08 Nov 2017, 08:49
އުރަމަތީ ކެންސަރަކީ މިއަދު އަންހެނުން ތަހައްމަލު ކުރަމުން އަންނަ ވޭނީ ބައްޔެކެވެ.
ކެންސަރަކީ އެއިން ތިމާއަށް ނުހަނު ގެއްލުންތަކެއް ކުރުވާ ކަމަކަށްވީ އިރު އަވަސް ފަރުވާ ނުދެވިއްޖެ ނަމަ ފުރާނައަށް ވެސް ނުރައްކާ ކުރުވާ ބައްޔެކެވެ.
އުރަމަތީ ކެންސަތު ދެނެގަންނާނީ ކިހިނެއް؟
ގަނޑު ލާފައި ހުރުން
އުރަމަތީގައި މާ ބޮޑަށް ނޫނީ ކޮންމެވެސް ވަރަކަށް ގަނޑު ލާފައި ހުރޭ ހެއްޔެވެ؟ ކުރިން ނުހުންނަ ކަހަލަ ގޮތްތަކެއް ފެންނަން ހުރޭ ހެއްޔެވެ؟ ގަނޑު ލާފައި ހުންނަ ތަން ތަނަށް އާންމު ގޮތެއްގައި ތަދުވެފައި ހުންނަ ނަމަ އެއީ އުރަމަތީ ކެންސަރުގެ އަލާމާތެކެވެ. ފަހަރުގައި ތިމާގެގައިގައި ހުންނަ ބައްޔެއްގެ ސަބަބުން ވެސް މިކަން ދިމާވުން އެކަށީގެންވެ އެވެ. ނަމަވެސް ބުއްދިވެރި ގޮތަކީ ސިއްހީ ލަފައެއް ހޯދުމެވެ.
ރަތްވެފައި ހުރުން
މަޑު ރަތްކަމެއް އެތާ ހުރެ އަބަދު ހިރުވާ ގޮތް ދިމާވުމަކީ ވެސް އުރަމަތީ ކެންސަރުގެ އަލާމާތެކެވެ. ކެތްނުވާ ވަރަށް ހިރުވާ ތަންތަންކޮޅު ރަތްވެފައި ހުރުމަކީ އިންފެންޝަނަކަށް ވުރެން ބޮޑަށް އެކަމުގެ އަލާމާތެކެވެ. ހިރުވާ ގޮތް ދިމާވެ އާދަޔާ ހިލާފަށް އެ ތަން ރަތްވެފައި ހުރެދާނެ އެވެ.
ތަދުހުރުން
އަބަދުވެސް އެއް ތަންކޮޅެއްގައި ރިއްސާ ހެއްޔެވެ؟ ކެތްނުވާ ވަރުގެ ވޭނެއް ތަހައްމަލު ކުރަން ޖެހިދާނެ އެވެ. ބައެއް މީހުނަށް އެކަމަކީ މައްސަރު ދުވަސްވަރުގައި އާންމުކޮށް ދިމާވާ ކަމަކަށް ވުމުން އެކަމާ މާ ބޮޑަށް އަޅައެއް ނުލެވެ އެވެ. ނަމަވެސް މައްސަރު ކަންތައް ނިމުމުން ވެސް އެކަން މިހެން ދިމާވާ ނަމަ އެއީ ވެސް ބޮޑު މައްސަލައެކެވެ.
މި އަލާމާތްތައް ގައިން ފެންނަނަމަ ލަސްނުކޮށް ސިއްހީ މާހިރެއްގެ ލަފާ ހޯދުން ބުއްދިވެރި އެވެ.
މައުލޫމާތު: އެމެރިކަން ކެންސަރު ސޮސައިޓީ