06 Nov 2017, 15:17
ރާއްޖޭގައި ފުޅާދާއިރާއެއްގައި ފަރުނީޗަރުގެ ވިޔަފާރިކުރަމުންއަންނަ މުނި އެންޓަޕްރައިޒުން ރިސޯޓެއް ހުޅުވައިފި އެވެ.
ޅ.އަތޮޅުގެ ފުށިފަރުގައި "ފުށިފަރު ރިސޯޓް"ގެ ނަމުގައި ހުޅުވި އެ ރިސޯޓުގައި، 11 ކޮޓަރީގެ ބީޗް ވިލާ ސަން ރައިޒް، 15 ކޮޓަރީގެ ބީޗް ވިލާ ސަންސެޓް، 8 ކޮޓަރީގެ ޕޫލް ބީޗް ވިލާ ސަން ރައިޒް، 10 ކޮޓަރީގެ ޕޫލް ބީޗް ވިލާ ސަންސެޓް އަދި ފަސް ވޯޓާ ވިލާގެ ރޫމް ހިމެނޭގޮތަށް 49 ކޮޓަރި އެ ރިސޯޓުގައި ހިމެނެއެވެ.
ތަފާތު ތިން ރެސްޓޯރެންޓާއި މޫދު ކުޅިވަރުގެ އިތުރުން ޖިމް ވެސް ހިމެނޭގޮތަށް ހަދާފައިވާ އެ ރިސޯޓްގެ ސްޕާއަކީވެސް ތަފާތު ޓްރީޓްމެންޓްތަށް ދެވޭނެ ގޮތަށް ތައްޔާރުކޮށްފައިވާ ސްޕާއެއްކަމަށް ފުށިފަރު ރިސޯޓުން މައުލޫމާތު ދެއެވެ.
ޅ.ފުށިފަރުގައި ހުޅުވާފައިވާ ފުށިފަރު ރިސޯޓު -- ފޮޓޯ/ ފުށިފަރު ރިސޯޓު
ރާއްޖޭގެ ސަގާފަތާއި ރީތިކަން ދައްކުވައިދޭ އެ ރިސޯޓަށް ސީ ޕްލޭންގައި 35 މިނެޓުން ދެވޭނެއެވެ.
ފުށިފަރު ރިސޯޓަކީ ޅ. އަތޮޅުގައި މި އަހަރު ހުޅުވި ދެ ވަނަ ރިސޯޓެވެ. އެ ރިސޯޓާއެކު ޖުމްލަ ފަސް ރިސޯޓު މިހާރު ޅ. އަތޮޅުގައި ހިންގައެވެ.