18 Sep 2017, 18:04
މާލޭ ވޯޓަރ އެންޑް ސްވަރޭޖް ކޮމްޕެނީ ޕްރައިވެޓް ލިމިޓެޑް (އެމް.ޑަބްލިއު.އެސް.ސީ)އިން ދާދި ފަހުން ތައާރަފް ކުރެވިގެންދިޔަ އޮން ސްޕޮޓް ބިލިންގ ނިޒާމުގެ ތެރެއިން ކަސްޓަމަރަކަށް 13.8 މިލިއަން ރުފިޔާގެ ބިލެއް ދެވިފައިވަނީ ޕްރިންޓްކުރުމުގައި ދިމާވި ޓެކްނިކަލް މައްސަލައަކުން ކަމަށް އެ ކުންފުނީގެ ކަސްޓަމަރ ސާވިސް މެނޭޖަރ ފަޒީލް ރަޝީދު ވިދާޅުވެއްޖެއެވެ.
އަދި މިގޮތުން ޕްރިންޓް ކުރެވިފައިވާ ބިލްގައި، ބިލްގެ އެކައުންޓް ނަންބަރު، މީޓަރ ނަންބަރ އަދި ޓެރިފްވެސް ނެތްކަން ފަޒީލް ރަޝީދު ފާހަގަކުރެއްވިއެވެ. އަދި ކުންފުނީގެ މެއިން ސިސްޓަމުން އޭރުވެސް ފެންނަން ހުރީ ހަމަ ރަނގަޅު މައުލޫމާތުކަން އޭނާ ފާހަގަކުރެއްވިއެވެ.
"ކަސްޓަމަރ މިއަދު 11:33 ކަންހާއިރު މި މައްސަލަ ރިޕޯޓް ކުރީ. ކޮމްޕްލެއިން ލިބުމާއިއެކު އަޅުގަނޑުމެން ވަގުތުން ސިސްޓަމް ޗެކްކުރި އިރު ސިސްޓަމްވެސް ހުރީ ހަމަ ރަނގަޅަށް. އަދި ވަގުތުން ކަސްޓަމަރަށް ރަގަޅު ބިލް ވަނީ ހަވާލުކުރެވިފައި،" ކަސްޓަމަރ ސާރވިސް މެނޭޖަރ ވިދާޅުވިއެވެ.
މިފަދަ ޓެކްނިކަލް މައްސަލައަކީ އަލަށް ތަޢާރަފްކުރެވިގެންދާ މިކަހަލަ ޚިދުމަތެއްގައި މަދުން ނަމަވެސް ދިމާވެދާނެ ކަމެކެވެ. އެހެންނަމަވެސް އެމް.ޑަބްލިއު.އެސް.ސީ އިން އަބަދުވެސް މަސައްކަތް ކުރަމުން ގެންދަނީ ޓެކްނޮލަޖީގެ އެހީގައި ކަސްޓަމަރުންނަށް ދެވޭ ޚިދުމަތްތައް އިތުރަށް ފުޅާކޮށް ހަރުދަނާކުރުމަށް އެ ކުންފުނިން ބުނެއެވެ.
އެމް.ޑަބްލިއު.އެސް.ސީގެ ފަރާތުން ދާދި ފަހުން ތަޢާރަފްކުރެވުނު މޯބައިލް އެޕްލިކޭޝަން، ސްޕޮޓް ބިލިންގ އަދި ކިއޮސްކްގެ ޚިދުމަތަކީ ކުންފުނީގެ ކަސްޓަމަރުން ބަލައިގަނެފައިވާ ޚިދުމަތްތަކެއްކަން ފާހަގަކުރެވެއެވެ.
ފަޒީލް ރަޝީދު ވިދާޅުވީ، އެމް.ޑަބްލިއު.އެސް.ސީ އިން އެދެނީ، މިފަދަ އާންމު ޚިދުމަތްތަކާ ގުޅޭ މައުލޫމާތުތައް އެކި ފަރާތްތަކުން ހިއްސާކުރާއިރު، ކަމުގެ ހަގީގަތް ނޯޅޭ ގޮތަށް ޒިންމާދާރު ކަމާއެކު މަޢުލޫމާތު ޙިއްސާކުރުމަށް ކަމަށެވެ.