09 Aug 2017, 14:58
އަމިއްލަ މެމްބަރެއް ގޮތުގައި މަޖިލީހަށް އިންތިހާބުވި ނަމަވެސް ސުޕްރީމް ކޯޓުން ހުކުމް ކުރި އިރު، ހުރި ޕާޓީން ވަކިވެއްޖެ ނަމަ މެމްބަރު ކަމުގެ ގޮނޑި ގެއްލޭނެ ކަމަށް ދައުލަތުން ބުނެފިއެވެ.
މަޖިލީހުގެ ދިއްދޫ ދާއިރާގެ މެމްބަރު އަބްދުލްލަތީފު މުހައްމަދު މެމްބަރު ކަމުގެ ގޮނޑި ނުގެއްލޭ ކަމަށް ކަނޑައަޅައި ދިނުމަށް އެދި ސުޕްރީމް ކޯޓަށް ވަނީ ހުށަހަޅައިފައެވެ. އެމައްސަލައިގެން އަޑުއެހުމުގައި ލަތީފުގެ ވަކީލު ހިސާން ހުސައިން ވިދާޅުވީ ލަތީފު މަޖިލީހަށް އިންތިހާބުވީ އަމިއްލަ މެމްބަރެއްގެ ގޮތުގައި ކަމަށެވެ.
އަދި އަމިއްލަ ގޮތުން ހޮވުނު މެމްބަރެއްގެ ގޮތުގައި ހުރެ ޕީޕީއެމަށް ބަދަލުވި ނަމަވެސް ސުޕްރީމް ކޯޓުން ހުކުމް ކުރުމުގެ ކުރިން އެ ޕާޓީން ވަކިވެފައިވާ ކަމަށެވެ.
ދައުލަތުން ބުނީ ލަތީފު އަމިއްލަ ގޮތުން އިންތިހާބުވި ނަމަވެސް ސުޕްރީމް ކޯޓުން ހުކުމް ކުރި އިރު އޭނާއަކީ ޕީޕީއެމް މެމްބަރެއް ކަމަށާއި އޭނާ ޕާޓީން ވަކިކުރީ ހުކުމުގެ ފަހުން ކަމަށެވެ.
އެހެންކަމުން ލަތީފުގެ މައްޗަށް ސުޕްރީމް ކޯޓުގެ ހުކުމް ހިނގާނެ ކަމަށް ދައުލަތުން ބުންޏެވެ. ދައުލަތުން ބުނީ ސުޕްރީމް ކޯޓުގެ މަގްސަދަކީ ޕާޓީ ބަދަލުކުރުމުގެ ކަންކަން ހަމައަކަށް އެޅުވުން ކަމަށެވެ.
ސުޕްރީމް ކޯޓުން ކޮށްފައިވާ ހުކުމުގައި ބުނެފައިވަނީ މަޖިލީހުގެ މެމްބަރަކު އިންތިހާބުވި ޕާޓީ ނޫން އެހެން ޕާޓީއަކަށް ބަދަލު ވުމުން ނުވަތަ އިންތިހާބުވި ޕާޓީން ވަކިވުމުން ނުވަތަ އިންތިހާބުވި ޕާޓީން ވަކިކުރުމުން މެމްބަރުކަމުގެ ގޮނޑި ގެއްލޭނެ ކަމަށެވެ.