05 Dec 2017, 16:35
ތ. ވިލުފުށީ ކައުންސިލްގެ ކުރީގެ ރައީސް ހުސައިން ޖަބީން ހަ މަސް ދުވަހަށް ގޭ ބަންދުކުރުމަށް ވިލުފުށީ ކޯޓުން ކުރި ހުކުމް ހައިކޯޓުން ބާތިލުކޮށްފި އެވެ.
ޖަބީން ހަމަސް ދުވަހަށް ގޭ ބަންދު ކުރުމަށް ހުކުމް ކުރީ މިއަހަރުގެ އޭޕްރީލް މަހުގެ ހަ ވަނަ ދުވަހު އެވެ. އޭނާ ގޭ ބަންދު ކުރަން ހުކުމް ކުރީ، ދައުލަތުން އޭނާގެ މައްޗަށް ކުރި އަމުރަށް ނުކިޔަމަންތެރިވުމުގެ ދައުވާ ސާބިތުވުމާ ގުޅިގެންނެވެ. އެ ހުކުމް ބާތިލުކޮށް މިއަދު ހައިކޯޓުން ކުރި ހުކުމުގައި، ގިނަ ނުކުތާތަކެއް ވަނީ ފާހަގަކޮށްފައެވެ.
ޖަބީންގެ މައްޗަށް ތުހުމަތު ކުރެވުނު މައްސަލަައިގެ ޝަރީއަތް ވިލުފުށީ ކޯޓުގައި ކުރިއަށް ގެންގޮސްފައިވަނީ ޝަރީއަތް ހިންގުމުގައި އަމަލުކުރަންޖެހޭ އިޖުރާތުތަކާ ޚިލާފަށް ކަމަށް ހައިކޯޓުގެ ހުކުމުގައި ވަނީ ފާހަގަކޮށްފައެވެ.
އެގޮތުން ދައުލަތުން ހުށަހެޅި ހެކީގެ ހެކިބަސް ދެފަހަރަށް ނަގާފައިވާ ކަމަށާއި، ފުރަތަމަ ދިން ހެކިބަހާ ޚިލާފަށް ދެވަނަ ފަހަރަށް އޭނާ ހެކިބަސްދީފައިވަނީ މުޅިން ތަފާތުކޮށް ކަމަށް ހައިކޯޓުގެ ހުކުމުގައި ފާހަގަކޮށްފައިވެ އެވެ. އަދި އެއް ހެކިވެރިއަކު ދެވަނަ ފަހަރަށް ޝަރީއަތަށް ހާޒިރުކޮށްފަިއވަނީ ކުރިން ދިން ހެކިބަހުގައި ނުހިމެނޭ އިތުރު ކަމެއް ސާފު ކުރަން ނޫންކަން އެނގެން އޮތުމުން، ހެކިބަސް ނެގުމުގައި ޝަރީއަތުން އަމަލުކޮށްފައިވަނީ ހެކިބަސް ނެގުމުގައި އަމަލުކުރާ އުސޫލާ ޚިލާފަށް ކަމަށް ހައިކޯޓުން ވަނީ ފާހަގަކޮށްފައެވެ.
އޭގެ އިތުރުން ދައުލަތުން ހުށަހެޅި ހެކިންގެ ހެކިބަސް ނަގައި ނިމުމުން ޖަބީންގެ ފަރާތުން ވާހަކަދެއްކުމުގެ ފުރުސަތު ދީފައި ނުވުމާއި، ޖަބީންގެ ފަރާތުން ދިފާއީ ހެކީގެ ގޮތުގައި ނަންތައް ޝަރީއަތަށް ހުށަހަޅާފައިވީ ނަމަވެސް އެކަމުގެ ފުރުސަތު ޝަރީއަތުން އެފުރުސަތު ޖަބީނަށް ދީފައި ނުވާކަމަށް ހައިކޯޓުން ފާހަގަކޮށްފައިވެއެވެ.
ހައިކޯޓުގެ ހުކުމުގައި، އެ މައްސަލައިގެ ޝަރީއަތް ވިލުފުށީ ކޯޓުގައި ކުރިއަށް ގެންދިޔަ އިރު، ބައެއް އަޑުއެހުންތަކަށް އާންމުންނަށް ވަދެވޭނެހެން ކުރިއަށް ގެންދިޔަ ނަމަވެސް ބައެއް އަޑުއެހުންތަކަށް ނުވަދެވޭނެހެން ކުރިއަށް ގެންގޮސްފައިވާކަން ފާހަގަކޮށްފައިވެ އެވެެ. އަދި ޖަބީންގެ މައްޗަށް ކޮށްފައިވާ ދައުވާ ސާބިތުވާ ކަމަށް ކަނޑައަޅާފައިވަނީ މިހާރު އަމަލުކުރަމުންދާ ގާނޫނުލް އުގޫބާތާއި، ގާނޫނު އަސާސީއަށް ރިއާޔަތްނުކޮށް ކަމަށް ހުކުމުގައި ފާހަގަ ކޮށްފައިވެއެވެ.
ހައިކޯޓުން އެ މައްސަލަ ބެލުމަށްފަހު މިއަދު ކުރި ހުކުމުގައި ބުނެފައިވަނީ، ވިލުފުށީ ކޯޓުން ޖަބީން ގޭބަންދުކުރަން ހުކުމްކޮށްފައިވަނީ، އަދުލުވެރި ޝަރީއަތެއްގައި ފުރިހަމަވާންޖެހޭ އިޖުރާއަތްތަކެއް ފުރިހަމަ ނުކޮށް ކަމަށެވެ.
އެހެން ކަމުން ހައިކޯޓުގައި އެ މައްސަލަ ބެއްލެވި ފަނޑިޔާރުންގެ އިއްތިފާގުން ވިލުފުށީ ކޯޓުގެ ހުކުމް ވަނީ ބާތިލުކޮށްފައެވެ.