06 Aug 2017, 14:30
އުރީދޫ މޯލްޑިވްސް ޕލކއިން ހިންގި އިނީޝަލް ޕަބްލިކް އޮަފަރިންގްގައި ވިއްކި ހިއްސާތައް އެކަށައެޅުމަށްފަހު، މޯލްޑިވްސް ސެކިއުރިޓީޒް ޑިޕޮސިޓަރީގައި ހިއްސާދާރުންނަށް ހުޅުވާފައިވާ އެކައުންޓްތަކަށް ހިއްސާ ޖަމާކޮށްފިއެވެ.
މިއަހަރުގެ އޭޕްރިލް މަހުގެ ފަހުކޮޅުން ފެށިގެން މެއި މަހުގެ 29 އާ ހަމައަށް ކުރިޔަށް ގެންދިޔަ އުރީދޫގެ އައިޕީއޯގެ ތެރެއިން 8،219 ހިއްސާދާރަކަށް، 14،044،870 ހިއްސާ ވިއްކާފައިވެއެވެ. އެއީ އެކުންފުނީގެ ހިއްސާގެ 9.5 ޕަސަންޓެވެ.
އުރީދޫއިން މިއަދު ބުނީ، ހިއްސާތައް އެކަށައެޅުމަށްފަހު، އެ ހިއްސާތައް މޯލްޑިވްސް ސެކިއުރިޓީސް ޑިޕޮސިޓަރީގައި ހުޅުވާފައިވާ ހިއްސާދާރުންގެ އެކައުންޓްތަކަށް ޖަމާކޮށްފައިވާނެ ކަމަށެވެ. އަދި އެކަން ބަޔާންކޮށް، ކޮންމެ ހިއްސާދާރަކަށް ރަސްމީ ލިޔުމެއްވެސް ފޮނުވާފައިވާނެ ކަމަށް އުރީދޫއިން ބުންޏެވެ.
އުރީދޫއިން ބުނީ، ހިއްސާގަތުމަށް އެދުނު ފަރާތްތަކުގެ ތެރެއިން، ފޯމު ބަލައިގަނެ ނަމަވެސް އެކި ސަބަބުތަކާ ހެދި ހިއްސާ އެކަށައަޅައިދީފައި ނުވާ ފަރާތްތަކަށް ފައިސާ ރިފަންޑް ކުރުމުގެ މަސައްކަތް ކުރަމުންދާ ކަމަށާއި، ރިފަންޑް ކުރެވުމުން އެފަރާތްތަކަށް ލިޔުމުން އެކަން އަންގާނެ ކަމަށްވެސް އުރީދޫއިން ބުންޏެވެ.
އުރީދޫއިން މިއަހަރު ހިންގި އައިޕީއޯއަކީ މިހާތަނަށް ރާއްޖޭގައި ހިންގި އެންމެ ބޮޑު އަދި އެންމެ ކާމިޔާބު އައިޕީއޯއެވެ.
އުރީދޫއިން 14 މިލިޔަން ހިއްސާ ވިއްކައިގެން 421،346،100 ރުފިޔާގެ ރައުސުލްމާލެއް ލިބިފައިވެއެވެ.