23 Aug 2017, 16:54
ކެޕިޓަލް މާކެޓް ޑިވެލޮމްމަޓް އޮތޯރިޓީ (ސީއެމްޑީއޭ) އިން ވުމެން އޮން ބޯޑްސް (ވޮބް)އާ ގުޅިގެން ރާއްޖެގެ ޑައިރެކްޓާސް ޓްރެއިން ޕްރޮގްރާމެއް ފަށައިގެން ކުރިއަށް އެބަގެންދެއެވެ.
އޯގަސްޓް 22 ން 24 އަށް ސްޓެލްކޯގެ ޓްރެއިނިންގ ހޯލްގައި ތިން ދުވަހުގެ މުއްދަތަށް ކުރިއަށް ގެންދާ މި ޕްރޮގްރާމްގެ މައިގަނޑު މަގްސަދަކީ ކުންފުނިތަކުގެ ޑައިރެކްޓަރުންނަށް ކޮންމެހެން އިނގެންޖެހޭ މައުލޫމާތުތަށް ހިއްސާކުރުން ކަމުގައި ސީއެމްޑިއޭގެ އެޑިއުކޭޝަން އެންޑް ޓްރޭނިންގެ ހެޑް، އަބްދުﷲ ޒަކަރިއްޔާ ވިދާޅުވިއެވެ.
މި ތަމްރީން ޕްރޮގްރާމުގައި 21 ފަރާތަކުން ބައިވެރިވާއިރު އެފަރާތްތަކަށް ކިޔަވައިދެއްވާނީ، ކޯޕަރޭޓް ގަވާނަންސް، ޓެކްސޭޝަން އަދި އޮޑިޓްގެ ދާއިރާގައި ތަޖުރިބާކާރު ބޭފުޅުންނެވެ.
މި ޕްރޮގްރާމުގެ ބައިވެރީން ތަމްރީން ކުރެވިގެންދާ ދާއިރާތަކުގެތެރޭގައި، ޑައިރެކްޓަރުންގެ އަހުލާގީ މިންގަނޑު، މާލީ ހިސާބުތަށް، ކޮރަޕްޝަން ދެނެގަނެ އެއަށް އަމަލު ކުރުން، ޓެކުހަށް ހޭލުންތެރިކުރުވުން ހިމެނޭކަމަށް އަބްދުﷲ ވިދާޅުވިއެވެ.
"ބޯޑެއްގެ ޑައިރެކްޓަރުންނަކީ އާންމުކޮށް ކޮންމެސް އެއް ދާއިރާއަކުން ތައުލީމް ހާސިލް ކޮށްފައިވާ ބޭފުޅުން. ޑައިރެކްޓަރުންނަށް އެހެން ދާއިރާތަކުގެ މައުލޫމާތު އެނގުނީމަ ވިޔަފާރިއެއް ހިންގާ ގޮތުގެ ކަންތަށްތަކާއި އެކަން ކަމަށް ގޮތް ނިންމައި ފާޑުކިޔޭނީ" އަބްދުﷲ ވިދާޅުވިއެވެ.
އޭނާ ފާހަގަކުރެއްވި ގޮތުގައި، ދުރު މުސްތަގްބަލަކަށް ބަލާއިރު މިފަދަ ތަމްރީން ޕްރޮގްރާމް ތަކުގެ ސަބަބުން ރާއްޖޭގައި ތިބި ޑައިރެކްޓަރުންނަކީ ހިއްސާދާރުންނަށް އެންމެ ރަންގަޅަށް ފައިދާ ވާނެ ގޮތަކަށް ކުންފުނީގެ ކަންތަށް ބަށްޓަން ކުރާނެ ބަޔަކަށްވެގެންދާނެއެވެ. މީގެ އިތުރުން ދެފުށް ފެންނަ ނިޒާމެއްގެ ދަށުން ކޮންޓްރޯލްކޮށް ކުންފުނިތަށް ހިންގިގެންދާންކަމަށް ވެސް އަބްދުﷲ ވިދާޅުވިއެވެ.
މި ފަހަރުގެ މި ތަމްރީން ޕްރޮގްރާމުގައި އަންހެނުންނަށް އިސްކަންދީފައިވާކަމަށް އަބްދުﷲ ވިދާޅުވިއެވެ.
މި ތަމްރީން ޕްރޮގްރާމް ކުރިޔަށް ގެންދިއުމުގައި އެންޓި ކޮރަޕްޝަން ކޮމިޝަން، މިރާ، ޕީސީބީ، އަދި އޮޑިޓް އޮފީހުގެ އެހީތެރިކަން ލިބެމުންދާކަން އަބްދުﷲ ފާހަގަ ކުރެއްވިއެވެ.