05 Nov 2017, 10:19
މުހައްމަދު ސަލާހުގެ ދެ ލަނޑުން ވެސްޓް ހަމް ޔުނައިޓެޑް ބަލިކޮށް ލިވަޕޫލުން ފަސޭހަ މޮޅެއް ހޯދައިފިއެވެ.
ވެސްޓްހަމް ދަނޑުގައި ރޭ ކުޅުނު މި މެޗު ލިވަޕޫލުން ކާމިޔާބު ކުރީ 1-4 ގެ ނަތީޖާއަކުންނެވެ. މި މޮޅާއެކު ލިވަޕޫލް ވަނީ ކުޅުނު 11 މެޗުން 19 ޕޮއިންޓާއެކު ތާވަލުގެ ހަ ވަނައަށް ޖެހިލައިފައެވެ. މެޗުން ބަލިވި ވެސްޓް ހެމް އަށް 11 މެޗުން ލިބުނީ އެންމެ ނުވަ ޕޮއިންޓެވެ. އެ ޓީމު އޮތީ ތާވަލުގެ 17 ވަނައިގައެވެ.
މެޗުގެ ފުރަތަމަ ލަނޑު 21 ވަނަ މިނެޓުގައި ޖަހައި ލިވަޕޫލަށް ލީޑު ނަގައިދިނީ ސީޒަނުގައި މޮޅު ކުޅުމެއް ދައްކަމުން އަންނަ މުހައްމަދު ސަލާހު އެވެ. އޭގެ ތިން މިނެޓު ފަހުން ޑިފެންޑަރު ޖޯލް މަޓިޕް ވަނީ އިތުރު ލަނޑެއް ޖަހައި ލިވަޕޫލްގެ ލީޑު ފުޅާ ކޮށްދީފައެވެ.
ދެވަނަ ހާފުގެ ވަރަށް ކުރީކޮޅު ވެސްޓްހަމް ލަނޑެއް ޖަހައި މެޗުގެ ތެރެއަށް ވަންނަން މަސައްކަތް ކުރިއެވެ. އެ ލަނޑު މެޗުގެ 55 ވަނަ މިނެޓުގައި ޖަހައިދިނީ މެނުއެލް ލަންޒީނީ އެވެ. ނަމަވެސް ވެސްޓްހަމް އިން ލަނޑު ޖެހިތާ މިނެޓެއްވެސް ނުވަނީސް އެލެކްސް އޮކްސްލޭޑް ޗެމްބަލެއިން ވަނީ އޭނާގެ ފުރަތަމަ ލަނޑު ލިވަޕޫލަށް ކާމިޔާބުކޮށްދީ ޓީމަށް ހަމެޖެހުންކަން ގެނުވާފައެވެ.
މެޗުގެ 75 ވަނަ މިނެޓުގައި ލިވަޕޫލްގެ ހަތަރުވަނަ ލަނޑު ޖަހައިދިނީ ފުރަތަމަ ލަނޑު ވެސް ޖަހައިދިން ސަލާހު އެވެ. މިއީ އޭނާ ލިވަޕޫލަށް ކާމިޔާބު ކޮށްދިން 11 ވަނަ ލަނޑެވެ.
އިނގިރޭސި ޕްރިމިއަ ލީގުގައި މިއަދު ސިޓީއާ ދެކޮޅަށް އާސެނަލް ނިކުންނައިރު ޗެލްސީ ނިކުންނާނީ އަމިއްލަ ދަނޑުގައި ޔުނައިޓެޑާ ދެކޮޅަށެވެ.