05 Oct 2017, 14:16
މިދިޔަ އަހަރުގެ އޯގަސްޓް މަހުން ފެށިގެން މިއަހަރުގެ އޯގަސްޓް މަހުގެ ނިޔަލަށް ކީރިތި ޤުރުއާން ހިތުދަސްކުރި ހަތް ފަރާތަކަށް ޝަރަފުގެ އެވޯޑް ޤުރުއާނާ ބެހޭ މަރުކަޒުން ދީފި އެވެ.
ޤުރުއާން ކިޔެވުމުގެ 32 ވަނަ ގައުމީ މުބާރާތުގެ ނަތީޖާ ފާޅުކުރުމަށް މިއަދު ހެނދުނު އިސްލާމީ މަރުކަޒުގެ ޖަލްސާ ކުރާ މާލަމުގައި ބޭއްވި ރަސްމިއްޔާތެއްގައި ހާފިޒު ކަމުގެ ޝަރަފު ލިބުނު ފަރާތްތަކަށް އިނާމު ހަވާލުކޮށްދެއްވީ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމެވެ.
މިއަހަރު ޤުރުއާން ހިތުދަސްކޮށްގެން ޝަރަފުގެ އެވޯޑް ހޯދާފައިވަނީ:
އަހުމަދު ޒާހިރު، ކުރުކުރުމާގެ، ސ. ހިތަދޫ
- ނާދިހް އަބްދުލް ހަމީދު، މާބަގީޗާގެ، ލ. މާވަށް
- އަހުމަދު ނަބީހު، ނާދީ، ނ. މާފަރު
- ޝަރީފާ މުހައްމަދު ދީދީ، އަރިވަރު، ސ. މީދޫ
- މައިސަން ސައީދު، ޑިއާރރެސްޓް، ސ. ފޭދޫ
- އަހުމަދު އަހްސަން، ފިނިރޯޅި، ލ. ގަން
- މުހައްމަދު މުސްތަފާ، ޖަންބުމާގެއާގެ، ބ. އޭދަފުށި
އެ ފަރާތްތަކުގެ ތެރެއިން މިއަދުގެ ރަސްމިއްޔާތުގައި އެވޯޑް ހަވާލުކޮށްފައިވަނީ ހަތަރު ފަރާތަކަށެވެ. މައިސަން ސައީދު، އަހުމަދު އަހްސަން އަދި މުހައްމަދު މުސްތަފާ އަށް އެވޯޑް ހަވާލު ނުކުރެވުނީ އެ ފަރާތްތައް ރަށުގައި ނެތުމުން ކަމަށް އިސްލާމިކް މިނިސްޓްރީން ބުންޏެވެ.
ޤުރުއާން ކިޔެވުމުގެ ގައުމީ މުބާރާތުގެ ނިމުމުގެ ރަސްމިއްޔާތުގައި ހާފިޒުކަމުގެ ޝަރަފް ލިބުނު ޒާހިރަށް ރައީސް އެވޯޑް ހަވާލު ކޮށްދެއްވަނީ --- ފޮޓޯ/ ރައީސް އޮފީސް
ހާފިޒު ކަމުގެ ޝަރަފް މިއަދު ލިބުނު ފަރާތްތަކުގެ ތެރެއިން އުމުރުން އެންމެ 13 އަހަރު ނާދިހް އަބްދުލް ހަމީދަކީ ގުރުއާނާބެހޭ މަރުކަޒުން ބޭއްވި 500 ދަރިވަރުންނަށް ހިފްޒު ކުރުމުގެ ޕްރޮގްރާމުގައި ބައިވެރިވި އެންމެ ހަގު ކުއްޖާ އެވެ.
މިއަހަރުގެ ތެރޭގައި ދުބާއީގައި ބޭއްވި ދުބާއީ އިންޓަނޭޝަނަލް ހޮލީ ޤުރުއާން އެވޯޑުގައި ރާއްޖެ ތަމްސީލް ކޮށްފައިވާ ނާދިހަކީ ތަރާވީހު ނަމާދު ކުރުމުގެ ހުއްދަ ލިބިގެން ޝަހީދު އަލީ މިސްކިތުގައި ތަރާވީހް ނަމާދު ވެސް ކޮށްފައިވާ ކުއްޖެކެވެ.
ހާފިޒު ކަމުގެ އެވޯޑް ލިބުނު ފަރާތްތަކުގެ ތެރެއިން އުމުރުން 14 އަހަރުގެ އަހުމަދު ނަބީހަކީ އޯޓިޒަމް ހުރުމުން އަމިއްލަ މީހުން ހިންގާ ޤުރުއާން ކުލާސްތަކުން ފުރުސަތު ނުލިބުނު ކުއްޖެކެވެ. އަދި ހެޔޮއެދޭ ފަރާތެއްގެ އެހީގައި ގެއަށް ޓީޗަރަކު ގެނެސްގެން އޭނާ ވަނީ ތިން މަސް ތެރޭގައި ޤުރުއާން ހިތުދަސްކޮށްފައެވެ.
ޤުރުއާން ކިޔެވުމުގެ ގައުމީ މުބާރާތުގެ ނިމުމުގެ ރަސްމިއްޔާތުގައި ހާފިޒުކަމުގެ ޝަރަފް ލިބުނު ޝަރީފާއަށް ރައީސް އެވޯޑް ހަވާލު ކޮށްދެއްވަނީ --- ފޮޓޯ/ ރައީސް އޮފީސް
ހާފިޒުކަމާއެކު އިމާދުއްދީން ސްކޫލުގެ ޖުވެލް ސެންޓަރުގައި ތައުލީމު ހާސިލްކުރަމުން އަންނަ ނަބީހް ވެގެން ގޮސްފައިވަނީ ރާއްޖޭގައި ހާއްސަ އެހީއަށް ބޭނުންވާ ކުދިންގެ ތެރެއިން ޤުރުއާން ހިތުދަސްކުރި ފުރަތަމަ ކުއްޖާއަށެވެ.
އަދި ނަބީހަކީ ޤުރުއާން ކިޔެވުމުގެ އިތުރުން މަދަހަ ކިޔައި، އޭނާގެ އަމިއްލަ މަދަހަ އަލްބަމެއް ވެސް ނެރެފައިވާ ކުއްޖެކެވެ.
މިއަދުގެ ރަސްމިއްޔާތުގައި ވާހަކަފުޅުދައްކަވަމުން ކީރިތި ޤުރުއާނާބެހޭ މަރުކަޒުގެ ރައީސް އިބްރާހީމް ރަޝީދު މޫސާ ވިދާޅުވީ، ކުރިން އެވްރެޖްކޮށް އަހަރަކު ތިން ބޭފުޅަކު ހާފިޒްކަމުގެ ސަނަދު ހާސިލް ކުރިނަމަވެސް މި ސަރުކާރު އައި ފަހުން އެ އަދަދު އަހަރަކު ހަ ބޭފުޅުންނަށް އިތުރުވެފައިވާ ކަމަށެވެ.
ޤުރުއާން ކިޔެވުމުގެ ގައުމީ މުބާރާތުގެ ނިމުމުގެ ރަސްމިއްޔާތުގައި ހާފިޒުކަމުގެ ޝަރަފް ލިބުނު ނަބީހަށް ރައީސް އެވޯޑް ހަވާލު ކޮށްދެއްވަނީ --- ފޮޓޯ/ ރައީސް އޮފީސް
އެގޮތުން ވޭތުވެދިޔަ ހަތަރު އަހަރުގެ ތެރޭގައި 24 ބޭފުޅަކު ޤުރުއާން ހިތުދަސްކޮށް ހާފިޒުކަމުގެ ސަނަދު ހާސިލް ކޮށްފައިވާ ކަމަށް ވިދާޅުވިއެވެ.
އޭނާ ވިދާޅުވީ، ޤުރުއާނާބެހޭ މަރުކަޒުގެ 17 އަހަރުގެ ތާރީހުގައި 57 ބޭފުޅަކު ހާފިޒްކަން ހާސިލް ކޮށްފައިވާއިރު ރާއްޖޭގެ ހާފިޒްކަމުގެ ދަފްތަރުގައި ކުޑަކުދިންނާއި ބޮޑު މީހުންނާއެކު 167 ބޭފުޅަކު ހިމެނޭ ކަމަށެވެ.
ުޤުރުއާން ހިތުދަސްކޮށްފައިވާ ހާފިޒުން އިތުރު ކުރުމަށް ގިނަ މަސައްކަތްތަކެއް ކުރަމުންދާކަން ފާހަގަކުރައްވައި އިބްރާހިމް ރަޝީދު މޫސާ ވިދާޅުވީ، މާލޭގައި ހުންނަ މައި މަރުކަޒާއި އަތޮޅުތެރޭގެ ގޮފިތަކުގައި ހިންގާ ހިފްޒު ކުލާސްތަކުގައި 517 ބޭފުޅުން ޤުރުއާން ހިތުދަސް ކުރަމުންދާ ކަމަށެވެ.
އެގޮތުން ރާއްޖޭން ބޭރުން ހާފިޒުން ގެނެސްގެން ރާއްޖޭގެ ހަ އަތޮޅެއްގައި ކުލާސްތައް މިހާރު ވެސް ހިންގަމުންދާ ކަމަށް ވިދާޅުވިއެވެ.
ޤުރުއާން ކިޔެވުމުގެ ގައުމީ މުބާރާތުގެ ނިމުމުގެ ރަސްމިއްޔާތުގައި ކީރިތި ޤުރުއާނާބެހޭ މަރުކަޒުގެ ރައީސް އިބްރާހީމް ރަޝީދު މޫސާ ވާހަކަފުޅުދައްކަވަނީ --- ފޮޓޯ/ ރައީސް އޮފީސް
އޭގެ އިތުރުން ޤުރުއާން ކިޔަވަން ދަސްކޮށްދޭ ކުލާސްތަކުގައި 630 ދަރިވަރުން ކިޔަވަމުންދާއިރު އެޑިއުކޭޝަން މިނިސްޓްރީ އާއި ކީރިތި ޤުރުއާނާ ބެހޭ މަރުކަޒާ ގުޅިގެން ރާއްޖޭގެ 14 ސްކޫލެއްގެ ގްރޭޑް ހަތަރެއް އަދި ފަހެއްގެ 630 ދަރިވަރުން ޤުރުއާން ޚަތިމް ކުރުމުގެ މަޝްރޫއުގެ ދަށުން 940 ދަރިވަރުން ހަތިމް ކުރަމުންދާ ކަން އޭނާ ފާހަގަކުރެއްވިއެވެ.
އިބްރާހިމް ރަޝީދު މޫސާ ވިދާޅުވީ، ޚަތިމް ކުރުމުގެ ކުލާހުގައި ކިޔަވަމުންދާ ދަރިވަރުންގެ ތެރެއިން މިއަހަރު ނިމުމުގެ ކުރިން 645 ދަރިވަރުން ދަސްވެނިވެގެންދާނެ ކަމަށެވެ.