24 Aug 2017, 13:47
ހައުސިން ޑިވެލޮޕްމަންޓް ފައިނޭސް ކޯޕަރޭޝަން (އެޗްޑީއެފްސީ) އިން އިސްލާމީ އުސޫލުތަކާ އެއްގޮތަށް ރައްޔިތުންނަށް ހަލާލު ގޮތުގައި އިންވެސްޓް ކުރުމަށް ހިންގާ ސުކޫކް އިންވެސްޓްމަންޓްގެ ސުކޫކު ވިއްކަން ފަށައިފި އެވެ.
މިއަދު އެޗްޑީއެފްސީގެ ބޯޑްރޫމުގައި ނޫސްވެރިންނާ ވާހަކަދައްކަވަމުން ހެޑް އޮފް ޑިޕޮސިޓަރީ މުޖުތަބާ މޫސާ ވިދާޅުވީ މިއަދުން ފެށިގެން އޮކްޓޯބަރު 18 ވަނަ ދުހުވަހާ ހަމައަށް ސުކޫކް ވިއްކުން ކުރިޔަށް ދާނެ ކަމަށެވެ. ސުކޫކް ވިއްކަން ހަމަޖެހިފައި ވަނީ 1000 ރުފިޔާ އަށެވެ. އަދި މި އިންވެސްޓްމެންޓުގެ މުއްދަތަކީ 10 އަހަރު ދުވަހެވެ. މި މުއްދަތުގެ ތެރޭގައި އަހަރަކު ދެފަހަރު ފައިދާގެ 65 ޕަސެންޓް ބަހާނެ ކަމަށް އެޗްޑީއެފްސީ އިން ބުންޏެވެ.
ސުކޫކް ގަތުމުގެ އެޕްލިކޭޝަން ފޯމް ރާއްޖޭގެ ހުރިހާ ޕޯސްޓް އޮފީސްގެ ބްރާންޗް ތަކުން، މޯލްޑިވްސް ސެކިއުރިޓީ ޑިޕޮސިޓްރީ، ސްޓޮކް ބްރޯކާސް މޯލްޑިވްސް، އާރިޔާ ސެކިއުރިޓީ، އެޗްޑީއެފްސީގެ ބްރާންޗްތަކުން އަދި އިސްލާމިކްގެ ބްރާންޗްތަކުން ވެސް ލިބެން ހުންނާނެ ކަމަށް ވެސް މުޖުތަބާ ވިދާޅުވި އެވެ.
އެޗްޑީއެފްސީގެ އިސްލާމިކް ޝަރިއާގެ ހެޑް ޑރ. އިބްރާހިމް ޒަކަރިއްޔާ ވިދާޅުވީ ސުކޫކަކީ ގަންނަ ސުކޫކަކާއި އެއްވަރުގެ ހިއްސާއެއް ކޮންމެސް ހަރުމުދަލެއްގައި އޮތްކަން އަންގައިދޭ ސެޓްފިކެޓެއް ކަމަށެވެ. އަދި އެޗްޑީއެފްސީ އަމްނާގެ ސުކޫކަކީ މިހާރު ދިވެހި ރާއްޖޭގައި އޮތް އެންމެ ފައިދާބޮޑު އިންވެސްޓްމެންޓް ކަމަށް ވެސް ޑރ. އިބްރާހިމް ވިދާޅުވި އެވެ.
އެޗްޑީއެފްސީ އަމްނާގެ ސުކޫކަކި އިސްލާމީ އުސޫލުތަކުން މާލީ ފަންޑެއް އުފެއްދުމުގެ މަސައްކަތްތަކުގެ ތެރެއިން ދެފަރާތަށް ވެސް ފައިދާވާނެ ގޮތަކަށް ކުރިޔަށް ގެންދެވޭ ކަމެއްކަމުގައި ޑރ. އިބްރާހިމް ވިދާޅުވި އެވެ.
"ކޮންމެ ހަތަރު މަހަކުން ޝަރީއާ ބޯޑުން ހުރިހާ މުއާމަލާތްތަކެއް ހިނގާފައި ވަނީ ޝަރީއަތުގެ ހަމަތަކާ އެއްގޮތަށްތޯ ބަލައި އޮޑިޓް ކުރެވިގެންދާނެ. އެހެންކަމުން ސުކޫކް ގަނެވިއްކުމުގެ މުއާމަލާތަކީ އިސްލާމީ އުސޫލުތަކުގެ މަތިން ކުރިޔަށްގެންދާ ހަލާލް މަސެއްކަތެއް." ޑރ. އިބްރާހިމް ވިދާޅުވި އެވެ.
ދެހާސް ތޭރަ ވަނަ އަހަރު އެޗްޑީއެފްސީ އިން 45123 ޞުކޫކް ވިއްކާފައިވާ އިރު، 467 ފަރާތަކުން ވަނީ ސްކޫކް ގަނެފަ އެވެ. މިއީ ރާއްޖޭގައި ސުކޫކް ވިއްކި ފުރަތަމަ ފަހަރެވެ.