30 Oct 2017, 09:11
ބޮލީވުޑްގެ ކުޅަދާނަ ފަންނާނު، އަޖޭ ދޭވްގަންގެ ކެރިއަރުގައިވެސް އެންމެ ކާމިޔާބު ފިލްމަކަށް އޭނާގެ އެންމެ ފަހުން ނުކުތް ފިލްމް، ރޯހިތު ޝެޓީ ޑައިރެކްޓްކޮށްފައިވާ "ގޯލްމާލް އަގެއިން" ވެއްޖެއެވެ.
އެ ފިލްމަށް މިހާތަނަށް އިންޑިއާގެ ސިނަމާތަކުގައި އަޅުވައިގެން އެކަނިވެސް 143.33 ކްރޯޑު (14.3 ބިލިއަން ރުޕީސް) ލިބިފައި ވެއެވެ. ބޭރު ގައުމުތަކުން ލިބުނު އަދަދު އެއްކޮށްލުމުން މިހާރު އެ ފިލްމަށް 200 ކްރޯޑު (20 ބިލިއަން ރުޕީސް) އަށް ވުރެ ގިނައިން ވަނީ ލިބިފައި ކަމަށް އެ ފިލްމުގެ ޓީމުން ބުންޏެވެ.
އެ ފިލްމަކީ އަޖޭގެ ކެރިއަރުގައި ވެސް އެންމެ ކާމިޔާބު ފިލްމަށް ވުމުގެ އިތުރުން އެ ފިލްމަކީ މިއަހަރު ތެރޭގައި ރިލީޒްކުރި އެންމެ ބޮޑު އާމްދަނީއެއް ލިބުނު ހިންދީ ފިލްމް ވެސް މެއެވެ.
ހެއްވާ މަޖާ ކަންތައްތަކެއް ފެނިގެންދާ އެ ފިލްމުގައި ހަރަކާތްތެރިވާ ތަރިންނަކީ އަޖޭ ދޭވްގަން، ޕަރިނިތީ ޗޯޕްރާ، ކުނާލް ކޭމޫ، އަރްޝަދު ވާރްސީ، ޝްރެޔަސް ތަޅްޕަޅޭ އަދި ތުޝާރު ކަޕޫރެވެ.
މީގެ ކުރިން އަޖޭގެ އެންމެ ކާމިޔާބު ފިލްމަކީ 2014 ގައި ރިލީޒްކުރި "ސިންގަމް ރިޓާންސް" އެވެ. އެ ފިލްމަށް 139 ކްރޯޑު (13.9 ބިލިއަން ރުޕީސް) ލިބިފައިވެއެވެ.