25 Oct 2017, 23:32
އުރީދޫ ދިވެހި ޕްރިމިއާ ލީގުގައި ފަސޭހަކަމާ އެކު ދ. ކުޑަހުވަދޫ ބަލިކޮށް، ޓީސީ ސްޕޯޓްސް ކްލަބު ތާވަލުގެ އެއް ވަނައަށް ޖެހިލައިފިއެވެ.
ގައުމީ ފުޓްބޯޅަ ދަނޑުގައި މިރޭ ކުޅުނު ލީގުގެ ދެ ވަނަ ބުރުގެ މެޗުގައި ކުޑަހުވަދޫ އަތުން ޓީސީ މޮޅުވެފައި ވަނީ 4-0 ލަނޑުގެ ނަތީޖާ އަކުންނެވެ. ފުރަތަމަ ބުރުގައި ކުޑަހުވަދޫ އަތުން ޓީސީ މޮޅުވެފައި ވަނީ 6-1 ލަނޑުގެ ނަތީޖާ އަކުންނެވެ.
އެ މޮޅާ އެކު އެއް މެޗު އިތުރަށް ކުޅެގެން ޓީސީ އެއް ވަނައަށް ޖެހިލީ 25 ޕޮއިންޓް ހޯދައިގެންނެވެ. ދެ ވަނައިގައި އޮތް ނިއު ރޭޑިއަންޓް ސްޕޯޓްސް ކްލަބަށް ނުވަ މެޗުން 24 ޕޮއިންޓް ލިބިފައިވާ އިރު، ތިން ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަން ކްލަބަށް ކުޅުނު ދިހަ މެޗުން ލިބިފައި ވަނީ 20 ޕޮއިންޓެވެ.
މިރޭ ކުޅުނު މެޗުގެ ކުރީކޮޅު ޓީސީން ވަނީ ފުރަތަމަ ލަނޑު ޖަހައި، ލީޑު ހޯދައިފައެވެ. މެޗުގެ ފަސް ވަނަ މިނެޓުގައި ޓީސީއަށް އެ ލަނޑު ކާމިޔާބު ކޮށްދިނީ މެޗުގައި ޓީސީގެ ކެޕްޓަންގެ ދައުރު އަދާކުރަމުންދިޔަ ތަޖުރިބާކާރު ޑިފެންޑަރު އަބްދުﷲ ހަނީފް (ބެންޖޯ) އެވެ. އެ ލަނޑަށް ފަހު ވެސް މެޗު ކޮންޓްރޯލް ކޮށްގެން ކުޅެމުން ދިޔައީ ޓީސީ އިންނެވެ.
މެޗުގައި ޓީސީން ކާމިޔާބުކުރި ދެ ވަނަ ލަނޑާއި ތިން ވަނަ ލަނޑު ފެނިގެންދިޔައީ ފުރަތަމަ ހާފު ނިމެން ތިން މިނެޓަށް ވެފައި ވަނިކޮށެވެ. އިބްރާހިމް މަހުދީ (ފޭދޫ އިއްބެ) ދިން ރީތި ބޯޅަ އަކުން ޓީސީގެ ދެ ވަނަ ލަނޑު ހަސަން ނާއިޒް (ދާދު) ކާމިޔާބު ކޮށްދިން އިރު، ފުރަތަމަ ހާފުގެ އެންމެ ފަހު މިނެޓުގައި ފޭދޫ އިއްބެ ދިން ބޯޅަ އަކުން ޓީސީގެ ތިން ވަނަ ލަނޑު ކާމިޔާބު ކޮށްދިނީ އެ ޓީމުގެ ބިދޭސީ ފޯވަޑް ސްޓެވާޓް ކޯނެލިއަސް އެވެ. ފުރަތަމަ ހާފު ނިމިގެން ދިޔައީ 3-0 ލަނޑުން ޓީސީ ކުރީގައި އޮވެގެންނެވެ.
މެޗުގެ ދެ ވަނަ ހާފު ވެސް ޓީސީން ފެށީ ވަރުގަދަ ކުޅުމަކާ އެކު އެވެ. ނަތީޖާއެއްގެ ގޮތުން ދެ ވަނަ ހާފު ފެށިތާ މިނެޓެއް ފަހުން ޓީސީގެ މުހައްމަދު ސާމިރަށް ލަނޑު ޖަހާނެ ރަނގަޅު ފުރުސަތެއް ލިބިގެންދިޔައެވެ. ކުޑަހުވަދޫގެ ޕެނަލްޓީ އޭރިޔާ ތެރެއިން ސާމިރު ފޮނުވާލި ފުރަތަމަ ހަމަލާ، ކީޕަރު އަބްދުﷲ ޔަޒީދު މަތަކުރި އިރު، ރީބައުންސް ބޯޅައިން ސާމިރު ފޮނުވާލި ހަމަލާ، ގޯލާ އަމާޒުވެފައެއް ނުވެ އެވެ.
ޓީސީގެ ހަތަރު ވަނަ ލަނޑު ފެނިގެން ދިޔައީ މެޗުގެ 61 ވަނަ މިނެޓުގައެވެ. ސާމިރު ދިން ބޯޅަ އަކުން ޓީސީއަށް އެ ލަނޑު ކާމިޔާބު ކޮށްދިނީ މެޗުގައި މޮޅު ކުޅުމެއް ދައްކަމުންދިޔަ ފޭދޫ އިއްބެ އެވެ. އޭނާ އަށް ކުޑަހުވަދޫގެ ޕެނަލްޓީ އޭރިޔާ ތެރެއިން ބޯޅަ ލިބުނު އިރު، އޭނާ ހުރީ ވަރަށް ހުސްކޮށެވެ.
ލީގުގައި މާދަމާ ވެސް ދެ މެޗު ކުޅުމަށް ހަމަޖެހިފައިވެ އެވެ. މާދަމާ ހަވީރު 4:00ގައި ކުޅޭ މެޗުގައި ކްލަބު ގްރީން ސްޓްރީޓްސް އާއި ށ. މިލަންދޫ ބައްދަލުކުރާ އިރު، މާދަމާ ރޭ 9:00ގައި ކުޅޭ މެޗުގައި ބައްދަލު ކުރާނީ ނިއު ރޭޑިއަންޓް ސްޕޯޓްސް ކްލަބާއި އއ. މާޅޮހެވެ.