30 Aug 2017, 15:09
ވޮޝިންޓަން (އޮގަސްޓް 30): އެމެރިކާގެ ރައީސް ޑޮނަލްޑް ޓްރަމްޕް ވެރިކަން ކުރައްވާ ގޮތް ކަމުދަނީ އެމެރިކާގެ އާބާދީގެ 16 ޕަސެންޓަށް ކަމަށް ޕިއު ރިސާޗް ސެންޓަރުން ނެގި ހިޔާލު ހޯދުމުގެ ވޯޓަކުން ދައްކައިފި އެވެ.
އެމެރިކާގައި ވޯޓު ދިނުމުގެ ހައްގު ލިބިގެންވާ 1،893 މީހުން ބައިވެރިވި، އަދި މިމަހުގެ 15 އިން 21 އަށް ކުރިއަށް ގެންދިޔަ އެވޯޓުގައި ވަނީ ޓްރަމްޕް ވެރިކަން ކުރައްވާ ގޮތް "ކަމުދޭ" ނުވަތަ "ކަމަކުނުދޭ" ނުވަތަ "ދެ ހިޔާލެއްގައި" ތިބި ކަމަށް ވޯޓު ލާން ފުރުސަތު ދީފަ އެވެ.
ވެރިކަން ކުރާ ރިޕަބްލިކަން ޕާޓީ އާއި އިދިކޮޅު ޑިމޮކްރެޓިކް ޕާޓީއަށް ތާއިދު ކުރާ މީހުން ހިމަނައިގެން ނެގި ވޯޓުން ދެއްކި ގޮތުގައި އޭގެ ތެރެއިން 58 ޕަސެންޓް މީހުންނަށް ޓްރަމްޕް ވެރިކަން ކުރައްވާ ގޮތް ކަމަކު ނުދެ އެވެ. އަދި ރައީސް ވެރިކަން ކުރައްވާ ގޮތާ މެދު ދެ ހިޔާލެއްގައި ތިބި ކަމަށް 25 ޕަސެންޓް މީހުން ބުނި އިރު، 16 ޕަސެންޓް މީހުން ވަނީ ކަމުދާ ކަމަށް ބުނެފަ އެވެ.
މީގެ އިތުރުން ހަމައެކަނި ރިޕަބްލިކަން ޕާޓީއަށް ތާއިދު ކުރާ ފަރާތްތަކުގެ ވޯޓުން ދެއްކި ގޮތުގައި ޓްރަމްޕް ވެރިކަން ކުރައްވާ ގޮތް ކަމުދަނީ އޭގެ ތެރެއިން 34 ޕަސެންޓް މީހުންނަށެވެ. އަދި ޓްރަމްޕް ވެރިކަން ކުރައްވާ ގޮތާ މެދު ދެ ހިޔާލެއްގައި ތިބި ކަމަށް 46 ޕަސެންޓް މީހުން ބުނި އިރު 19 ޕަސެެންޓް މީހުން ވަނީ ރައީސް ވެރިކަން ކުރައްވާ ގޮތް ކަމުދާ ކަމަށް ބުނެފަ އެވެ.
އެއާ އަޅާ ބަލާއިރު ޑިމޮކްރެޓިކް ޕާޓީއަށް ތާއިދު ކުރާ 89 ޕަސެންޓް މީހުން ވަނީ ރައީސް ޓްރަމްޕް ވެރިކަން ކުރައްވާ ގޮތް ކަމުނުދާ ކަމަށް ބުނެފަ އެވެ. އަދި އެކަމާ ބެހޭ ގޮތުން ދެ ހިޔާލެއްގައިވާ ކަމަށާއި، ރައީސް ވެރިކަން ކުރައްވާ ގޮތް ކަމުދާ ކަމަށް ބުނީ އެންމެ 10 ޕަސެންޓް މީހުންނެވެ.
މީގެ ކުރިން ޖުލައި މަހު ވޮޝިންޓަން ޕޯސްޓާއި އޭބީސީ ނިއުސްއިން ކުރިއަށް ގެންދިޔަ ހިޔާލު ހޯދުމުގެ ވޯޓަކުން ދެއްކި ގޮތުގައި ޓްރަމްޕް އަމަލު ކުރައްވަނީ ރައީސަކު އަމަލު ކުރައްވަން ޖެހޭ ގޮތާ ހިލާފަށް ކަމަށް އެމެރިކާގެ އާބާދީގެ 70 ޕަސެންޓް މީހުން ދެކެ އެވެ. އަދި ޓްރަމްޕް އަމަލު ކުރައްވާ ގޮތް ރަނގަޅު ކަމަށް ވޯޓު ދީފައި ވަނީ 24 ޕަސެންޓް މީހުންނެވެ.
މައުލޫމާތު: ވޮޝިންގްޓަން ޕޯސްޓް