09 Oct 2017, 13:10
ސައުދީ އަރަބިއްޔާގެ މިސްކިތްތަކުގައި ހައްދު ފަހަނަ އަޅައިފައިވާ ފިކުރު އާލާކުރާ ކަމަށް ބުނެ އެ ގައުމުގެ މިސްކިތްތަކުގެ އެތަކެއް އިމާމުންތަކެއް މަގާމުން ވަކިކޮށްފައިވާ ކަމަށް ސައުދީގެ ފޮރިން މިނިސްޓަރު އާދިލް އަލް ޖުބައިރު ވިދާޅުވެއްޖެ އެވެ.
ސައުދީ ރަސްގެފާނު ރަޝިއާއަށް މިހާރު ކުރަމުންދާ ދަތުރުފުޅުގައި ބައިވެރިވެވަޑައިގެންނެވި އެ ގައުމުގެ ހާރިޖީ ވަޒީރު އާދިލް އަލް ޖުބައިރު ވިދާޅުވީ އެ ގައުމުގައި ހަމަނުޖެހުމާއި ނަފްތަރު އުފެދޭނެ އެއްވެސް ކަމަކަށް ޖާގައެއް ނެތް ކަމަށާއި އަދި އެފަދަ ފިކުރުތަކާއި އަދި ޓެރެރިޒަމަށް ހަރަދުކުރިޔަ ނުދޭނެ ކަމަށެވެ.
"އިސްލާމީ ފޮތްތަކުގެ މާނަ އޮޅުވާލައިގެން މިހާރު ހިނގަމުންދާ ކަންތައްތައް ހައްލުކުރުމަށް އަޅުގަނޑުމެންގެ މިހާރުގެ ވިސްނުމަކީ މިގައުމުގެ ތައުލީމް މިޒަމާނަށް ފެތޭނެ ގޮތަށް ހަރުދަނާ ކުރުން،" އާދިލް ވިދާޅުވި އެވެ.
ޓެރެރިޒަމާ ދެކޮޅަށް ކުރާ ހަނގުރާމައަށް ސައުދީން ރަޝިއާއަށް އެއްބާރުލުން ދެއްވާނެ ކަމަށް ވެސް އާދިލް ވިދާޅުވި އެވެ. އައިއެސްގެ ގިނަ ހަނގުރާމަވެރިންގެ ތެރޭގައި ރަޝިއާ އަދި ސައުދީ އަރަބިއްޔާގެ ރައްޔިތުން ހިމެނެ އެވެ.
އާދިލް ވަނީ ގަތަރުން ޓެރެރިޒަމުގެ ހަރަކާތްތަކަށް ހަރަދުކޮށް ވާގިވެރިވާ ކަމަށް ބުނެ ގަތަރަށް ބަހުގެ ހަމަލާތަކެއް ވެސް ދީފަ އެވެ.
"ކޮންމެ ގައުމަކުން ވެސް އެބަ ޖެހޭ ވަކި ހަމަތަކެއްގައި ހިފަހައްޓަން. ޓެރެރިޒަމުގެ އަމަލުތަކަށް ހަރަދުކުރުމާއި، ނަފުރަތާއި ޕްރޮޕެގަންޑާ ފެތުރުމާއި އަދި އެހެނިހެން ގައުމުތަކުގެ ދާހިލީ ކަންތައްތަކަށް ވަނުން އެބަ ޖެހޭ ހުއްޓުމަކަށް އަންނަން. އަޅުގަނޑުމެން ގަތަރުގެ ކިބައިން އެދެނީ މި ކަންތައްތައްތައް ފުރިހަމަ ކުރުމަށް." އާދިލް ވިދާޅުވި އެވެ.