24 Oct 2017, 17:21
ރ. އަތޮޅު މީދުގައި އަލަށް އިމާރާތް ކުރި މިސްކިތް މަސްޖިދުލް އަލް އައްވާބީން ރައީސުލްޖުމުހުރިއްޔާ އަބްދުﷲ ޔާމީން އަބްދުލް ގައްޔޫމް ހުޅުއްވާދެއްވައިފި އެވެ.
އެ މިސްކިތަކީ ސައުދީ ރަސްގެފާނުގެ ހިލޭ އެހީގެ ދަށުން އިމާރާތްކޮށްފައިވާ މިސްކިތެކެވެ. މިއަދު އަސުރު ނަމާދަށް ފަހު ހުޅުވި އެ މިސްކިތް އިމާރާތް ކުރުމަށް ޖުމުލަ އަށް މިލިއަނަށް ވުރެ ގިނަ ރުފިޔާ ވަނީ ހަރަދުކޮށްފައެވެ.
ރައީސް އަބްދުﷲ ޔާމީން މިހާރު ރ. އަތޮޅަށް ކުރައްވާ ޒިޔާރަތުގައި މިއަދު ހަވީރު މީދޫ އަށް ވަޑައިގެން އެ ރަށުގައި ހަދާފައިވާ މިސްކިތް ހުޅުއްވާދެއްވުމަށްފަހު ވަނީ ޖަމައަތުގައި އަސްރު ނަމާދުކުރައްވާފައެވެ. އަދި އެމަނިކުފާނުގެ އަރިހުގައި ދައުލަތުގެ ވަޒީރުންނާއި ޕީޕީއެމްގެ އިސްވެރިން ވަނީ ބައިވެރިވެވަޑައިގަނެފައެވެ.
އާބާދީގައި 1825 މީހުން ދިރިއުޅޭ މީދުގައި އިމާރާތް ކުރި މަސްޖިދުލް އަލް އައްވާބީ އަކީ 700 މީހުންނަށް އެއްފަހަރާ ނަމާދުކުރެވޭ ވަރުގެ ބޮޑު މިސްކިތެކެވެ. އަދި މިސްކިތް އިމާރާތްކޮށްފައި ވަނީ ޒަމާނީ ފެންވަރަށެވެ.
ރައީސް ޔާމީން މީދު ރައްޔިތުންނާއި ބައްދަލު ކުރެއްވުމަށް ހަމަޖެހިފައި ވަނީ މިރޭގެ ވަގުތެއްގައެވެ.
ރައީސް މީދުއަށް ކުރައްވާ ދަތުރުފުޅުގައި ވަނީ އެ ރަށުގެ ނަރުދަމާ ނިޒާމާއި ފެނުގެ ނިޒާމް ރަސްމީކޮށް އިފްތިތާހް ކޮށްދެއްވާފަ އެވެ. މީގެ އިތުރުން އެމަނިކުފާނު ވަނީ ރ. ފައިނުގެ އިތުރުން މަޑުއްވަރީއަށް ވެސް ޒިޔާރަތް ކުރައްވާފަ އެވެ.