06 Dec 2017, 09:11
ޔޫއެފާ ޗެމްޕިއަންސް ލީގުގައި ސީއެސްކޭއޭ މޮސްކޯ ބަލިކޮށް، މެންޗެސްޓާ ޔުނައިޓެޑުން ގަދަ 16ގެ ޖާގައެއް ހޯދައިފި އެވެ.
އަމިއްލަ ދަނޑުގައި ކުޅުނު 'ގްރޫޕް އޭ'ގެ މެޗުގައި ސީއެސްކޭއޭގެ މައްޗަށް ޔުނައިޓެޑުން ކުރި ހޯދާފައި ވަނީ 2-1 ލަނޑުގެ ހަނި ތަފާތަކުންނެވެ.
އެ މެޗުގެ ފުރަތަމަ ލަނޑު ޖަހައި ލީޑު ހޯދީ ސީއެސްކޭއޭ އިންނެވެ. މެޗުގެ ފުރަތަމަ ހާފުގެ އެންމެ ފަހު މިނެޓުގައި މާރިއޯ ފެނާންޑޭޒް ދިން ބޯޅައަކުން ސީއެސްކޭއޭއަށް އެ ލަނޑު ކާމިޔާބުކޮށްދިނީ ވިޓީނިއޯ އެވެ. މެޗުގެ ފުރަތަމަ ހާފު ނިމިގެންދިޔައީ 1-0 ލަނޑުން ސީއެސްކޭއޭ ކުރީގައި އޮވެގެންނެވެ.
ޔުނައިޓެޑަށް މެޗުގެ ނަތީޖާ ހަމަހަމަކުރެވުނީ 64 ވަނަ މިނެޓުގައެވެ. ޕައުލް ޕޮގްބާ ދިން ރީތި ބޯޅައަކުން ޔުނައިޓެޑަށް އެ ލަނޑު ކާމިޔާބުކޮށްދިނީ އެ ޓީމުގެ ބެލްޖިއަމް ފޯވަޑް ރޮމެލޫ ލުކާކޫ އެވެ. އޭނާ އެ ލަނޑު ކާމިޔާބުކުރީ ސީއެސްކޭއޭގެ ޕެނަލްޓީ އޭރިއާ ތެރެއިން ފޮނުވާލި ހަމަލާ އަކުންނެވެ.
ޔުނައިޓެޑަށް ލުކާކޫ ނަތީޖާ ހަމަހަމަކޮށްދިންތާ ދެ މިނެޓް ފަހުން، އެ ޓީމުން ވަނީ އިތުރު ލަނޑެއް ޖަހައި ލީޑު ހޯދައިފައެވެ. ހުއާން މަޓާ ދިން ބޯޅައަކުން ޔުނައިޓެޑަށް އެ ލަނޑު ކާމިޔާބުކޮށްދިނީ އެ ޓީމުގެ އިނގިރޭސި ފޯވަޑް މާކަސް ރަޝްފާޑެވެ.
އެ ގްރޫޕުގައި ކުޅުނު އަނެއް މެޗުގައި ބެންފީކާ ބަލިކޮށް، ބާސެލް އިން ވެސް ވަނީ ގަދަ 16ގެ ޖާގައެއް ކަށަވަރުކޮށްފައެވެ. ރަށުން ބޭރުގައި ކުޅުނު އެ މެޗުން ބާސެލް މޮޅުވީ 2-0 ލަނޑުގެ ނަތީޖާ އަކުންނެވެ. އެ މެޗުގައި ބާސެލްގެ ލަނޑުތައް ކާމިޔާބުކޮށްދިނީ މުހައްމަދު އެލްޔޫނޫސީ އާއި ޑިމިޓްރީ އޮބާލިން އެވެ.
'ގްރޫޕް އޭ'ގެ އެއް ވަނަ ހޯދި ޔުނައިޓެޑަށް 15 ޕޮއިންޓް ލިބުނު އިރު، ދެ ވަނައިގައި ނިންމާލި ބާސެލް އަށް ލިބިފައި ވަނީ 12 ޕޮއިންޓެވެ. ތިން ވަނައިގައި އޮތް ސީއެސްކޭއޭއަށް ނުވަ ޕޮއިންޓް ލިބިފައިވާ އިރު، ގްރޫޕްގެ ފުލުގައި ނިންމާލި ބެންފީކާއަށް ޕޮއިންޓެއް ލިބިފައެއް ނުވެ އެވެ.