04 Aug 2017, 21:31

ސަރުކާރަށް ދެކޮޅަށް އަންނަ ކޮންމެ ހަމަލާއަކާ ދެކޮޅަށް، ޕީޕީއެމްގެ އިސް ސަފުން އެންމެ ފުރަތަމަ ތެދުވެވަޑައިގަންނަވާ ބޭފުޅަކީ މަޖިލީހުގެ މެޖޯރިޓީ ލީޑަރު އަހުމަދު ނިހާން ހުސައިން މަނިކެވެ. ނިހާންގެ ޓްވީޓުތަކުން އެކަން ސާފުވެ އެވެ. އިދިކޮޅުން ކުރާ ކޮންމެ ކަމަކަށް ހަލުވި ބާރުމިނުގައި ނިހާން އެ ފޮނުވާލާ "ސިޔާސީ އުންޑަތަކަކީ" އޭނާ ކުރައްވާ ޓުވީޓުތަކެވެ.

ދޫހެލޭ ބޭފުޅުންނާއި ސިޔާސީ ގޮތުން ފުންނާބު އުސް، އަދި ގައުމުގެ ބައެއް ޝަރަފުވެރިން އިދިކޮޅު ފަރާތްތަކާ ގުޅެމުންދާ ދަނޑިވަޅުގައި، ސަރުކާރާއެކު މިވަގުތު ހުންނެވި ނިހާނަކީ ޕީޕީއެމްގައި ހުރި ޕޯޑިއަމަށް އެންމެ ފަރިތަ ބޭފުޅާއެވެ.

މުޅި ރާއްޖެ އެކީއެކަށް މިއޮތީ ރައީސް ޔާމީންގެ ސަރުކާރާ ދެކޮޅަށް. މުޒާހަރާގަ އެންމެން މިތިބީ ނުކުމެ،ނިހާން

މަޖިލީހުގެ މެޖޯރިޓީ ލީޑަރު ނިހާނަކީ ޕޯޑިއަމަކަށް އަރައިވަޑައިގެންފިނަމަ ކުޅަދާނަ ވާހަކަދެއްކުންތެރިއެކެވެ. އަދި ސީދާ، ނުސީދާކޮށް ވެސް އިދިކޮޅު ފަރާތްތަކަށް ރައްދު ދެއްވާ ބޭފުޅެކެވެ. މިއަދު ނިހާނު ކުރެއްވި ޓްވީޓުތަކުން ވެސް އެކަން ފާހަގަވެ އެވެ.

ރާއްޖޭގެ އެކި ހިސާބުތަކުގައި އިދިކޮޅު ފަރާތްތަކުން މިއަދު ކުރި މުޒާހަރާގެ ފޮޓޯ ޖަހައި ކުރެއްވި ޓްވީޓެއްގައި ނިހާނު ވަނީ ނުސީދާކޮށް އިދިކޮޅު ފަރާތްތަކަށް ފާޑުވިދާޅުވެފަ އެވެ. އަދި ހަޖޫޖައްސަވާފަ އެވެ. އެ ޓްވީޓުތަކުގައި ނިހާނު އެ ވިދާޅުވާ އެއްޗެއް ސާފު ވަނީ ބޭނުންކޮށްފައިވާ ހޭޝް ޓެގްގެ ސަބަބުންނެވެ.

"މުޅި ރާއްޖެ އެކީއެކަށް މިއޮތީ ރައީސް ޔާމީންގެ ސަރުކާރާ ދެކޮޅަށް. މުޒާހަރާގަ އެންމެން މިތިބީ ނުކުމެ،" މާލޭގައި ބޭއްވި އެއްވުމުގައި އެމްޑީޕީގެ ނައިބު ރައީސް މުހައްމަދު ޝިފާގު ވާހަކަފުޅު ދައްކަވާ ފޮޓޯއެއް ލެއްވުމަށްފަހު ޓްވީޓު ކުރައްވާފައިވެ އެވެ.

މާތް ކަލާއްކޯ! މުޅި ހުވަދު އަތޮޅު އެއްކޮށް މި އޮތީ މުޒާހަރާގަ، ތިނަދޫގައި. 20،000 މީހުން ވަރު އުޅޭނެ ކަމަށް ވަނީ،ނިހާން

މިއީ ނިހާނު ކުރެއްވި ޓްވީޓުގައި ނިހާނު ވިދާޅުވެފައިވާ ގޮތެވެ.

ހޭޝް ޓެގް ގެ ގޮތުގައި "ދެން އަތް ޖަހާ" ބޭނުންކޮށްފައި ހުރުމުން އެއީ ރައީސް ޔާމީނަށް ތާއިދުކޮށް ޕޯސްޓުކޮށްފައިވާ ޓްވީޓެއްކަން ޔަގީނެވެ. އެ ހޭޝް ޓެގަކީ ރައީސް ޔާމީނަށް ތާއިދުކުރައްވާ ފަރާތްތަކުން ޓްވިޓާގައި ބޭނުން ކުރަމުންދާ ހޭޝް ޓެގެކެވެ.

މާލެ އާއި ގދ. ތިނަދޫ އަދި ގދ. ގައްދޫ، ގއ. ވިލިގިނލި އަދި އައްޑޫ ސިޓީގައި ކުރިއަށް ގެންދިޔަ މުޒާހަރާގައި ބައިވެރިވި މީހުންގެ އަދަދު މަދު ކަން މާނަ ކުރެވޭ ކަހަލަ ގޮތަކަށް ނިހާނު ކުރެއްވި ޓްވީޓުތަކުގައި "ރައީސް ޔާމީނާ ދެކޮޅަށް މުޅި ގައުމު ނުކުމެ އޮތް" ކަމަށާއި އެންމެން ތިބީ މުޒާހަރާގައި ކަމަށް ވިދާޅުވި ނަމަވެސް ޔަގީނުން ވެސް އެއީ އިދިކޮޅު ފަރާތްތަކަށް ތާއިދު ކުރެއްވުމުގެ ގޮތުން ނުވަތަ ނިހާނު ކޮޅު ބަދަލުކޮށްގެން ކުރެއްވި ޓްވީޓެއް ނޫނެވެ.

ނިހާނަކީ ސަރުކާރަށް ތާއިދު ކުރާ ސަރުކާރު ކޯލިޝަނުގައި ހިމެނިވަޑައިގަންނަވާ އެންމެ ވަރުގަދަ އެއް މަޖިލިސް މެމްބަރެވެ. ރައީސް މައުމޫނުގެ ދުވަސްވަރުން ފެށިގެން ވެސް ބަދަލު ނުވެ، ރައީސް ނަޝީދުގެ ވެރިކަން ނިމުމަކަށް އައި މުޒާހަރާތައް ލީޑު ކުރެއްވުމުގައި އެންމެ ހަރަކާތްތެރި އެއް ބޭފުޅަކީވެސް ހަމަ ނިހާނެވެ. އަދި ރައީސް ޔާމީނަށް ވަފާތެރި ބައެއް މެމްބަރުން އިދިކޮޅު ފަރާތްތަކާ ގުޅުމުން އެ މެމްބަރުންނާއި އިދިކޮޅު ފަރާތްތަކަށް ފާޑު ވިދާޅުވުމުގައި ކެރިވަޑައިގެން ޗެލެންޖު ކުރެއްވީ ވެސް ހަމަ ނިހާނެވެ. ނިހާނަކީ ރައީސް ޔާމީން އެންމެ އިތުބާރުފުޅު ކުރައްވާ ބޭފުޅާއޭ ވެސް ކިޔަތެވެ.

ސަރުކާރާއި އިދިކޮޅު ފަރާތްތަކުން ދެކޮޅަށް ދަމައި، ވާން ކުރަމުންދާ ވަލުގައި ކުރިލިބޭ ބައެއް ބަލަން ތިބެމާބަހީ އެވެ. ރިޔާސީ އިންތިހާބުގެ ކައިރިވާ ވަރަކަށް މި ފޯރި ދާނީ ވަރުގަދަވަމުންނެވެ. ރިޔާސީ އިންތިހާބަށް ބާކީ އޮތީ 13 ވަރަކަށް މަހެވެ.