16 Oct 2017, 12:42
ފަތުރުވެރިކަމުގެ ސީޒަނާ ދިމާކޮށް ރާއްޖެ އަށް ދަތުރުކުރާ އެއާލައިންތަކުގެ ދަތުރުތައް އިތުރުކުމަށް ނިންމައިފިއެވެ.
މޯލްޑިވްސް އެއާޕޯޓްސް ކޮންޕެނީ ލިމިޓެޑް (އެމްއޭސީއެލް) ގެ ޖެނެރަލް މެނޭޖަރު ކޯޕަރޭޓް ކޮމިއުނިކޭޝަން ހަސަން އަރީފް "ސަން" އަށް ވިދާޅުވީ، ފަތުރުވެރިން އެންމެ ގިނައިން ރާއްޖެ އަންނަ ދުވަސްވަރާ ދިމާކޮށް ރާއްޖެއަށް ދަތުރުކުރާ ހަތަރު އެއާލައިނެއްގެ ދަތުރުތައް އިތުރު ކުރުމަށް ނިންމާފައިވާ ކަމަށެވެ.
ހަސަން ވިދާޅުވީ، ރާއްޖެ އަށް ދުވާލަކު ހަތަރު ދަތުރު ކުރަމުން އަންނަ ދުބާއީގެ އެމިރޭޓްސް އިން މިމަހުގެ 29 އިން ފެށިގެން ދުވާލަކު ފަސް ދަތުރު ކުރަން ނިންމާފައިވާ ކަމަށެވެ. އެމިރެޓްސްއިން ރާއްޖެއަށް ދަތުރުކުރުމަށް ބޭނުންކުރަނީ ބޯއިން 777 މަރުކާގެ މަތިންދާބޯޓެވެ.
އެމިރޭޓްސްގެ އިތުރުން މެލޭޝިއާގެ ކުއާލަލަމްޕޫރުން ރާއްޖެ އަށް ހަފްތާއަކު ހަތް ދަތުރުކުރަމުން އަންނަ އެއާ އޭޝިއާ އިން ވެސް މިމަހުގެ 30 އިން ފެށިގެން ހަފްތާއަކު 11 ފްލައިޓް ބާއްވަން ހަމަޖައްސާފައިވާ ކަމަށް ހަސަން ވިދާޅުވި އެވެ.
ޗައިނާގެ ބެއިޖިން ކެޕިޓަލް އެއާލައިނުން ރާއްޖެއަށް މިހާތަނަށް ހަފްތާއަކު ހަތަރު ދަތުރު ކުރިނަމަވެސް މި މަހުގެ 29 ވަނަ ދުވަހުން ފެށިގެން ހަފްތާގެ ކޮންމެ ދުވަހަކު އެއް ދަތުރު ކުރަން ނިންމާފައިވާ ކަމަށް ހަސަން ވިދާޅުވިއެވެ.
އޭނާ ވިދާޅުވީ އަންނަ ޖެނުއަރީ މަހުގެ ދެ ވަނަ ދުވަހުން ފެށިގެން ސިންގަޕޫރުގެ ސިލްކް އެއާ އިން ރާއްޖެއަށް ހަފުތާ އަކު ނުވަ ދަތުރު ކުރާނެ ކަމަށެވެ. އެ އެއާލައިނުން މިހާރު ރާއްޖެއަށް ކުރަމުން އަންނަނީ ހަފުތާއަކު ހަތަރު ދަތުރުކަމަށް ވެސް އޭނާ ވިދާޅުވިއެވެ.
ކޮންމެ އަހަރެއްގެވެސް ފަތުރުވެރިކަމުގެ ސީޒަނާ ދިމާކޮށް ފްލައިޓް އޮޕަރޭޝަންތަކަށް ބަދަލުއައިސް ރާއްޖެ އަންނަ ފްލައިޓްތައް އިތުރުވެއެވެ.