07 Oct 2017, 14:01
ޕީޕީއެމް އިން ބޭރުގެ ޖަމްއިއްޔާ ޖަމާއަތްތަކާ އެކު ބޭއްވި ބައްދަލުވުންތަކަކީ ވަރަށް ކާމިޔާބު ބައްދަލުވުންތަކެއް ކަމަށް އެޕާޓީގެ ޕާލަމަންޓަރީ ގްރޫޕްގެ ޑެޕިއުޓީ ލީޑަރު، ކެލާ ދާއިރާގެ މެންބަރު އަލީ އާރިފް ވިދާޅުވެއްޖެ އެވެ.
ސްވިޒަލެންޑްގެ ޖެނީވާގައި ހުންނަވައި، މިއަދު 'ސަން' އަށް ދެއްވި އިންޓަވިއު އެއްގައި އާރިފް ވިދާޅުވީ، އެ ބައްދަލުވުންތަކުގައި މައުލޫމާތު ހިއްސާކުރެއްވީ ރާއްޖޭގެ އިންސާނީ ހައްގުތަކާ ބެހޭ ކަންތައްތައް އޮތްގޮތާއި މަޖިލިސް މެމްބަރުން މަޖިލީހަށް ނުވެއްދިކަމަށް އިދިކޮޅު ފަރާތްތަކުން ދައްކާ ވާހަކަތަކާއި އަދި މަރުގެ އަދަބު ތަންފީޒު ކުރުމާ ބެހޭ ގޮތުން ކަމަށެވެ.
އެބޭފުޅުން ކުރިމަތި ކުރެއްވި ސުވާލުތަކަށް ޖަވާބު ދެއްވައި، ރާއްޖޭގައި ހިނގާފައިވާ ކަންތައްތަކުގެ ވާހަކަ ސާފު ކޮށްދީފައިވާނެ ކަމަށް އާރިފް ވިދާޅުވި އެވެ.
އެގޮތުން މަޖިލިސް މެމްބަރުންގެ ތެރެއިން ބަޔަކަށް މަޖިލީހަށް ވަންނަން ދިއުމުން ނުވަދެވުނު މައްސަލައިގެ ހަގީގަތަކީ ކޮބައިތޯ ސްވިޒަލޭންޑްގެ ފަރާތުން އޭޝިއާ އަދި ޕެސިފިކް ސަރަހައްދަށް ކަނޑައަޅުއްވާފައި ހުންނަ ސަފީރު ސުވާލު ކުރެއްވި ކަމަށެވެ.
"އަޅުގަނޑުމެން ދެންނެވީ، އެ ދުވަހަކީ މަޖިލިސް އޮތް ދުވަހެއް ނޫނޭ. އެ ދުވަސްވަރަކީ ޖުލައި 26 ދުވަސްވަރު ކަމަށްވާތީވެ، ރާއްޖޭގެ ސިފައިންނާއި ފުލުހުން މުޅި ގައުމުގެ ރައްކާތެރިކަން ހާއްސަކޮށް ބެލެހެއްޓި ދުވަސްވަރެކޭ އެއީ. ދެން ޖަލްސާ އެއް ނެތި ފާރުމަތިން އެ މީހުން އެރިއްޔޭ،" އާރިފް ވިދާޅުވި އެވެ.
"މި ބައްދަލުވުންތައް އިދާރަ ކުރެއްވިއްޔާ ވަރަށް ކާމިޔާބު،"
ޖެނީވާގައި ބޭއްވި ބައްދަލުވުންތަކާ ގުޅިގެން މައުލޫމާތު ދެއްވަމުން ޕީޕީއެމްގެ ޕާލަމެންޓްރީ ގްރޫޕްގެ ލީޑަރު އަހްމަދު ނިހާން ހުސައިން މަނިކު ވިދާޅުވީ، ރައްޔިތުންގެ މަންދޫބުންގެ ހައިސިއްޔަތުން ޕީޕީއެމްއިން އިންސާނީ ހައްގުތަކާ ބެހޭ ކޮމިޝަނަރާ އިއްޔެ ބައްދަލުވުމެއް ބާއްވާފައިވާ ކަމަށެވެ. އަދި އެ ބައްދަލުވުމުގައި ދެއްކެވި ވާހަކަތައް ކޮމިޝަނަރު ކަނުލައި އަޑުއެއްސެވި ކަމަށް އޭނާ ވިދާޅުވިއެވެ.
"އަޅުގަނޑުމެންނަށް ވަރަށް އުފާ ލިބިގެން ދިޔަ، ކޮމިޝަނަރުގެ އޮފީހުން އަޅުގަނޑުމެން ދެއްކި ވާހަކަތައް ވަރަށް ކަނުލައި އަޑުއަހާ އަދި އަޅުގަނޑުމެންނާ އެކު މަސައްކަތް ކުރުމަށް ފުރުސަތު ހުޅުވާލާފަ އޮތްކަން އަޅުގަނޑުމެންނަށް ހާމަކޮށް ދިނީމަ،" ނިހާން ވިދާޅުވި އެވެ.
އޭނާ ވިދާޅުވީ، އެ ބައްދަލުވުންތަކުގައި މަސައްކަތް ކޮށްފައިވާނީ، ރާއްޖެއާ ބެހޭ ގޮތުން ދެކެވޭ ވާހަކަތަކުގެ ހަގީގަތް ހާމަ ކުރުމަށް ކަމަށެވެ.
ޕީޕީއެމުން އައިޕީޔޫގެ އިސް ބޭފުޅުންނާ ބައްދަލު ކުރެއްވުމުގެ ތެރެއިން ---
"އަޅުގަޑުމެންގެ މި ވަފުދު މަސައްކަތް މި ކުރީ، އަޅުގަނޑުމެންގެ ގައުމުގެ ހާލަތު އާއްމުކޮށް، ބައިނަލް އަގުވާމީ މުޖުތަމައުގައި ރާއްޖެއާ ބެހޭ ގޮތުން އިދިކޮޅު ފަރާތްތަކުން ފޮނުވާފަ ހުންނަ މައުލޫމާތުގެ އަލީގަ ފެތުރިފަ ހުންނަ ދޮގު ޚަބަރުތައް ސާފުކޮށްދިނުމަށް،" ނިހާން ވިދާޅުވި އެވެ.
އޭނާ ވިދާޅުވީ، ރާއްޖޭގެ ސިޔާސީ ހާލަތު ވަރަށް ބޮޑަށް ގޯސްވެފަވާ ކަމަށް ދެކެވޭ ވާހަކަތަކާއި މަޖިލިސް މެމްބަރުންނަށް ހިނގާ ބިނގާވެ ނޫޅެވޭ ކަމަށް ބުނެ ދެކެވޭ ވާހަކަތާއި ރާއްޖޭގައި މަރުގެ އަދަބު ތަންފީޒު ކުރުމާ ބެހޭ އެކި ފަރާތްތަކުން ދައްކާފައިވާ ވާހަކަތަކުގެ ހަގީގަތް ސާފުކޮށްދީފައިވާ ކަމަށެވެ.
ޕީޕީއެމް އިން ވަނީ، އދ.ގެ ހައި ކޮމިޝަނަރާއި، އިންޓަ ޕާލިމަންޓަރީ ޔޫނިއަން (އައިޕީޔޫ) ގެ އިސްބޭފުޅުންނާވެސް ބައްދަލު ކުރައްވާފަ އެވެ.
އެ ބައްދަލުވުންތަކުގައި ނިހާނާއި، އާރިފްގެ އިތުރުން ޕީޕީއެމްގެ ސެކްރެޓަރީ ޖެނެރަލް، ނިލަންދޫ ދާއިރާގެ މެންބަރު ޑރ. އަބްދުﷲ ޚާލީލާއި ނައިފަރު ދާއިރާގެ މެންބަރު އަހްމަދު ޝިޔާމާއި، ޕީޕީއެމް ގެ ޗީފް ވިޕް، ގެމަނަފުށީ ދާއިރާގެ މެންބަރު ޖަމީލު އުސްމާން ބައިވެރިވެ ވަޑައިގެންނެވި އެވެ.