29 Nov 2017, 15:07
އައިފޯން އެސްއީ ޕްރީ އޯޑާއަށް ދިރާގަށް ފައިސާ ދައްކާފައިވަނިކޮށް، އެއްބަސްވެފައިވާ ގޮތަށް އެ ފޯނު ނުވިއްކުމުން، ފައިސާ ދެއްކި ފަރާތަށް ލިބުނު ގެއްލުމުގެ ބަދަލުގެ ގޮތުގައި ބޮޑު އަދަދެއް ދެއްކުމަށް ދިރާގުގެ މައްޗަށް ކުރި ހުކުމް ސިވިލް ކޯޓުން ބާތިލުކޮށްފި އެވެ.
ސިވިލް ކޯޓުން މިދިޔަ އަހަރުގެ އޯގަސްޓު މަހު މ. ރިވެލި، މުހައްމަދު ޝަފާއު ހަސަން އަށް ބަދަލުގެ ގޮތުގައި 160،422 ރުފިޔާ ދެއްކުމަށް ވަނީ ހުކުމް ކޮށްފަ އެވެ.
އެ ހުކުމުގައި އައިފޯން އެސްއީ ޕްރޮމޯޝަނުގައި ޝަފާއު، ޕްރީ އޯޑާއަށް ދައްކާފައިވާ 5،828.94 ރުފިޔާ އާއި މުޖުތަމައުގައި އޭނާއަށް ލިބުނު ލަދުވެތިކަަމުގެ ބަދަލުގެ ގޮތުގައި އެއްލައްކަ ރުފިޔާއާއި އެެހެން ފޯނެއް ގަތުމަށް ހަރަދުކުރި 4593.90 ރުފިޔާގެ އިތުރުން ވަކީލުގެ ފީގެ ގޮތުގައި ހަރަދު ކުރި ބައިލައްކަ ރުފިޔާ ދެއްކުމަށް ދިރާގަށް ވަނީ އަމުރުކޮށްފަ އެވެ.
އެ މައްސަލަ ދިރާގުން ހައި ކޯޓުގައި އިސްތިއުނާފު ކުރުމުން މިއަދު ކުރި ހުުކުމުގައި ބުނެފައި ވަނީ، ދިރާގުގެ ޕްރޮމޯޝަނުގައި ބައިވެރިވެ، އައިފޯން އެސްއީގެ ޕްރީ އޯޑާއަށް ޝަފާއު ދައްކާފައިވާ 5،828.94 ރުފިޔާއަކީ ދިރާގުން ޝަފާއުއަށް އަނބުރާ ދޭން ޖެހޭ ފައިސާއެއް ކަމަށެވެ.
ނަމަވެސް ދެން ސިވިލް ކޯޓުގެ ހުކުމުގައި ފާހަގަ ކޮށްފައިވާ ފައިސާއަކީ ދިރާގުން އެމީހާއަށް ދައްކަން ޖެހޭ ފައިސާއެއް ނޫން ކަމަށް ހައިކޯޓުގެ ހުކުމުގައި ވަނީ ކަނޑައަޅައިފަ އެވެ.
ހައިކޯޓުގެ ހުކުމުގައި ފާހަގަ ކޮށްފައި ވަނީ، ޕްރީ އޯޑާއަށް ދައްކަން ޖެހޭ ފައިސާ ޝަފާއު ދައްކާފައިވީ ނަމަވެސް، ދިރާގުން ލަފާކޮށްފައިވާ ތާރީހަށް ޝަފާއު އާ ފޯނު ހަވާލު ކުރެވިފައި ނުވާތީ، އެ ހިސާބުން އެ މުއާމަލާތް ކުރިއަށް ގެންދިއުމަށް އޭނާ ބޭނުން ނުވިކަން އެނގޭ ކަމަށެވެ.
އޭގެ އިތުރުން ޕްރޮމޯޝަނުގައި ކަނޑައަޅާފައިވާ ޝަރުތުތަކާ އެއްގޮތަށް ދެފަރާތުން ފުރިހަމަ ކުރަން ޖެހޭ ޝަރުތުތައް ފުރިހަމަވެފައި ނުވުމުން ދެފަރާތުގެ ދެމެދުގައި ކޮންޓްރެކްޓަކާ ހަމައަށް ދެވިފައި ނުވާކަން ދެފަރާތުގެ ބަހުން ސާފުކޮށް އެނގެން އޮންނަ ކަމަށް ވެސް އެ ހުކުމުގައި ފާހަގަކޮށްފައިވެ އެވެ.