11 Oct 2017, 13:08
މިދިޔަ ޖުލައި މަހުގެ 31 ވަނަ ދުވަހު ލިޓަސް ސާވިސް ސެންޓަރުގެ ތެރޭގައި ވަޅިން ހަމަލާދީ ރ. މީދޫ ފެންފިޔާޒުގޭ މުހައްމަދު އަނަސް މަރާލި މައްސަލައާ ގުޅިގެން ކުޑަކުއްޖެއްގެ މައްޗަށް ދައުވާ އުފުލައިފިއެވެ.
ޖުވެނައިލް ކޯޓުގެ އޮފިޝަލަކު "ސަން" އަށް ވިދާޅުވީ އުމުރުން 17 އަހަރުގެ އެ ކުއްޖާގެ މައްޗަށް އުފުލާފައި ވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ ކަމަށެވެ.
ޕްރޮސިކިއުޓާ ޖެނެރަލްގެ އޮފީހުން އެ މައްސަލަ ކްރިމިނަލް ކޯޓަށް ހުށަހަޅާފައި ވަނީ މި މަހުގެ އަށް ވަނަ ދުވަހުއެވެ.
އަނަސްގެ މަރާ ގުޅިގެން ފުލުހުން ވަނީ ގިނަ ބަޔަކު ހައްޔަރުކޮށްފައެވެ. އަނަސްގެ މަރަށްފަހު ފިލައިގެން އުޅުނު ދެ މީހުން ކަމަށްވާ ތ. ކިނބިދޫ ގުލްފާމްގޭ މުހައްމަދު ޝާޒް އާއި މ. ލޮނުމިދިލިގޭ އަފްރާހް އަބްދުއްރައްޒާގު ހޯދައި ފުލުހުން ވަނީ އެ ދެ މީހުން ހައްޔަރުކޮށްފައެވެ.
އެ މައްސަލާގައި އިތުރު ބައެއްގެ މައްޗަށް ދައުވާ ކުރި ކަމުގެ މައުލޫމާތު އަދި ލިބިފައެއްނުވެއެވެ.
ޖުވެނައިލް ކޯޓުގެ އޮފިޝަލް ވިދާޅުވީ އަނަސް މަރާލި ކަމުގެ ތުހުމަތުގައި ދައުވާ އުފުލި ކުއްޖާގެ މައްޗަށް ދާދިފަހުން އިތުރު ދައުވާއެއް ވެސް ވަނީ އުފުލާފައި ކަމަށެވެ. އެއީ މީހަކަށް ނުރައްކާތެރި ހާނިއްކައެއްވާގޮތަށް ތޫނުއެއްޗެއް ބޭނުންކޮށްގެން މާރާމާރީ ހިންގުމުގެ ދައުވާ ކަމަށް އޮފިޝަލް ވިދާޅުވިއެވެ.
ޒަހަމްވި ޒުވާނާ ގޮވައިގެން ފުލުހުން ދަނީ --- ފޮޓޯ/ ޓްވިޓާ
އެކުއްޖާގެ މައްޗަށް އެ ދައުވާ އުފުލާފައި ވަނީ މިދިޔަ ޖުލައި މަހުގެ 25 ވަނަ ދުވަހު ސުޕްރީމް ކޯޓު ކައިރިން ޒުވާނެއްގެ ބުރަކަށްޓަށް ވަޅިހެރި ކަމުގެ ތުހުމަތުގައެވެ.