27 Aug 2017, 13:50
މެންޗެސްޓަ ސިޓީގެ ފޯވާޑް ސާޖިއޯ އަގުއޭރޯ ބޯންމައުތު ދަނޑުގެ ސެކިއުރިޓީ ގާޑެއްގެ ގައިގައި ޖެހި ކަމަށް ބުނާ މައްސަލައެއް ނުބަލަން ނިންމައިފި އެވެ.
އިނގިރޭސި ޕްރިމިއާ ލީގުގައި ބޯންމައުތުގެ މައްޗަށް 1-2 އިން ކުރި ހޯދި މެޗުގައި ސިޓީގެ ރަހީމް ސްޓާލިން 97 ވަނަ މިނެޓުގައި އެ ޓީމަށް މޮޅުކޮށްދިން ލަނޑު ޖެހުމަށް ފަހު އުފާފާޅު ކުރުމުގެ ތެރޭގައި ސަޕޯޓަރުނާއި ކުޅުންތެރިން ކައިރިވުން ހިފަހައްޓަން މަސައްކަތް ކުރި ސެކިއުރިޓީ ގާޑެއްގައި ގައިގައި އަގުއޭރޯ ޖެހި ކަމަށް ބޯންމައުތުން ވަނީ ތުހުމަތު ކޮށްފަ އެވެ.
މިއާއެކު ފުލުހުން ވަނީ ޖެހި ކަމަށް ބުނާ ސެކިއުރިޓީ އޮފިޝަލުގެ ބަޔާން ވެސް ނަގައިފަ އެވެ. ނަމަވެސް އަގުއޭރޯ ބުނީ އޭނާ އަށް ކުރާ ތުހުމަތުތަކަކީ ނުރަނގަޅު ތުހުމަތުތަކެއް ކަމަށާއި އޭނާ އެއްވެސް އޮފިޝަލެއްގެ ގައިގައި ޖަހާފައި ނުވާނެ ކަމަށެވެ.
"އަހަރެން އެއްވެސް މީހެއްގެ ގައިގައި ނުޖަހަން. ތުހުމަތު ތަކުގައި އެއްވެސް ހަގީގަތެއް ނެތް. އެކަން ރެކޯޑު ކުރެވިފައިވާ ވީޑިއޯތައް ބެލީމަ ސާބިތުވެގެން ދާނެ،" އަގުއޭރޯ އޭނާގެ ޓުވިޓާގައި ލިޔެފައިވެ އެވެ.
ސިޓީ އިން އެ ވީޑިއޯތައް ބެލުމަށް ފަހު އަގުއޭރޯގެ އެއްވެސް ކުށެއް ނެތް ކަމަށް ވަނީ ބުނެފަ އެވެ. އަދި އޭގެ މާ ގިނަ އިރުތަކެއް ނުވަނީސް ބޯންމައުތުން ވަނީ މައްސަލަ އަނބުރާ ގެންގޮސްފައިވާ ކަމަށް އަންގައިފަ އެވެ.