06 Sep 2017, 13:46
ކޮންޑެ ނާސްޓް ޓްރެވަލާ މަޖައްލާއިންދޭ "ދަ އައިލެންޑް ވިތް ދަ ބެސްޓް ޕްލޭސް ޓު ސްޓޭ"ގެ އެވޯޑް ރާއްޖެ އަށް ލިބިއްޖެ އެވެ.
ސެޕްޓެންބަރު މަހުގެ ހަތަރު ވަނަ ދުވަހު ލަންޑަންގެ ހަމް ޔާޑް ހޮޓެލްގައި ބޭއްވި ރަސްމިއްޔާތުގައި ރާއްޖެއިން އެ އެވޯޑާ ހަވާލުވެވަޑައިގަތީ ރާއްޖެއިން ލަންޑަނަން ކަނޑައަޅާފައިވާ ސަފީރު އަހުމަދު ޝިއާން އެވެ.
އެ އެވޯޑް ލިބުމާ ގުޅިގެން އަހުމަދު ޝިއާން ވިދާޅުވީ، ކޮންޑެ ނާސްޓް ޓްރެވަލާގެ ކިއުންތެރިންގެ މަގުބޫލުކަމުން ރާއްޖެ އަށް އެ އެވޯޑް ލިބުން އެއީ ލިބިގެންދާ ވަރަށް ބޮޑު ޝަރަފެއް ކަމަށެވެ.
"ކޮންޑެ ނާސްޓް ޓްރެވަލާ"ގެ ކިއުންތެރިންގެ ހާއްސަ އެވޯޑެއް ރާއްޖެއަށް ލިބުނު އިރު، އެ މަޖައްލާ އިން ފާހަގަ ކުރާ "ބެސްޓް ހޮލިޑޭ ހޮޓެލް" އަދި "ބެސްޓް ހޮޓެލް ސްޕާ"ގައި ރާއްޖޭގެ ހޮޓަލްތައް ވަނީ އެންމެ މަގުބޫލް 10 ތަންތަނުގެ ތެރޭގައި ހިމެނިފަ އެވެ.
މި އެވޯޑާ ބެހޭ ގޮތުން ޓޫރިޒަމް މިނިސްޓަރު މޫސާ ޒަމީރު ވިދާޅުވީ އިނިގޭސިވިލާތަކީ ރާއްޖޭގެ ފަތުރުވެރިކަމުގެ ދާއިރާއަށް މުހިންމު މާކެޓެއް ކަމަށެވެ. އަދި އިނގިރޭސި ވިލާތް ފަދަ މުހިއްމު މާކެޓަކުން އެފަދަ އެވޯޑެއް ލިބުން އެއީ ވަރަށްބޮޑު ކާމިޔާބީއެއް ކަމަށެވެ.
މި އަހަރުގެ މިހާތަނަށް އިނގިރޭސިވިލާތުން 51،737 ފަތުރުވެރިން ރާއްޖެ ޒިޔާރަތް ކޮށްފައިވާ އިރު އިނިގޭސިވިލާތަކީ ރާއްޖެއަށް އެންމެ ގިނައިން ޓޫރިސްޓުން އަންނަ 10 ގައުމުގެ ތެރޭގައި ހިމެނޭ އެއް ގައުމެވެ.
"ކޮންޑެ ނާސްޓް ޓްރެވަލާ" މަޖައްލާއަކީ އިގިރޭސި ވިލާތުގެ މަޖައްލާއެކެވެ. މި މަޖައްލާ އަކީ ފަތުރުވެރިކަމުގެ ދާއިރާ ގައި އެންމެ ފާހަގަ ކޮށްލެވޭ އެއް މަޖައްލާ އެވެ. މި މަޖައްލާގެ ކިއުންތެރިންގެ އަދަދު 1.3 މިލިއަނަށް އަރަ އެވެ.
މި މަޖައްލާގެ އެވޯޑުތައް މީގެ ކުރީގައިވެސް ރާއްޖެއަށް ވަނީ ލިބިފަ އެވެ. މިދިޔަ އަހަރު މި އެވޯޑު ރާއްޖޭގެ ތިން ރިސޯޓަކަށް ވަނީ ލިބިފަ އެވެ.