08 Nov 2017, 12:36
މި އަހަރުގެ ޝަރަފްވެރިކަމުގެ ގައުމީ އިނާމު ދެ ބޭފުޅަކަށް އަދި މަތީ ދަރަޖަ ހޯދާ ފަރާތްތަކަށް ރައީސް ދެއްވާ ހާއްސަ އިނާމު 24 ފަރާތަކަށް ދެއްވުމަށް ނިންމަވައިފި އެވެ.
ރައީސް އޮފީހުން މިއަދު ބުނީ، ޝަރަފުވެރިކަމުގެ ގައުމީ އިނާމު ލިބިވަޑައިގަންނަވާ ދެ ބޭފުޅުންނަކީ މީގެ ކުރިން ހިތްވަރު ދިނުމުގެ ގައުމީ އިނާމު ލިބިވަޑައިގެންފައިވާ ދެ ބޭފުޅުން ކަމަށެވެ.
މި އަހަރު ހިތްވަރު ދިނުމުގެ ގައުމީ އިނާމު ލިބިވަޑައިގަންނަވާނީ 25 ބޭފުޅަކަށެވެ.
ރައީސް ދެއްވާ ހާއްސަ އިނާމު ލިބޭ ބޭފުޅުންގެ ތެރޭގައި ރާއްޖޭގެ ގައުމީ ސަނަދުތަކުގެ އޮނިގަނޑުގެ އެންމެ މަތީ ދަރަޖައިގެ ސަނަދެއް ހާސިލް ކުރުމުގައި ފާހަގަ ކޮށްލެވޭ ކާމިޔާބީއެއް ހާސިލް ކުރައްވާފައިވާ ތިން ބޭފުޅަކާއި މަތީ ތައުލީމާއި ތަމްރީނުގެ ކޯހަކުން އެންމެ މަތީ ވަނަ ހޯއްދަވައިގެން އިނާމު ލިބިވަޑައިގަންނަވާ 20 ބޭފުޅެކެވެ.
އޭގެ އިތުރުން ބައިނަލްއަގްވާމީ މަރުކަޒަކުން ނުވަތަ މުބާރާތަކުން ނުވަތަ އެނޫން ވެސް ބައިނަލްއަގްވާމީ މިން ކުރުމަކުން އެންމެ މަތީ ވަނަ ނުވަތަ ޝަރަފު ހޯދާފައިވާ އަމިއްލަ ޖަމިއްޔާ އަކަށް މި އަހަރު ދެއްވާ ހާއްސަ އިނާމު ލިބެ އެވެ.
މި ބޭފުޅުންނަށް ގައުމީ އިނާމު ދެއްވުން އޮންނާނީ ޖުމްހޫރީ ދުވަހުގެ މުނާސަބަތުގައި އަންނަ ހޮނިހިރު ދުވަހުގެ ރޭ ދަރުބާރުގޭގައި ބާއްވާ ރަސްމީ ޖަލްސާގަ އެވެ.
ރައީސް އޮފީހުން ބުނީ، އެ ޖަލްސާގައި ސަރުކާރުން ދެއްވާ ހާއްސަ މެޑެލްތައް ވެސް ދެއްވާނެ ކަމަށެވެ.
އެގޮތުން ކީރިތި ގުރުއާން ހިތުދަސް ކުރައްވައިގެން ހާފިޒު ކަމުގެ ސަނަދު ހާސިލް ކުރެއްވި ހަތް ބޭފުޅަކަށާއި މިދިޔަ އަހަރު ބޭއްވި ސާނަވީ އިމްތިހާނާއި މި އަހަރު ބޭއްވި މަތީ ސާނަވީ އިމްތިހާނުން އެކި މާއްދާތަކުން މުޅި ދުނިޔެއިން އެއްވަނަ ހާސިލް ކުރި ދަރިވަރުންނަށް ރައީސް މެޑެލް ދެއްވާނެ ކަމަށެވެ.
އޭގެ އިތުރުން ޕްރެޒިޑެންޓް ސްކައުޓް ބެޖް ހާސިލް ކުރި ސްކައުންޓުންނާއި ޕްރެޒިޑެންޓް ގައިޑް ބެޖް ހާސިލްކުރި ގައިޑަކަށް ވެސް އެ ރޭގެ ޖަލްސާގައި ޝަރަފު ދެއްވުން އޮންނާނެ ކަމަށް ރައީސް އޮފީހުން ބުނެ އެވެ.
މިދިޔަ އަހަރު ސަރުކާރުން ދެއްވާ ޝަރަފްވެރިކަމުގެ ގައުމީ އިނާމު ހަތަރު ބޭފުޅަކަށް ލިބިވަޑައިގަތް އިރު ހިތްވަރު ދިނުމުގެ ގައުމީ އިނާމު 22 ބޭފުޅަކަށް ލިބިވަޑައިގަތެވެ.