27 Nov 2017, 03:13
އިނގިރޭސި ޕްރިމިއާ ލީގުގައި މެންޗެސްޓާ ސިޓީން ޖެހި ޖެހިގެން 11 ވަނަ މެޗުން މޮޅުވެއްޖެ އެވެ.
ލީގަށް އަލަށް ޕްރޮމޯޓްވި ހަޑާސްފީލްޑާ ދެކޮޅަށް ރަށުން ބޭރުގައި ކުޅުނު އެ މެޗު އެ ޓީމުން ކާމިޔާބު ކުރީ 1-2 ގެ ނަތީޖާ އަކުންނެވެ. މި މޮޅާއެކު ސިޓީ ވަނީ ދެވަނައިގަ އޮތް މެންޗެސްޓާ ޔުނައިޓެޑާ ދެމެދު އޮތް އަށް ޕޮއިންޓުގެ ފަރަގު ދަމަހައްޓާފައެވެ. ސިޓީ އެއްވަނައިގަ 37 ޕޮއިންޓާއެކު އޮތް އިރު، ދެވަނައިގަ އޮތް ޔުނައިޓެޑަށް ލިބިފައި ވަނީ 29 ޕޮއިންޓެވެ.
ދެ ޓީމުގެ ފަރާތުން ވެސް އަވަސް ކުޅުމެއް ފެނިގެން ދިޔަ މި މެޗުގެ ފުރަތަމަ ހާފުގައި ލަނޑު ޖަހާނެ ރަނގަޅު ފުރުސަތުތަކެއް އުފައްދާފައި ވަނީ ސިޓީންނެވެ. ނަމަވެސް ފުރަތަމަ ހާފުގެ އިތުރު ވަގުތުގައި ހަޑާސްފީލްޑް ވަނީ ލަނޑެއް ޖަހައި ލީޑު ނަގާފައެވެ. މި ލަނޑަކީ ސިޓީގެ ޑިފެންޑަރު ނިކޮލަސް އޮޓަމެންޑީގެ އަތުން ބައިކޮޅަށް ވަތް ލަނޑެކެވެ.
ދެވަނަ ހާފު ފަށައިގެން ފުރަތަމަ ތިން މިނެޓު ތެރޭގައި ސިޓީން ވަނީ ނަތީޖާ ހަމަ ހަމަ ކޮށްފައެވެ. އެ ޓީމުގެ ރަހީމް ސްޓާލިންއަށް އޭރިއާ ތެރެއިން ކުރި ފައުލަކާއި ގުޅިގެން ލިބުނު ޕެނަލްޓީ ގޯލަށް ވައްދާލާފައި ވަނީ ސާޖިއޯ އަގުއޭރޯ އެވެ. އެ ލަނޑަކީ އޭނާ ލީގުގައި ކާމިޔާބު ކުރި ނުވަ ވަނަ ލަނޑެވެ.
އަގުއޭރޯގެ ލަނޑަށްފަހު ސިޓީން ދިޔައީ މެޗުން މޮޅުވާން ހަޑާސްފީލްޑްގެ ގޯލަށް ނުރައްކާ ކުރެވޭތޯ މަސައްކަތް ކުރަމުނެވެ. ނަތީޖާ އަކަށްވީ މެޗުގެ 84 ވަނަ މިނެޓުގައި ސްޓާލިން ލަނޑެއް ޖަހައި އެ ޓީމަށް ތިން ޕޮއިންޓް ހޯދައިދިނުމެވެ.
ސިޓީގެ އިތުރުން އުނދަގޫތަކަކަށްފަހު އާސެނަލް އިން މިރޭ ވަނީ ބާންލީގެ މައްޗަށް 0-1 އިން ކުރި ހޯދާފައެވެ. މިރޭގެ މެޗުގެ ހަމައެކަނި ގޯލު އާސެނަލަށް ލިބުނު ޕެނަލްޓީއަކުން ކާމިޔާބުކޮށްދިނީ އަލެކްސިސް ސަންޗޭޒްއެވެ.