ވިއްސާރައިގެ ސަބަބުން ހެނބަދު-މަނަދޫ މެޗު އަނެއްކާވެސް ފަސްކޮށްފި

01 Dec 2017, 14:31

ނ. އަތޮޅުގެ ރަށްތަކަށް އަމާޒުކޮށްގެން ބާއްވާ ސިޔާމް މައުރޫފް ސޮކާ ކަޕްގައި ހެނބަދުއާއި މަނަދޫ ބައްދަލުކުރާ މެޗު ވިއްސާރައިގެ ސަބަބުން އަނެއްކާވެސް ފަސްކޮށްފި އެވެ.

ނ. މާޅެންދޫގައި ކުރިއަށްދާ އެ މުބާރާތުގެ ގްރޫޕް ދޭއްގައި ހެނބަދުއާއި މަނަދޫ ބައްދަލުކުރާ މެޗު ކުޅުމަށް މިހާރު ތާވަލުކޮށްފައި ވަނީ މާދަމާ އެވެ.

މިހާރު ރާއްޖެއަށް ކުރަމުންދާ ވިއްސާރައާ ގުޅިގެން ހެނބަދުއާއި މަނަދޫ ބައްދަލުކުރާ މެޗު ފަސްކުރި މިއީ ދެ ވަނަ ފަހަރެވެ. ފުރަތަމަ އެ މެޗު ކުޅުމަށް އިއްޔެ ތާވަލު ކުރެވިފައިވީ ނަމަވެސް، މާޅެންދޫ ދަނޑުގައި ފެން ހެދިފައިވުމުގެ ސަބަބުން އެ މެޗު މިއަދަށް ފަސްކުރި އެވެ. މިއަދު ވެސް މާޅެންދުއަށް މޫސުން ގޯސްވުމުން، ސިޔާމް މައުރޫފް ސޮކާ ކަޕްގެ އިންތިޒާމު ކޮމިޓީން ވަނީ އެ މެޗު މާދަމާއަށް ފަސްކޮށްފަ އެވެ.

މިހާރު ކުރާ ވިއްސާރަ ހޮނިހިރު ދުވަހާ ހަމައަށް ދެމިއޮންނާނެ ކަމަށް ރާއްޖޭގެ މޫސުމާ ބެހޭ އިދާރާ އިން ލަފާކުރެ އެވެ.

ސިޔާމް މައުރޫފް ސޮކާ ކަޕަކީ ރާއްޖޭގައި ބާއްވާ އެންމެ އަގުބޮޑު ފުޓްބޯޅަ މުބާރާތެވެ. މިއަހަރުގެ މުބާރާތުގެ ޗެމްޕިއަން ޓީމަށް 500،000 ރުފިޔާގެ ފައިސާގެ އިނާމެއް ހުށަހަޅާފައިވާ އިރު، މުބާރާތުގެ ރަނަރަޕް ޓީމަށް 100،000 ރުފިޔާ، ފެއަރ ޕްލޭ ޓީމަށް 25،000 ރުފިޔާ އަދި ބެސްޓް ސަޕޯޓިން ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވެ އެވެ.

މިއަހަރުގެ މުބާރާތުގައި ނ. އަތޮޅުގެ 12 ރަށަކުން ވާދަކުރެ އެވެ. މުބާރާތުގައި ވާދަކުރާ ޓީމުތައް ތިން ގްރޫޕަކަށް ބަހާލާފައިވާ އިރު، ކުއާޓާ ފައިނަލުގެ ޖާގަތައް ލިބޭނީ ކޮންމެ ގްރޫޕެއްގެ އެއް ވަނަ އަދި ދެ ވަނަ ހޯދާ ޓީމުތަކާއި ތިން ވަނަ ހޯދާ ޓީމުތަކުގެ ތެރެއިން އެންމެ ރަނގަޅު ނަތީޖާ ހޯދާ ދެ ޓީމެވެ.

ގްރޫޕް އެކެއް:ލަންދޫ، ކެނދިކުޅުދޫ، މާފަރު، މިލަދޫ.
ގްރޫޕް ދޭއް:މަގޫދޫ، މަނަދޫ، ހެނބަދޫ، ކުޑަފަރީ.
ގްރޫޕް ތިނެއް:ވެލިދޫ، ޅޮހި، ހޮޅުދޫ، މާޅެންދޫ.

ސިޔާމް މައުރޫފް ކަޕަކީ ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަހްމަދު ސިޔާމް މުހައްމަދާއި ކެނދިކުޅުދޫ ދާއިރާގެ މެންބަރު އަލީ މައުރޫފްގެ އިސްނެންގެވުމާ އެކު ނ. އަތޮޅުގެ ހުރިހާ ރަށަކަށް ހުޅުވާލައިގެން ކުރިއަށްގެންދާ މުބާރާތެކެވެ.