16 Sep 2017, 09:24
ހުޅުމާލެ ޔޫތު ސިޓީ ތަރައްގީކުރުމުގައި، އެ ސިޓީގައި ދިރިއުޅޭ ރައްޔިތުންގެ ވިސްނުމާއި ފިކުރު ވީހާވެސް ބޮޑަށް ހިމެނުމުގެ ގޮތުން، "ހާލު ސާވޭ"ގެ ނަމުގައި ޚާއްސަ ސާވޭއެއް ކުރިއަށް ގެންދިއުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)އިން ތައްޔާރުވެއްޖެއެވެ.
ހާލު ސާވޭ ކުރިއަށް ގެންދިއުމަށް ހަމަޖެހިފައި ވަނީ، މާދަމާ (އާދީއްތަ) ދުވަހުން ފެށިގެން ދެހަފްތާގެ މުއްދަތަށެވެ.
ހުޅުމާލޭ ބާބަކިއު ސަރަހައްދު --- ފޮޓޯ/ އެޗްޑީސީ
އެޗްޑީސީގެ ޑިރެކްޓަރ މުނިސިޕަލް އެޑްމިނިސްޓްރޭޝަން އަހްމަދު ފާތިޙް ވިދާޅުވީ، ހާލު ސާވޭއަކީ، ހުޅުމާލޭ ދިރިއުޅެމުންދާ ރައްވެހީންގެ ހާލު ދެނެގަތުމަށް، ގެއިންގެއަށް ޒިޔާރަތްކޮށް ކުރިއަށް ގެންދާ ހަރަކާތެއް ކަމަށެވެ.
"މި ސާރވޭ ކުރިއަށް ދާއިރު، ރައްޔިތުންނަށް ދިރިއުޅޭ މާހައުލުގައި ދިމާވާ ދަތިތަކާއި، ބޭނުންކުރާ ޚިދުމަތްތަކަށް ދިމާވާ ދަތިތަކާ ގުޅޭ މައުލޫމާތު ހޯދައި، ކުރިއަށް ހުޅުމާލޭގައި ތަރައްގީކުރުމަށް ބޭނުންވާ ޚިދުމަތްތަކުގެ މައުލޫމާތު އެއްކުރެވިގެން ދާނެ،" އޭނާ ވިދާޅުވިއެވެ.
ފާތިޙް ވިދާޅުވީ، ހުޅުމާލޭ ތަރައްގީގެ ޕްލޭންތައް އެކުލަވާލައި ސިޔާސަތުތައް ކަނޑައަޅާއިރު، ތަނުގައި ދިރިއުޅޭ ރައްޔިތުންގެ ޚިޔާލު ހޯދައި އަދި މިފަދަ ޕްލޭންތައް އެކުލަވައިލާއިރު ރައްޔިތުންގެ ހިއްސާ އޮތުން ވަރަށް މުހިއްމު ކަމެއްގެ ގޮތުގައި އެޗްޑީސީން ދެކޭ ކަމަށެވެ. އެގޮތުން މިފަދަ ކަންކަން އެކުލަވައިލާއުރި އާންމުންގެ ހިސާ އޮތުމަކީ، އެޗްޑީސީއާ ހުޅުމާލޭގައި ދިރިއުޅޭ އާންމުންނާ ވަރަށް ބޮޑަށް ގުޅުން ބަދަހިވެގެންދާނޭ ކަމެއް ކަމަށްވެސް އޭނާ ވިދާޅުވިއެވެ.
ހުޅުމާލެ ސާފު ކުރުމަށް ހިންގި ޕްރޮގްރާމެއްގެ ތެރެއިން --- ފޮޓޯ/ އެޗްޑީސީ
"ސަރުކާރުގެ ދުރުވިސްނުމާ އެކު ހުޅުމާލެއަށް ވަރަށް ގިނަ ހެޔޮ ބަދަލުތަކެއް އެޗްޑީސީން ގެންނަމުން މިދަނީ. ހުޅުމާލޭ ރައްޔިތުން މިކަން ފާހަގަވެސް ކުރަމުން ދާކަން މީގެ ކުރީން ކުރެވުނު ސާރވޭތަކުން ވެސް ވަނީ ފާހަގަކުރެވިފައި.
"ހުޅުމާލޭގައި ދިރިއުޅޭ ކޮންމެ ރައްޔިތެއްގެ ވެސް ބޭނުމަކީ ބިޔަބޮޑު ސަހަރުން ބޭނުންތެރި ވަސީލަތްތައް ލިބި ހިތްގައިމު، ސާފު، ސަލާމަތްތެރި ވެއްޓަކަށް ހެދުމައްކަން އަޅުގަނޑުމެން އެއްވެސް މީހަކު ދެބަހެއް ނުވާނޭކަން އެނގޭ."
މި އީ މިފަދަ ސާވޭއެއް ހުޅުމާލޭގައި ކުރިއަށް ގެންދާ ފުރަތަމަ ފަހަރެވެ. އެޗްޑީސީން ހާލުސާވޭ ކުރިއަށް ގެންދާއިރު، ހުޅުމާލޭގެ މުނިސިޕަލް ދަފްތަރެއް އެކުލަވައިލުމަށްޓަކައި ބޯހިމެނުމުގެ މަސައްކަތްވެސް ކުރިއަށް ގެންދިއުމަށް ވަނީ ހަމަޖެހިފައެވެ.
"އަޅުގަނޑުމެން ބޯހިމަނަން ބޭނުން މިވަނީ ހުޅުމާލޭގައި މުނިސިޕަލް ދަފްތަރެއް ހަދަން. މި ދަފްތަރުގައި ރެޖިސްޓްރީ ވާނަމަ، އަޅުގަނޑުމެންދޭ ޚިދުމަތްތަކުގައި ވެސް ލުއިފަސޭހަ ލިބިގެންދާނެ،" ފާތިހް ވިދާޅުވިއެވެ.
"މިފަދަ ދަފްތަރެއް ހެދުމުގެ މުހިއްމުކަމަކީ، ދިވާމާ ކާރިސާތަކުގައި ވެސް އަޅުގަނޑުމެންނަށް އެނގޭނެ، އިމާރާތްތަކުގައި ދިރިއުޅޭ ފަރާތްތަކުގެ މައުލޫމާތާއި، އަދި މިނޫންވެސް މުހިއްމު މައުލޫމާތުތައް. އެހެންކަމުން އެފަދަ ހާލަތެއްގައި، ކަމާގުޅޭ މުއައްސަސާ ތަކަށް މައުލޫމާތު ފޯރުކޮށްދިނުމަށް ވެސް އަޅުގަނޑުމެންނަށް ފަސޭހަވެގެން ދާނެ."
ދެހަފްތާގެ ނިޔަކަށް ކުރިއަށް ގެންދާ ހާލު ސާރވޭ އާދީއްތަ ދުވަހު ފަށާގޮތަށް ހަމަޖެހިފައި ވީ ނަމަވެސް މިހާރުވެސް، ހުޅުމާލޭ މުނިސިޕަލް ދަފްތަރުގައި ރެޖިސްޓްރީވުމަށް ބޭނުންވާ ފަރާތްތަކަށް އެ ދަފްތަރު ހުޅުވާލެވިފައިވާ ކަމަށް އެޗްޑީސީން ބުނެއެވެ.
ހުޅުމާލޭގައި ބޮޑު ޖަމާއަތުގައި ކުރި މި އަހަރުގެ ފިތުރު ޢީދު ނަމާދު-- ފޮޓޯ: އެޗްޑިސީ
ހާލުސާވޭ ކުރިއަށް ގެންދިއުމަށްޓަކައި އެޗްޑީސީން ވަނީ 150 ވަރަކަށް އިނިއުމަރޭޓަރުންވެސް ތަމްރީނުކޮށްފައެވެ. އެގޮތުން، ބުރާސްފަތި ދުވަހުގެ ރޭ ވަނީ، އެ ފަރާތްތަކަށް ޚާއްސަ ތަމްރީނުތަކެއްވެސް ކުރިއަށް ގެންގޮސްފައެވެ.
ފާތިޙް ވިދާޅުވީ، އެޗްޑީސީން ސާވޭ ކުރިއަށް ގެންދާ ދުވަސްވަރު، އެ ހަރަކާތުގައި ބައިވެރިވާ ފަރާތްތައް ތިބޭނީ އެއީ ކޮންބައެއްކަން އެނގޭނޭ ފަދަގޮތަކަށް ޚާއްސަ ހެދުމެއްގައި ކަމަށެވެ.
"އަޅުގަނޑުމެންގެ ޓީމުތައް ގޭގެއަށް ދާއިރު ތިބޭނީ، ހަމައެއީ ކޮންބައެއްކަން އެނގޭނޭ ގޮތަށް، ޚާއްސަ ޓީޝާޓެއް ލައިގެން، ކަރުގައި އެޗްޑީސީން ފޯރުކޮށްދޭ ޚާއްސަ ފާހެއްވެސް އަޅައިގެން."
އޭނާ ވިދާޅުވީ، ހުޅުމާލޭގައި ދިރިއުޅޭ ހުރިހާ ފަރާތްތަކަކުންވެސް ހާލު ސާވޭގައި ބައިވެރިވެ، ސައްހަ މައުލޫމާތު ދިނުމަކީ ވަރަށް ބޮޑަށް އެދޭކަމެއް ކަމަށެވެ.
މިފަދަ ސާރވޭއެއްގެ އަސްލު މަގުސަދަކީ، ލިބޭ މައުލޫމާތުތައް ދިރާސާކޮށް، ހުޅުމާލޭގައި ކުރިއަށް ހުރި ތަރައްގީގެ ކަންކަމުގައިވެސް އަދި ސަރުކާރުގެ މުއައްސަސާތަކުން ދޭ ޚިދުމަތްތަކުގެ ފެންވަރު ރަނގަޅުކުރުމަށްވެސް މި މައުލޫމާތުތައް ބޭނުންކުރުން ކަމަށެވެ.