18 Oct 2017, 13:09
ރާއްޖޭގެ ހުރިހާ ރަށަކަށް ހުޅުވާލައިގެން ކުރިއަށްގެންދާ އެންމެ ބޮޑު ފުޓްސަލް މުބާރާތް ކަމަށްވާ "ގޯލްޑަން ފުޓްސަލް ޗެލެންޖް"ގެ އޮންލައިން މީޑިއާ ޕާޓްނަރަކަށް މިއަހަރު ވެސް ސަން އޮންލައިން ހަމަޖައްސައިފިއެވެ.
މިރޭ ފަށާ އެ މުބާރާތުގެ އޮންލައިން މީޑިއާ ޕާޓްނަރަކަށް ސަން އޮންލައިން ހަމަޖެއްސުމަށް މިއަދު ހެނދުނު ސަން ޓީވީ ސްޓޫޑިއޯގައި ބޭއްވި ހަފްލާއެއްގައި ވަނީ އެއްބަސްވުމުގައި ސޮއިކޮށްފައެވެ. މިދިޔަ އަހަރު ވެސް އެ މުބާރާތުގެ އޮންލައިން މީޑިއާ ޕާޓްނަރަކީ ސަން އޮންލައިނެވެ.
ސަންގެ ފަރާތުން އެއްބަސްވުމުގައި ސޮއިކުރެއްވީ ސަން މީޑިއާ ގްރޫޕްގެ ސީއޯއޯ މިންހާ ފާއިޒެވެ. އަދި ގޯލްޑަން ފުޓްސަލް އެސޯސިއޭޝަންގެ ފަރާތުން އެއްބަސްވުމުގައި ސޮއިކުރެއްވީ އެ އެސޯސިއޭޝަންގެ ރައީސް ރިލްވާން މޫސާއެވެ.
އެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން ރިލްވާން ވިދާޅުވީ، މުބާރާތުގެ އޮންލައިން މީޑިއާ ޕާޓްނަރަކަށް ސަން އޮންލައިން ހަމަޖެހިގެން ދިއުމުން ވަރަށް އުފާކުރާ ކަމަށާއި މުބާރާތް ފުރިހަމައަށް ގެނެސްދިނުމަށް އެއްބަސްވުމުން އެސޯސިއޭޝަންގެ ފަރާތުންނާއި ހުރިހާ ޒުވާނުންގެ ފަރާތުން ސަން މީޑިއާ ގްރޫޕަށް ޝުކުރު އަދާކުރާ ކަމަށެވެ.
ގޯލްޑަން ފުޓްސަލް ޗެލެންޖް 2017ގެ އޮންލައިން މީޑިއާ ޕާޓްނަރަކަށް ސަން އޮންލައިން ހަމަޖެއްސުމަށް އެއްބަސްވުމުގައި ސޮއިކުރުމަށް ބޭއްވި ހަފްލާގެ ތެރެއިން --- ސަން ފޮޓޯ
މުބާރާތުގެ ޕާޓްނަރެއްގެ ގޮތުގައި ބައިވެރިވުމަށް ސަންއަށް ތަނަވަސްކޮށްދިން ފުރުސަތަށްޓަކައި ސަންގެ ފަރާތުން މިންހާ ވަނީ ގޯލްޑަން ފުޓްސަލް އެސޯސިއޭޝަނަށް ޝުކުރު ދަންނަވައިފައެވެ. އަދި މިކަހަލަ މުބާރާތްތަކަށް ސަން ސްޕޯޓްސް ޓީމުން އެއްބާރުލުން ދޭ ކަން ވެސް މިންހާ ފާހަގަ ކުރެއްވިއެވެ.
"ރާއްޖޭގައި މިގޮތަށް ކުރިއަށް ގެންދާ އެކިއެކި އިވެންޓްތަކުގައި އެބޭފުޅުންނަށް ސަޕޯޓް ދީގެން އެބޭފުޅުން ކުރިއަރުވައި، ޔޫތު ޑިވެލޮޕްމަންޓާއި، ސްޕޯޓްސް، އެންޓަޓެއިންމަންޓް، ލައިފް ސްޓައިލް، މިހުރިހާ ދާއިރާތަކުން ވެސް ޔޫތުންނަށް ބާނުންވާ ހުރިހާ ހިތްވަރެއްދީ، ސަޕޯޓް ދިނުމަކީ އަޅުގަނޑުމެންގެ އަމާޒެއް. މިކަމުގައި ޕާޓްނަރެއްގެ ގޮތުގައި ޝާމިލްވެވުނީތީ ވަރަށް އުފާކުރަން. ސަން މީޑިއާ ގްރޫޕްގެ އެކިއެކި ޕްލެޓްފޯމްތަކުން އަޅުގަނޑުމެން މި ކަވަރޭޖް ހުރިހާ ބޭފުޅުންނަށް ވެސް ގެނެސްދެމުން ދާނަން،" މިންހާ ވިދާޅުވިއެވެ.
މިދިޔަ އަހަރުގެ މުބާރާތެކޭ އެއްގޮތަކަށް މިއަހަރު ވެސް ރާއްޖޭގެ އެކި ކަންކޮޅުތަކުން ޖުމްލަ 50 ޓީމު ބައިވެރިވެފައިވެއެވެ. މުބާރާތް ފެށުމުގެ ގޮތުން މާފަންނު ސްޓޭޑިއަމް ވެލި ދަނޑުގައި މިރޭ 10:00ގައި ކުޅޭ ހާއްސަ މެޗުގައި ބައްދަލުކުރާނީ މިދިޔަ އަހަރުގެ ޗެމްޕިއަން ތ. ތިމަރަފުށްޓާއި މިއަހަރުގެ އައިލެންޑް ކަޕްގެ ރަނަރަޕް ބ. ހިތާދޫއެވެ. އެ މެޗުން މޮޅުވާ ޓީމަކަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވެއެވެ.
މިއަހަރު އެ މުބާރާތުގެ ޗެމްޕިއަން އަދި ރަނަރަޕް ޓީމަށް ދޭ ފައިސާގެ އިނާމަށް ވަނީ ބޮޑެތި ބަދަލުތަކެއް ގެނެސްފައެވެ. މިދިޔަ އަހަރު ޗެމްޕިއަން ޓީމަށް 50،000 ރުފިޔާގެ ފައިސާގެ އިނާމެއް ދިން ނަމަވެސް، މިއަހަރު ޗެމްޕިއަން ޓީމަށް ހުށަހަޅާފައި ވަނީ 65،000 ރުފިޔާގެ ފައިސާގެ އިނާމެކެވެ. މިދިޔަ އަހަރު ރަނަރަޕް ޓީމަށް 15،000 ރުފިޔާގެ ފައިސާގެ އިނާމެއް ދިން ނަމަވެސް، މިއަހަރު ރަނަރަޕް ޓީމަށް ހުށަހަޅާފައި ވަނީ 25،000 ރުފިޔާގެ ފައިސާގެ އިނާމެކެވެ.