25 Nov 2017, 08:46
މިދިޔަ މަހުގެ 31 ވަނަ ދުވަހު ރިލީޒްކުރި، މަޝްހޫރު ޑައިރެކްޓަރު އަދި ޕްރޮޑިއުސަރު ފާތިމަތު ނަހުލާގެ ފިލްމު "ބޮސް" ގެ 25 ވަނަ ޝޯ ރޭ ވަނީ އޮލިމްޕަހުގައި ދައްކައިފައެވެ.
ވިއްސަށްވުރެ ގިނަ ހައުސްފުލް ޝޯ އޮލިމްޕަހުގައި ދެއްކުމަށްފަހު، މިހާރު ދައްކަމުން އަންނަނީ ބޮސްގެ ފަހު ޝޯތަކެވެ. ފަހު ޝޯ ތަކުގެ ޓިކެޓް އޮލިމްޕަހުން ލިބެން ހުންނާނެއެވެ. ޓިކެޓެއްގެ އަގަކީ 100 ރުފިޔާއެވެ.
ނަހުލާ ބުނީ އޮލިމްޕަސް ސްކްރީނުން ބޮސް ނެގުމުގެ ކުރިން ފިލްމު ނުބަލާ ތިބި މީހުން، އަވަހަށް ޓިކެޓް ނަގަންވާނެ ކަމަށެވެ. ފަހުން ޓިކެޓް ނުލިބުން އެކަށީީގެންވާ ކަމަށްވެސް ނަހުލާ ބުންޏެވެ.
ދިވެހި ފިލްމު "ބޮސް"ގެ "ބޮސް ދޭހާ ލޯބިވޭ" ގެ މަންޒަރެއް -- ސަން ފޮޓޯ
ބޮސްގެ ހައުސްފުލް ގިނަ ޝޯތަކެއް އަތޮޅުތެރޭގެ ރަށްރަށުގައިވެސް އަންނަނީ ދައްކަމުންނެވެ. މީގެ އިތުރުން ގިނަ ރިސޯޓްތަކުގައިވެސް ބޮސް އަޅުވަމުންދާކަން ފާހަގަކޮށްލެވެއެވެ.
ބޮސް އަކީ ނަހުލާގެ ވާހަކައަކަށް އޭނާ ޕްރޮޑިއުސްކޮށް، އާއިޝަތު ރިޝްމީ ޑައިރެކްޓް ކޮށްފައިވާ އަސަރުގަދަ ލޯބީގެ ފިލްމެކެވެ. މިއީ މިއަހަރު އެޅުވި އެންމެ އަސަރުގަދަ، އެންމެ ވަރުގަދަ ފިލްމެވެ. އެކަމަށް އެންމެ ބާރުދޭ ކަމަކީ ބޮސް ބަލަން ވަދެފައި ނިކުންނަ މީހުންގެ ދޫދޫ މަތިން އެ ފިލްމުގެ ވަރުގަދަ ޑައިލޮގްތައް އިވޭއިރު ގިނަބައެއްގެ ފޭސްބުކް ސްޓޭޓަސްތަކުގައި ވެސް މިހާރު ހުންނަނީ ބޮސްގެ ޑައިލޮގްތައް ކަމަށް ވުމެވެ.
ބޮސްގެ މަންޒަރެއް -- ފޮޓޯ: ބޮސް
ބޮސް އިން ދައްކައިދެނީ، މުއްސަނދި އަންހެއްކުއްޖެއްގެ މުދާގަނޑުގެ މައްޗަށް ގަދަވެގަތުމަށް ބަޔަކު ކުރާ މަސައްކަތެވެ. ކުޑައިރު މަންމަ ނިޔާވެފައިވާ އެ އަންހެން ކުއްޖާ، ބޮސްގެ ލީޑުން ފެނިގެންދާ މަރިޔަމް އައްޒަ (އިބާ) ހަމައެކަނި ބައްޕަގެ ލޯބި ލިބިގެން ބޮޑުވެ ކުއްލިއަކަށް އެ ބައްޕަ ނިޔާވުމުން ނަފްސާނީ ގޮތުން އޭނާ ކުރިމަތިލާ ހަނގުރާމަ އެވެ.
ބޮސްގެ މަންޒަރެއް -- ފޮޓޯ: ބޮސް
މީގެ އިތުރުން "ޑިޕްރެޝަން"އިން އަރައިގަތުމަށް އިބާ ކުރިމަތިލާ ގޮންޖެހުންތަކާއި، އެކަމުގެ ތެރޭގައި ކުރެވޭ މަޖުބޫރީ ކައިވެންޏަކާ އެކައިވެނިން ލިބޭ ހިތްދަތިކަން، އަދި ލޯބިވާ މީހާ ނުލިބުމުން ކުރާ ހިތްދަތި އަސަރުވެސް ބޮސް ފިލްމުން ފެނިގެންދެ އެވެ.
ފިލްމުގެ ނަން "ބޮސް" އިޝާރަތް ކުރަނީ ބޮސް ދިނުމަށެވެ. "ލޯތްބަށްޓަކައި ދޭ ބޮސް ގެ ބާރު" މި ފިލްމުން ދައްކައިދެއެވެ. މީގެ އިތުރުން އިހްލާސްތެރި ދުއާގެ ބާރުވެސް މި ފިލްމުން ފެންނާނެއެވެ.