރޭގެ އުދުހުންތަކުގައި ބޭނުންކުރަން ގައުމީ އެއާލައިން، މޯލްޑިވިއަނުން 11 ވަނަ ސީޕްލޭން ރާއްޖެ ގެނެސްފިއެވެ.
އެއީ ސްވިޒަލޭންޑުން ރާއްޖެ ގެނައި ސީޕްލޭނެކެވެ.
އެ ސީޕްލޭން ރާއްޖެ ގެނައިވަގުތު ބޭއްވި ރަސްމިއްޔާތުގައި އައިލެންޑް އޭވިއޭޝަންގެ މެނޭޖިން ޑިރެކްޓަރު އަބްދުލް ހާރިސް ވިދާޅުވީ، މާލެއާ ދުރުގައި ރިސޯޓުތައް ހުޅުވަމުންދާ މި ދަނޑިވަޅުގައި މޯލްޑިވިއަންގެ ފްލީޓް ބޮޑުކުރަން އިތުރު ފްލައިޓްތައް ގެންނަން ޖެހޭކަމަށެވެ.
މިއަދު ހަވީރު ރާއްޖެ ގެނައި އައު ސީޕްލޭން ކައިރީގައި އައިލެންޑް އޭވިއޭޝަންގެ މެނޭޖިން ޑިރެކްޓަރު ހާރިސް ބޯޓުގެ ކެޕްޓަނާ ވާހަކަ ދައްކަވަނީ-- ސަން ފޮޓޯ/ ފަޔާޒު މޫސާ
"އަރި އަތޮޅު ހިސާބުގައި ރިސޯޓެއް ހަދަން ރަށެއް މިހާރުނެތް. އެހެންވީމަ އެއަށްވުރެ ތަންކޮޅެއް ދުރަށް މިހާރު ރިސޯޓުތައް މި ދަނީ. އެހެންވީމަ އަޅުގަނޑުމެންނަށް ޔަގީނުންވެސް އެބައެނގޭ ޓޫރިޒަމް ޑިވެލޮޕްމަންޓާ އެއްކޮށް އޭވިއޭޝަން އަކީ ހިންގަމުން ދާންޖެހޭ އެއްޗެއްކަން،" ހާރިސް ވިދާޅުވިއެވެ.
ހާރިސް ވިދާޅުވީ މޯލްޑިވިއަނުން ގެންނަ ކުދި ބޯޓުތަކަކީ ގަނެގެން ގެންނަ ބޯޓުތަކެއް ކަމަށާއި ބޯޓުތައް ކުއްޔަށް ނުގެންނަނީ ދިގު މުއްދަތުގައި ކުންފުންޏަށް އޭގެ ނޭދެވޭ އަސަރު ކުރާނެތީ ކަމަށެވެ.
މިއަދު ހަވީރު ރާއްޖެ ގެނައި އައު ސީޕްލޭން ކައިރީގައި އައިލެންޑް އޭވިއޭޝަންގެ މެނޭޖިން ޑިރެކްޓަރު ހާރިސް -- ސަން ފޮޓޯ/ ފަޔާޒު މޫސާ
މިއަދު ރާއްޖެ ގެނައި ސީ ޕްލޭންގެ އިތުރުން މި މަހުގެ މެދުތެރޭގައި އިތުރު ސީޕްލޭނެއް ގެންނަން ވަނީ ހަމަޖެހިފައެވެ. އެ ސީޕްލޭން ކެނެޑާ އިން ފުރާނީ އަންނަ ހުކުރު ދުވަހުއެވެ.
ހާރިސް ވިދާޅުވީ، ސީ ޕްލޭންގެ އިތުރުން އަންނަ ޖެނުއަރީ މަހުގެ 15 ވަނަ ދުވަހު ޑޭޝް އެއިޓް މަރުކާގެ އެއާކްރާފްޓެއް ގެނައުމުގެ މަސައްކަތް ވެސް ކުރަމުން އަންނަ ކަމަށެވެ.