07 Nov 2017, 16:10
އުރީދޫ ދިވެހި ޕްރިމިއާ ލީގުގައި ޓީސީ ސްޕޯޓްސް ކްލަަބަށް މޮޅު ކުޅުމެއް ދައްކަމުން އަންނަ އިބްރާހިމް މަހުދީ (ފޭދޫ އިއްބެ)އަށް، މެދުކެނޑުމަކަށް ފަހު އަލުން ގައުމީ ފުޓްބޯޅަ ޓީމުން ފުރުސަތު ލިބިއްޖެ އެވެ.
މި މަހު 14 ވަނަ ދުވަހު ރަށުންބޭރުގައި ފަަލަސްތީނާ ދެކޮޅަށް ކުޅޭ މެޗަށް ނެގި ސްކޮޑު މިހާރު އާންމު ކޮށްފައިވާ އިރު، މި ލިސްޓުގައި ފޭދޫ އިއްބެގެ އިތުރުން މާޒިޔާގެ ޒުވާން ކީޕަރު ހުސެން ޝަރީފް ވެސް ވަނީ ހިމަނައިފަ އެވެ.
ކޮލިފައިންގައި އޮމާން އާ ދެކޮޅަށް ކުޅުނު ދެ މެޗުގެ ސްކޮޑުގައި ވެސް ހިމެނިފައި ނުވާ ފޭދޫ އިއްބެ މީގެ ކުރިން ގައުމީ ޓީމަށް ނެގީ މި އަހަރު ކުރީކޮޅުގައި ފަލަސްތީނާ ދެކޮޅަށް މާލޭގައި ކުޅުނު މެޗުގެ ސްކޮޑަށެވެ.
މި ސީޒަނުގައި ޓީސީ އަށް އެންމެ ރަނގަޅަށް ކުޅެމުން އަންނަ އެއް ކުޅުންތެރިއަކީ ފޭދޫ އިއްބެ އެވެ. ސީޒަނުގެ މިހާތަނަށް އޭނާ ވަނީ 14 ލަނޑު ޖަހައިފަ އެވެ. އަދި ގިނަ ލަނޑުތަކެއް ޖަހަން ފުރުސަތު ވެސް ތަނަވަސްކޮށްދީފަ އެވެ.
ގައުމީ ޓީމުގެ ކުރީގެ ކީޕަރު މުހައްމަދު އިމްރާން ގައުމީ ޓީމަށް ކުޅުން ހުއްޓާލުމުން އޭނާގެ ބަދަލުގައި ޓީމަށް ނެގީ މާޒިޔާގެ ބަދަލު ކީޕަރު ހުސެއިން ޝަރީޕު އެވެ. އޭނާގެ އިތުރުން ސްކޮޑުގައި ދެން ހިމެނޭ ދެ ކީޕަރުންނަކީ އެއް ނަމްބަރު ކީޕަރު މުހައްމަދު ފައިސަލް އާއި ނިއު ރޭޑިއަންޑުގެ ތިން ވަނަ ކީޕަރު އަބްދުﷲ ޒިޔަޒާން އެވެ.
ފަލަމަސްގަނޑަށް ލިބުނު އަނިޔާއަކާ ގުޅިގެން އެންމެ ފަހުން އޮމާން އާ ދެކޮޅަށް ކުޅުނު މެޗުގައި ނުކުޅެވުނު ކެޕްޓަން އަލީ އަޝްފާގް (ދަގަނޑޭ) ވަނީ މިފަހަރުގެ ސްކޮޑުގައި ހިމަނައިފަ އެވެ. މީގެ އިތުރުން އަދި އެންމެ ފަހުން ސްކޮޑުގައި ހިމެނުމަށް ފަހު އަމިއްލަ ސަބަބަކާ ހުރެ ޓީމާ ދުރަށް ދިޔަ މާޒިޔާގެ މިޑްފީލްޑަރު އިސްމާއިލް އީސަ (މެސީ) ވެސް ޓީމުގައި ހިމަނާފައެއް ނުވެ އެވެ. ގައުމީ ޓީމުގެ ކޯޗު ޑަރެން ސްޓެވާޓް ވަނީ އޭނާގެ ކޯޗުކަމުގައި އީސަ އަށް ދެން ފުރުސަތެއް ނުދޭނެ ކަމަށް ބުނެފަ އެވެ.
މިފަހަރު ނަގާފައިވާ ސްކޮޑުގައި ހިމެނެނީ މާޒިޔާ ސްޕޯޓްސް އެންޑް ރެކްރިއޭޝަންގެ ހަ ކުޅުންތެރިންނާއި، ޓީސީގެ ފަސް ކުޅުންތެރިންނާއި، ގދ. ތިނަދޫގެ ދެ ކުޅުންތެރިންނާއި ނިއު ރޭޑިއަންޓްގެ ނުވަ ކުޅުންތެރިންގެ އިތުރުން ގްރީން ސްޓްރީޓްސްގެ ތިން ކުޅުންތެރިންނެވެ.