02 Nov 2017, 23:38

އަތޮޅު ތެރޭގެ ރަށްރަށުގެ ތެރެއިން މީހުން ދިރިއުޅޭ ރަށްރަށުގައި ފަތުރުވެރިންނަށް ހާއްސަކޮށްގެން ތަރައްގީކުރާ ހޮޓާތަކާއި ގެސްޓް ހައުސް އެޅުމަށް ދޫކުރާ ބިންތަކުން ނަގާ ފީ ކަނޑައަޅައިފިއެވެ.

ފަތުރުވެރިކަމާއި ބެހޭ ވުޒާރާއިން ކޮށްފައިވާ އިއުލާނެއްގައި ބުނެފައި ވަނީ ފަތުރުވެރިކަަމަށް ހާއްސަކޮށްގެން މީހުން ދިރިއުޅޭ ރަށްރަށުގައި ގެސްޓް ހައުސް ވިޔަފާރީ ކުރުމަށާއި ހޮޓާތައް ހިންގުމަށް ބިންތައް ދޫކުރާއިރު އެ މިނިސްޓްރީން ކަނޑައަޅާފައިވާ އެކުއިޒިޝަން ފީ ނަގަންވާނެ ކަމުގައެވެ.

ރާއްޖޭގައި އެންމެ ފުޅާ ދާއިރާއެއްގައި ގެސްޓްހައުސް ވިޔަފާރި ކުރާ ކ. އަތޮޅާއި އއ. އަތޮޅާއި އދ. އަތޮޅު އަދި ވ. އަތޮޅުގެ ބޭސް ރޭޓުގެ ގޮތުގައި 75 ރުފިޔާ ކަނޑައަޅާފައިވާއިރު އިކުއިޒިޝަންފީގެ ގޮތުގައި ކަނޑައަޅާފައި ވަނީ އަކަފޫޓާއި ބޭސް ރޭޓް ގުނައަށްވާ މިންވަރެވެ.

އެ ހަތަރު އަތޮޅު ފިޔަވައި އެހެން ހުރިހާ ސަރަހައްދުތަކުގެ ބޭސް ރޭޓުގެ ގޮތުގައި ކަނޑައަޅާފައިވަނީ 50 ރުފިޔާއެވެ. އަދި އިކުއިޒިޝަންފީގެ ގޮތުގައި ކަނޑައަޅާފައިވަނީ އަކަފޫޓާއި ބޭސް ރޭޓް ގުނައަށްވާ މިންވަރެވެ.

މިނިސްޓަރީން ކޮށްފައިވާ އިއުލާނުގައި އިތުރަށްބުނެފައިވަނީ ރާއްޖޭގެ ހުރިހާ އަތޮޅަކަށް ގެސްޓްހައުސް ވިޔަފާރިކުރުމަށް އިކިއުޒިޝަން ފީއެއް ހަމަޖެއްސިއިރު އިއުލާން ކުރާތާ އެއް އަހަރު ތެރޭގައި ކަނޑައެޅޭ 8 އަތޮޅަކުން ބިން ކުއްޔަށް ނަގާ ފަރާތްތަކަށް 50 ޕަސެންޓް ޑިސްކައުންޓް ލިބިގެންދާނެ ކަމަށެވެ.
އެގޮތުން މިހާރު އެންމެ މަދުން އަދި ގެސްޓް ހައުސް ވިޔަފާރު ތަަރއްގީވަމުން އަންނަ އަތޮޅުތައް ކަމަށްވާ ހއ. އަތޮޅާއި ހދ. އަތޮޅާއި ށ. އަތޮޅާއި ލ. އަތޮޅާއި ގއ. އަތޮޅާއި، ގދ. އަތޮޅާއި ޏ. އަތޮޅާއި ސ. އަތޮޅުން ބިން ކުއްޔަށް ނަގާނަމަ އިކުއިޒިޝަން ފީގެ ގޮތުގައި ނަގާ މިންވަރުން 50 އިންސައްތަ ޑިސްކައުންޓް ދިނުމަށް ވަނީ ނިންމާފައެވެ.