05 Nov 2017, 23:01
އިނގިރޭސި ޕްރިމިއާ ލީގުގައި އާސެނަލް ބަލިކޮށް، ތާވަލުގެ އެއް ވަނާގައި މެންޗެސްޓާ ސިޓީން އަށް ޕޮއިންޓްގެ ލީޑެއް ހޯދައިފި އެވެ.
އަމިއްލަ ދަނޑުގައި މިރޭ ކުޅުނު މެޗުގައި އާސެނަލްގެ މައްޗަށް ސިޓީން ކުރި ހޯދާފައި ވަނީ 3-1 ލަނޑުގެ ނަތީޖާ އަކުންނެވެ.
އެ މޮޅާ އެކު ކުޅުނު 11 މެޗުން ލިބުނު 31 ޕޮއިންޓާ އެކު ސިޓީ އެއް ވަނާގައި އޮތް އިރު، ދެ ވަނާގައި އޮތް މެންޗެސްޓާ ޔުނައިޓެޑަށް ދިހަ މެޗުން ލިބިފައި ވަނީ 23 ޕޮއިންޓެވެ. ތިން ވަނައިގައި އޮތް ޓޮޓެންހަމް ހޮޓްސްޕާއަށް ވެސް ލިބިފައި ވަނީ 23 ޕޮއިންޓެވެ.
މިރޭ ކުޅުނު މެޗުގެ 11 ވަނަ މިނެޓުގައި ސިޓީއަށް ލީޑު ހޯދުމަށް ރަނގަޅު ފުރުސަތެއް ލިބިގެންދިޔަ އެވެ. ލެރޯއީ ސާނޭ ދިން ބޯޅައިގެ ބޭނުން އާސެނަލްގެ ގޯލުގެ ކުރިމަތިން ރަހީމް ސްޓާލިންއަށް ހިފިފައެއް ނުވެ އެވެ.
ސިޓީން މެޗުގެ ފުރަތަމަ ލަނޑު ޖަހައި ލީޑު ހޯދީ 19 ވަނަ މިނެޓުގަ އެވެ. ރީތި ކުޅުމަކާ އެކު ފެނާންޑީނިއޯ ދިން ބޯޅައަކުން ސިޓީއަށް އެ ލަނޑު ކާމިޔާބުކޮށްދިނީ އެ ޓީމުގެ ބެލްޖިއަމް މިޑްފީލްޑަރު ކެވިން ޑި ބްރޭނާ އެވެ. މެޗުގެ ފުރަތަމަ ހާފު ނިމިގެންދިޔައީ 1-0 ލަނޑުން ސިޓީ ކުރީގައި އޮވެގެންނެވެ.
މެޗުގެ ދެ ވަނަ ހާފު ފެށިތާ ފަސް މިނެޓް ފަހުން ސިޓީއަށް ލިބުނު ޕެނަލްޓީއަކުން އެ ޓީމުން ވަނީ ދެ ލަނޑުގެ ލީޑެއް ހޯދައިފަ އެވެ. ސިޓީއަށް އެ ޕެނަލްޓީ ލިބުނީ އާސެނަލްގެ ޕެނަލްޓީ އޭރިޔާ ތެރެއިން ސްޓާލިންއަށް ނާޗޯ މޮންރެއާލް ކުރި ފައުލަކާ ގުޅިގެންނެވެ. ސިޓީއަށް އެ ޕެނަލްޓީ ކާމިޔާބުކޮށްދިނީ އެ ޓީމުގެ އާޖެންޓީނާ ފޯވަޑް ސާޖިއޯ އަގުއެރޯ އެވެ.
އާސެނަލުން ވަނީ މެޗުގެ 65 ވަނަ މިނެޓުގައި ލަނޑެއް ޖަހައި އުންމީދެއް އާކޮށްފަ އެވެ. އާރޮން ރަމްސީ ދިން ބޯޅައަކުން އާސެނަލަށް އެ ލަނޑު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެ ވަނަ ހާފުގައި ކުޅެން ނުކުތް އެލެކްސެންޑާ ލަކަޒެޓް އެވެ.
މޮޅު ކުޅުމެއް ދައްކަމުންދިޔަ ސިޓީން ވަނީ މެޗުގެ 74 ވަނަ މިނެޓުގައި އަލުން ލީޑު ފުޅާކޮށްފަ އެވެ. ޑޭވިޑް ސިލްވާ ދިން ބޯޅައަކުން ސިޓީއަށް އެ ލަނޑު ކާމިޔާބުކޮށްދިނީ އަގުއެރޯގެ ބަދަލުގައި ދެ ވަނަ ހާފުގައި ކުޅެން ނުކުތް ގެބްރިއަލް ޖީސަސް އެވެ. އެ ލަނޑު ކާމިޔާބުކުރި އިރު، ރީޕްލޭތަކުން ސިލްވާ އާއި ގެބްރިއަލް ޖީސަސް އޮފްސައިޑް ކަމަށް ދެއްކި ނަމަވެސް، ރެފްރީ ނިންމީ ގޯލެއްގެ ގޮތުގަ އެވެ.
މިއަދު ޓޮޓެންހަމް ހޮޓްސްޕާ ވަނީ ކްރިސްޓަލް ޕެލަސް އަތުން 1-0 ލަނޑުން ކުރި ހޯދައިފަ އެވެ. ވެމްބްލީގައި ކުޅުނު އެ މެޗުގެ 64 ވަނަ މިނެޓުގައި ޓޮޓެންހަމްގެ ހަމައެކަނި ލަނޑު، އެ ޓީމަށް ކާމިޔާބުކޮށްދިނީ ސޮން ހިއުންގް މިން އެވެ.