26 Aug 2017, 12:05
ރ. މާކުރަތުގެ ގެއެއްގައި ބަޔަކު ފޮރުވައިގެން ގެންގުޅުނު ކުދި ވެލާތަކެއް ފުލުހުންނާއި އީޕީއޭ ގުޅިގެން ހޯދައި މޫދަށް ދޫކޮށްލައިފި އެވެ.
އީޕީއޭ އިން ބުރާސްފަތި ދުވަހު ނެރުނު ބަޔާނެއްގައި ބުނެފައި ވަނީ މާކުރަތުގެ ގެއެއްގެ ތެރޭގައި ވެލާތަކެއް ގެންގުޅޭ ކަމުގެ މައުލޫމާތު މިދިޔަ ބުދަ ދުވަހު ލިބިގެން ބަލައި ފާސްކުރި އިރު ކުދި 11 ވެލާ ފެނިފައިވާ ކަމަށެެވެ. އަދި އެ ވެލާތައް ސަލާމަތްކޮށް މިހާރު ދޫކޮށްލާފައިވާ ކަމަށް އީޕީއޭ އިން ބުންޏެވެ.
މާކުރަތުގެ ގެއެއްގެ ތެރޭން ފެނުނު ވެލާތައް --- ފޮޓޯ/ އީޕީއޭ
އަދި ތިމާވެއްޓަށްދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ މަސައްކަތް ފުލުހުންނާއި އީޕީއޭ އިން ކުރަމުންދާ ކަމަށް ބަޔާނުގައި ވަނީ ބުނެފަ އެވެ.
ވެލާ ކަހަނބަކީ ގާނޫނުން ހިމާޔަތް ލިބިދީފައިވާ ތަކެއްޗެވެ. އެގޮތުން އެތަކެތި ހިފައި ގެންގުޅުމާއި ބިސް ނެގުމާއި އެއްވެސް ގޯނާއެއް ކުރުމަކީ މަނާ ކަމެކެވެ.