29 Nov 2017, 00:16
އިންޑިއާގެ ލައިފް އޯކޭ ޗެނަލް އިން ގެނެސް ދިން ކޮމެޑީ ޓީވީ ސީރީޒް "މޭ އައި ކަމް އިން މެޑަމް؟"ގައި ލީޑް ރޯލުން ފެނިގެންދާ އެއް ތަރި ނީހާ ޕެންސޭ ރާއްޖޭގައި ޗުއްޓީ ހޭދަ ކުރަމުން އެބަ ދެއެވެ.
މިއަހަރުގެ އޯގަސްޓް މަހުގެ ތެރޭގައި ނިންމާލި އެ ސީރީޒުގައި ސަންޖަނާގެ ނަމުގައި މެޑަމްގެ ރޯލުން ފެނިގެންދާ ނީހާ ރާއްޖެ އައިސްފައިވަނީ ސީދާ ކޮން ތާރީހެއްގައި ކަމެއް ނޭނގެ އެވެ. އަދި އޭނާ އައިސްފައިވަނީ ކޮން ބަޔަކާ އެކު ކަމެއް ވެސް ނޭނގެ އެވެ.
ނަމަވެސް ސޯޝަލް މީޑިއާ އާ ރައްޓެހި ނީހާގެ އިންސްޓަގުރަމް އެކައުންޓުގައި ރާއްޖޭގައި ހުރެ އޭނާ ނަގާފައިވާ ފޮޓޯއެއް އެންމެ ފުރަތަމަ ހިއްސާ ކޮށްފައިވަނީ މީގެ ހަ ދުވަސް ކުރިން ނެވެ.
ރިސޯޓެއްގެ ކޮޓަރިއެއްގެ ތެރޭގައި އިނދެ ނަގާފައިވާ އެ ފޮޓޯގައި ޓެގް ކޮށްފައިވާ ގޮތުން، އޭނާ ޗުއްޓީ ހޭދަ ކުރަމުން ދަނީ ހއ. އަތޮޅުގައި އޮންނަ ފަސް ތަރީގެ ރިސޯޓެއް ކަމަށްވާ ހައިޑްއަވޭ ބީޗް ރިސޯޓް އެންޑް ސްޕާ ގައެވެ.
އަދި މީގެ ފަސް ދުވަސް ކުރިން އޭނާ ވަނީ އެ ރިސޯޓުގައި ޑައިވް ކުރާ ވީޑިއޯއެއް ހަތަރު ލައްކައަށް ވުރެ ގިނަ ފޮލޯވަރުންނާ ހިއްސާ ކޮށްފަ އެވެ. އެ ވީޑިއޯގައި ނީހާ ބުނެފައި ވަނީ، އެއީ އޭނާގެ ހަޔާތުގައި ދެ ވަނަ ފަހަރަށް ނުލިބޭނެ ވަގުތު ކޮޅެއް ކަމަށެވެ.
ނީހާގެ އިންސްޓަގުރަމް އެކައުންޓުގައި ރާއްޖޭގައި ހުރެ ފޮޓޯއެއް އެންމެ ފަހުން ހިއްސާ ކޮށްފައި ވަނީ މީގެ ދެ ދުވަސް ކުރިންނެވެ. އެހެންކަމުން އޭނާ އަދި ވެސް ރާއްޖޭގައި ހުރި ކަމެއް ނޭނގެ އެވެ.
އިންޑިއާގެ ސެޓެލައިޓް ޓެލެވިޒަން ޒީ މަރާތީން ތައާރަފްވި އުުމުރުން 31 އަހަރުގެ ނީހާ އަކީ ހިންދީ ފިލްމު ތަކުގެ އިތުރުން، މަރާތީ، ޓަމިލް، ތެލުގު އަދި މަލަޔާލަމްގެ ފިލްމު ތަކުގައި ވެސް ފެނިގެން ގޮސްފައިވާ ތަރި އެކެވެ.