30 Aug 2017, 17:17
ޝަރުއީ ދާއިރާގައި ހުރި ކަންބޮޑުވުންތައް ފާހަގަކޮށް 56 ގާނޫނީ ވަކީލަކު ސުޕްރީމް ކޯޓަށް މިއަދު ހުށަހެޅި އިލްތިމާސް އެ ކޯޓުން ބަލައެއް ނުގަތެވެ.
މިއަދު މެންރުފަހު 1:15 އެހައިކަންހާއިރު، އެ އިލްތިމާސް ލިޔުމުން ސުޕްރީމް ކޯޓަށް ހުށަހެޅުމަށް ވަޑައިގަތީ 20 ވަކީލެކެވެ. އެކަމުގައި އިސްކޮށް ހަރަކާތްތެރިވެފައި ވަނީ ކުރީގެ ބަންޑާރަ ނައިބު ހުސްނުއް ސުއޫދު އާއި ގާނޫނީ ވަކީލު މަހުފޫޒު ސައީދު އަދި ގާނޫނީ ވަކީލު މޫސާ ސިރާޖެވެ.
ސުޕްރީމް ކޯޓުން ނުކުމެވަޑައިގެން ނޫސްވެރިންނަށް މައުލޫމާތު ދެއްވަމުން ގާނޫނީ ވަކީލު ސިރާޖު ވިދާޅުވީ އެ އިލްތިމާސް ބަލައި ނުގަނެވޭނެ ކަމަށް އެންގެވީ ރަޖިސްޓްރާގެ މަސްއޫލިއްޔަތާ ހަވާލުވެ ހުންނެވި ފާތުމަތު ޔުމްނާ ކަމަށެވެ.
ހުށަހެޅި އިލްތިމާސްތައް
ޝަރިއަތްކުރާގޮތުގައި ހުރި ކަންބޮޑުވުންތައް
- ޓެރަރިޒަމްގެ ގާނޫނަށް ނުފެތޭ ގޮތަށް ޓެރަރިޒަމްގެ ދައުވާކުރުން
- މުއްދަތު ޖެހުމުގައި ހަމައެއް ލަމައެއް ނެތުން
- ޣައިރު ހާޒިރުގައި ހުކުމްކުރުން
- ސިއްރުން ހެކިބަސް ނެގުން
- ފަނޑިޔާރުންގެ ސުލޫކީ މައްސަލަތައް
- ވަކީލުންގެ ކަންކަމާ ސުޕްރީމް ކޯޓުން ހަވާލުވުން
- ގާނޫނު އަސާސީން ލިބިދީފައިވާ ބާރުތަކުގެ ބޭރުން ސުޕްރީމް ކޯޓުން އަމަލުކުރުން
- އެއް ފަނޑިޔާރުގެ މަސައްކަތައް އަނެއް ފަނޑިޔާރުން ނުފޫޒު ފޯރުވުން
- ތުހުމަތުގައި ބައްދުކުރެވޭ ފަރާތްތަކުގެ ހައްގުތައް
- ސަބަބެއް އެންގުމެއްނެތި ވަކީލުންނަށް ފިޔަވަޅު އެޅުން
- ޖޭއެސްސީ ހިނގުމުގައި ހަމައެއް ލަމައެއް ނެތުން
- ބަންޑާރަ ނައިބާއި ޕްރޮސިކިއުޓާ ޖެނެރަލް ގާނޫނާ އެއްގޮތަށް މަސްއޫލިއްޔަތު އަދާނުކުރާ މައްސަލަ
ގާނޫނީ ވަކީލު މަހުފޫޒު ސަައީދު ވިދާޅުވީ މިއަދު އިލްތިމާސްތައް މިއަދު ބަލައިނުގަތަސް އެ މަސައްކަތް ނުހުއްޓޭނެ ކަމަށާއި ސުޕްރީމް ކޯޓަށް އިލްތިމާސް ހުށަހެޅުމުގެ މަސައްކަތް އަދިވެސް ކުރިއަށްދާނެ ކަމަށެވެ.
"އިރާދަކުރެއްވިއްޔާ މިއީ ހުއްޓުމެނެތި އަޅުގަނޑުމެން ކުރިއަށްގެންދާނެ ކަމެއް. ދިވެހިރާއްޖޭގެ ޖުޑީޝަރީގައި މި ހިނގާ ކަންކަން ޖެހޭނީ އިސްލާހުވާން،" މަހުފޫޒު ވިދާޅުވިއެވެ.
އޭނާ ވިދާޅުވީ ޝަރުއީ ދާއިރާގައި ހުރި މައްސަލަތައް ހައްލުކުރުމަށް ވަކީލުންގެ ފަރާތުން އެއްބާރުލުން ދޭނެ ކަމަށެވެ.
ޝަރުއީ ދާއިރާގައި ހުރި މައްސަލަތަކާ މެދު ކެރިގެން ވާހަކަދެއްކޭނެ މާހައުލެއް ގާއިމް ކުރުމުގެ މަސައްކަތް ވެސް ކުރައްވާނެ ކަމަށް މަހުފޫޒު ވިދާޅުވިއެވެ.
އިލްތިމާސް ހުށަހެޅުއްވުމަށްޓަކައި ގާނޫނީ ވަކީލުން ސުޕްރީމް ކޯޓަށް ވަޑައިގަންނަވަނީ --- ސަން ފޮޓޯ: ފަޔާޒު މޫސާ
ކުރީގެ ބަންޑާރަ ނައިބު ހުސްނުއް ސުއޫދު ވިދާޅުވީ "ދުސްތޫރީ ފަސާނާ" ގެ ނަމުގައި ޝަރުއީ ދާއިރާއާ މެދު އާންމުން ހޭލުންތެރިކުރުމުގެ ޕްރޮގްރާމެއް ހިންގަން ނިންމާފައިވާ ކަމަށެވެ. ޝަރުއީ ދާއިރާގައި ހުރި މައްސަލަތައް ހައްލުވަންދެން އެ ޕްރޮގްރާމް ކުރިއަށްދާނެ ކަމަށް ވެސް ސުއޫދު ވިދާޅުވިއެވެ.