12 Oct 2017, 08:51
ހަ އަހަރަށްފަހު އިންޑިއާ އޭޝިއަން ކަޕަށް ކޮލިފައިވެއްޖެއެވެ.
އިންޑިއާއިން އޭޝިއަން ކަޕްގެ ޖާގައެއް ކަށަވަރުކޮށްފައިވަނީ އަމިއްލަ ގައުމުގައި އިއްޔެ ކުޅުނު ކޮލިފައިން މެޗުގައި 4-1 ލަނޑުގެ ނަތީޖާއަކުން މަކާއު ބަލިކޮށްގެންނެވެ.
އެ މެޗުގެ 28 ވަނަ މިނެޓުގައި އިންޑިއާއަށް ރޯލިން ބޯގަސް ލީޑު ހޯދައިދިން ނަމަވެސް، މެޗުގެ 37 ވަނަ މިނެޓުގައި ނިކޮލަސް މާރިއާ ޑި އަލްމޭޑާ ޓޮރާއޯ ވަނީ މަކާއުއަށް ނަތީޖާ ހަމަހަމަކޮށްދީފައެވެ. މެޗުގެ ފުރަތަމަ ހާފު ނިމިގެންދިޔައީ 1-1 ލަނޑުގެ ނަތީޖާއަކުން ދެ ޓީމު އެއްވަރުވެގެންނެވެ.
އެ މެޗުގެ 60 ވަނަ މިނެޓުގައި އިންޑިއާއަށް ސުނިލް ޗެތުރީ އަލުން ލީޑު ހޯދައިދިންއިރު، މެޗުގެ 70 ވަނަ މިނެޓުގައި އިންޑިއާއަށް ލީޑު ފުޅާވެގެންދިޔައީ މަކާއުގެ ޑިފެންޑަރު މަން ފައި ހޯ އަތުން ބައިކޮޅަށް ވަން ލަނޑުންނެވެ. އިންޑިއާގެ ހަތަރުވަނަ ލަނޑު، މެޗުގެ ދެވަނަ ހާފުގެ އިތުރު ވަގުތުކޮޅު ތެރޭގައި ކާމިޔާބުކޮށްދިނީ ޖޭޖޭ ލާލް ޕެކްލުއާއެވެ.
ކޮލިފައިންގެ 'ގްރޫޕް އޭ'ގައި އިންޑިއާ އޮތީ ކުޅުނު ހަތަރު މެޗުން ވެސް މޮޅުވެ އެއްވަނައިގައެވެ. އެ ޓީމުން 12 ޕޮއިންޓް ހޯދާފައިވާއިރު، ދެވަނައިގައި އޮތް ކިރްގިސްތާން އަދި ތިންވަނާގައި އޮތް މިޔަންމާއަށް ވެސް ތިން މެޗުން ލިބިފައިވަނީ ހަތަރު ޕޮއިންޓެވެ. ހަތަރު ވަނައިގައި އޮތް މަކާއުއަށް ޕޮއިންޓެއް ލިބިފައެއް ނުވެއެވެ. އެ ގްރޫޕްގައި އިންޑިއާ އަދި މަކާއުއަށް ބާކީ ދެ މެޗު އޮތްއިރު، ކިރްގިސްތާން އަދި މިޔަންމާއަށް ތިން މެޗު އެބައޮތެވެ.
މިއީ އިންޑިއާއިން އޭޝިއަން ކަޕަށް ކޮލިފައިވި ހަތަރު ވަނަ ފަހަރެވެ. އެންމެ ފަހުން އޭޝިއަން ކަޕްގައި އިންޑިއާ ވާދަކޮށްފައިވަނީ 2011 ވަނަ އަހަރެވެ. އެ އަހަރު އިންޑިއާއަށް ފުރުސަތު ލިބިގެންދިޔައީ އޭއެފްސީ ޗެލެންޖް ކަޕްގެ ޗެމްޕިއަންކަން ހޯދުމާ ގުޅިގެންނެވެ.
ކޮލިފައިންގައި ވާދަކޮށްގެން އެންމެ ފަހުން އިންޑިއާއަށް އޭޝިއަން ކަޕުން ފުރުސަތެއް ހޯދިފައިވަނީ 1984 ވަނަ އަހަރުއެވެ. އޭޝިއަން ކަޕްގައި އެންމެ ރަނގަޅު ނަތީޖާއެއް އިންޑިއާއަށް ހޯދިފައިވަނީ 1964 ވަނަ އަހަރުއެވެ. އެ އަހަރުގެ ފައިނަލުގައި ވާދަކޮށް، އިންޑިއާ ބަލިވެފައިވަނީ އެ ފަހަރުގެ މުބާރާތް ބޭއްވި ގައުމު ކަމަށްވާ އިޒްރޭލް އަތުންނެވެ.