04 Nov 2017, 17:06
މަޝްހޫރު ވާހަކަ ލިޔުންތެރިޔާ ފާތިމަތު ނަހުލާ (ނަހޫ) އޭނާގެ އަމިއްލަ ވާހަކައެއްގެ މައްޗަށް ޕްރޮޑިއުސްކޮށްފައިވާ އަސަރު ގަދަ ލޯބީގެ ފިލްމު، "ބޮސް" ރިލީޒްކުރިތާ ހަފްތާއެއްހާ ދުވަސް ފާއިތުވާން ކައިރިވެފައި ވާއިރު، މި ފިލްމުގެ އަވައިގައި ގިނަ ބަޔަކު ޖެހިއްޖެއެެވެ.
ކާމިޔާބު ފިލްމީ ތަރި އައިޝަތު ރިޝްމީ ރަމީޒް ޑައިރެކްޓްކޮށްފައިވާ "ބޮސް" އޮކްޓޫބަރު 31 ވަނަ ދުވަހުގެ ރޭ އޮލިމްޕަސް ސްކްރީންގައި ޕްރިމިއަރކޮށްފައި ވާއިރު، ހުކުރު ދުވަހުގެ ރޭ ވަނީ ކ. ހުރާގައި އެ ފިލްމު ދައްކައިފައެވެ. އަދި މިއާއެކު ބޮސް މިވަނީ މިހާރު އަތޮޅުތެރޭގައި ހަމަ ރަނގަޅަށް ވަކި ހިއްޕާލައިފައެވެ.
އައިޝަތު ރިޝްމީ ރަމީޒް ޑައިރެކްޓްކޮށް، ފާތިމަތު ނަހުލާ ޕްރޮޑިއުސްކުރާ ދިވެހި ފިލްމު "ބޮސް"ގެ ލީޑުރޯލުން ފެނިގެން ދަނީ، މަރިޔަމް އައްޒަ އާއި މުހައްމަދު ޔުނާން -- ސަން ފޮޓޯ: ކްރިސްޓަލްއެންޓަޓެއިންމަންޓް
"ބޮސް" އަޅުވަން ބޭނުންވާ ރަށްތަކަށް މިހާރު އެ ފުރުސަތު ހުޅުވާލެވިފައި ވާއިރު، ކުރިއަށް އޮތް ހަފްތާއަކީ، "ބޮސް"ގެ ޓީމަށް ވަރަށް "ބިޒީ" ހަފްތާއަކަށް ވާނެއެވެ. އެގޮތުން މިހާރުވެސް ގިނަ ރަށްރަށުން ދަނީ، "ބޮސް" އެޅުވުމަށް އެދެމުންނެވެ.
"އަޅުގަނޑުމެން މިދަނީ، ބޮސް އަޅުވަން ބޭނުންވާ ފަރާތްތަކަށް (ރަށްތަކަށް) އެ ފުރުސަތު ދެމުން. މިހާރުވެސް ވަރަށް ގިނަ ރަށްތަކެއްގައި ފިލްމު އެޅުވުމަށް ތައްޔާރު ވެފައި މިވަނީ. އަދި އެކަމަށް އެދި ނަންނޯޓުކުރުމުގެ ފުރުސަތުވެސް ވަނީ ހުޅުވާލާފައި،" ޕްރޮޑިއުސަރު ނަހުލާ ބުންޏެވެ.
ބޮސްގެ ޑައިރެކްޓަރު އައިޝަތު ރިޝްމީ (ކ) އާއި ޕްރޮޑިއުސަރު ފާތިމަތު ނަހުލާ (ވ) ---ސަން ފޮޓޯ/ މުހައްްމަދު އަފްރާހް
ބޮސްގެ ޓިކެޓެއްގެ އަގަކީ 100 ރުފިޔާއެވެ. މާލޭގައި ޓިކެޓް ވިއްކަނީ އޮލިމްޕަހުގެ ޓިކެޓް ކައުންޓަރުންނެވެ. އަދި މާލެ ފިޔަވައި ދެން ފިލްމު އަޅުވާ ރަށްރަށުން އެކަމަށް ހާއްސަކުރެވިފައިވާ އޭޖެންޓް މެދުވެރިކޮށް އަދި 7974426 އަށް ގުޅައިގެން ޓިކެޓްގެ މައުލޫމާތު ލިބޭނެއެވެ.
މިހާތަނަށް "ބޮސް" އަޅުވަން ހަމަޖެހިފައިވާ ރަށްތައް:
- ހދ. ކުޅުދުއްފުށި - ތާރީޚް: ނޮވެމްބަރު، 9
- ނ. ވެލިދޫ - ތާރީޚް: ނޮވެމްބަރު، 15
- ނ. ހޮޅުދޫ - ތާރީޚް: ނޮވެމްބަރު، 11
- ނ. މަނަދޫ - ތާރީޚް: ނޮވެމްބަރު، 16
- ނ. މިލަދޫ - ތާރީޚް: ނޮވެމްބަރު، 13
- ރ. އަލިފުށި - ތާރީޚް: ނޮވެމްބަރު، 9
- ރ. އުނގޫފާރު - ތާރީޚް: ނޮވެމްބަރު، 9
- ރ. އަނގޮޅިތީމު- ތާރީޚް: ނޮވެމްބަރު، 11
- ބ. ހިތާދޫ - ތާރީޚް: ނޮވެމްބަރު، 16
- ބ. ގޮއިދޫ - ތާރީޚް: ނޮވެމްބަރު، 15
- ބ. ތުޅާދޫ - ތާރީޚް: ނޮވެމްބަރު،13، 14
- ބ. އޭދަފުށި - ތާރީޚް: ނޮވެމްބަރު، 9، 10، 11
- ޅ. ކުރެންދޫ - ތާރީޚް: ނޮވެމްބަރު، 9، 10
- ޅ. އޮޅުވެލިފުށި - ތާރީޚް: ނޮވެމްބަރު، 11
- ޅ. ނައިފަރު - ތާރީޚް: ނޮވެމްބަރު، 12، 13
- ކ. ހިންމަފުށި - ތާރީޚް: ނޮވެމްބަރު، 9
- ފ. ނިލަންދޫ - ތާރީޚް: ނޮވެމްބަރު، 9، 10
- ފ. މަގޫދޫ - ތާރީޚް: ނޮވެމްބަރު، 11
- ފ. ބިލެއްދޫ - ތާރީޚް: ނޮވެމްބަރު، 12
ބޮސް އިން ދައްކައިދެނީ، މުއްސަނދި އަންހެއްކުއްޖެއްގެ މުދާގަނޑުގެ މައްޗަށް ގަދަވެގަތުމަށް ބަޔަކު ކުރާ މަސައްކަތެވެ. ކުޑައިރު މަންމަ ނިޔާވެފައިވާ އެ އަންހެން ކުއްޖާ، ބޮސްގެ ލީޑުން ފެނިގެންދާ މަރިޔަމް އައްޒަ (އިބާ) ހަމައެކަނި ބައްޕަގެ ލޯބި ލިބިގެން ބޮޑުވެ ކުއްލިއަކަށް އެ ބައްޕަ ނިޔާވުމުން ނަފްސާނީ ގޮތުން އޭނާ ކުރިމަތިލާ ހަނގުރާމައެވެ.
ބޮސްގެ ތީމް ލަވަތައް ލޯންޗުކުރުމަށް މިރޭ ބާއްވާ ހަފްލާގައި ފިލްމުގެ ތަރީންނާއި ޕްރޮޑަކްޝަން ޓީމުން ބައިވެރިވާނެ -- ފޮޓޯ: ކްރިސްޓަލްއެންޓަޓެއިންމެންޓް
މީގެ އިތުރުން "ޑިޕްރެޝަން"އިން އަރައިގަތުމަށް އިބާ ކުރިމަތިލާ ގޮންޖެހުންތަކާއި، އެކަމުގެ ތެރޭގައި ކުރެވޭ މަޖުބޫރީ ކައިވެންޏަކާ އެކައިވެނިން ލިބޭ ހިތްދަތިކަން، އަދި ލޯބިވާ މީހާ ނުލިބުމުން ކުރާ ހިތްދަތި އަސަރުވެސް ބޮސް ފިލްމުން ފެނިގެންދާނެއެވެ.
ފިލްމުގެ ބަތަލެއްގެ ގޮތުގައި ފެނިގެންދާ މުހައްމަދު ޔުނާން (ރާއިދު)، ތެދުވެރި ލޯތްބަކަށްޓަކައި ވާ ގުރުބާނީ، ބެލުންތެރީންގެ ލޯތައް ހަމަ ރަނގަޅަށް ވެސް ކަރުނައިން ފުރިގެންދާވަރު ވެއެވެ.
ބޮސް އަކީ، މުޖްތަމައުތެރޭގައި މީހުންނަށް ވަރަށް ބޮޑަށް އޮޅުން އަރާފައިވާ، ވަރަށް މުހިންމު މައްސަލައެއް ސަމާލުކަމަށް ގެނެސްދީ ހޭލުންތެރިކުރުވާ ފިލްމެކެވެ. އެއީ ކޮންމެ މީހަކަށް ކޮންމެ ފަދަ ހާލަތެއްގައި ވެސް ދިމާވެދާނެ ކަމެއްކަމަށްވާއިރު، މިފަދަ ކަންކަމުގައި އަމަލުކުރާންވީ ކިހިނެތްކަން ބުނެދީ ވަރަށް ފުރިހަމަ މެސެޖެއް މި ފިލްމުން ބެލުންތެރީންނާއި މުޅި މުޖްތަމައަށްވެސް ދޫކޮށްލައެވެ.
"ބޮސް"ގެ ފޯރި ރާއްޖޭގެ ހުރިހާ ހިސާބެއްގައި ގަދަވަމުން ދާއިރު، ސެޕްޓެމްބަރު 9 ވަނަ ދުވަހު އެ ފިލްމުގެ ފޭސްބުކް ޕޭޖަށް ދޫކޮށްލި ފުރަތަމަ ޓްރެއިލާއަށް މިހާތަނަށް 271،000 ވިއުސް ލިބިފައިވާކަންވެސް ފާހަގަކޮށްލަން ޖެހެއެވެ.