02 Nov 2017, 10:04
މުވައްޒަފުން ސަލާން ބުނެ އޮފީހަށް ނުދާ މައްސަލަ ޖުޑިޝަރީގައި ދިމާ ނުވާކަމަށް ޑިޕާޓްމެންޓް އޮފް ޖުޑިޝަލް އެޑް މިނިސްޓްރޭޝަން (ޑީޖޭއޭ) ބުނެފި އެވެ.
މުވައްޒަފުން ސަލާން ބުނާލެއް ގިނަ ކަމުން ކަމަށް ބުނެ ބައެއް އަމިއްލަ މުއައްސަސާތަކުން ދަނީ ވަކި ވަކި އުސޫލުތައް ކަނޑައަޅަމުންނެވެ. އެގޮތުން މަހަކު ހަތަރު ދުވަހު ސަލާން ބުނާ މުވައްޒަފުން މެޑިކަލް ޗެކަޕް ހުށަހަޅަން ޖެހޭ ގޮތަށް ވެސް ބައެއް ސަރުކާރު ކުންފުނިތަކުން ވަނީ ހަދައިފަ އެވެ.
ޑީޖޭއޭގެ އޮފިޝަލަކު ވިދާޅުވީ ސަލާން ބުނާ މައްސަލަ ޖުޑިޝަރީއަށް ދިމާ ނުވާ ކަމަށެވެ. ޝަރުއީ ކޯޓުތަކުގައި މަސައްކަތް ކުރާ މުވައްޒަފުންނަކީ ވަރަށް ބުރަކޮށް ވަރަށް ގިނަ އިރު މަސައްކަތް ކުރާ މުވައްޒަފުންކަން ފާހަގަކޮށް އޮފިޝަލު ވިދާޅުވީ ފަރުވާކުޑަކަން މުވައްޒަފުންގެ ކިބައިން ފާހަގަ ނުކުރެވޭ ކަމަށެވެ.
"ހުރިހާ މުވައްޒަފުން ވެސް ވަޒީފާގައި ވަރަށް ބުރަކޮށް އުޅެނީ. ސަލާން ބުނާ މައްސަލަ ދިމައެއް ނުވޭ،" ޑީޖޭއޭގެ އޮފިޝަލަކު ވިދާޅުވި އެވެ.
އޭނާ ވިދާޅުވީ ޖުޑިޝަރީގައި މުވައްޒަފުން ކުރާ މަސައްކަތް ފާހަގަކޮށް އުއްތަމަ ފަނޑިޔާރު އަބްދުﷲ ސައީދު މުވައްޒަފުންނަށް ޝުކުރު އަދާ ކުރައްވާ ކަމަށެވެ.
ސިވިލް ސާވިސް މުވައްޒަފުންގެ ތެރޭން އޮފީސް ވަގުތު ބޭރުގައި އުޅޭ މުވައްޒަފުންގެ މުސާރައިން ކެނޑުމުގެ އުސޫލެއް އެކުލަވާލާ ވާހަކައެއް ދަނީ ދައްކަމުންނެވެ.