04 Aug 2017, 14:11
އޭސީ މިލާންގެ ގޯލްކީޕަރު ޖިއަންލުއިޖީ ޑޮނަރުއްމާއަށް އެ ކްލަބުގެ ސަޕޯޓަރުން ދިން ތަރުހީބަށް އޭނާ ޝުކުރު އަދާކޮށްފި އެވެ.
މިލާނުގެ ކޮންޓްރެކްޓް އާކުރުމަށް ފަހު އިއްޔެ ވަނީ ފުރަތަމަ ފަހަރަށް ޑޮނަރުއްމާ، މެޗެއްގައި އެ ޓީމުން ފެނިފަ އެވެ. ޔޫރޮޕާ ލީގުގެ ތިން ވަނަ ކޮލިފައިން ބުރުގައި ސީއެސްޔޫ ކްރައިއޯވާ އަތުން 2-0 ލަނޑުގެ ނަތީޖާއަކުން މޮޅުވި ދެވަނަ ލެގު މެޗުގައި މިލާންގެ ގޯލު ބަލަހައްޓާފައި ވަނީ ޑޮނަރުއްމާ އެވެ.
އުމުރުން 18 އަހަރުގެ ޑޮނަރުއްމާ، މިލާނާއެކު ހަދާފައިވާ ކޮންޓްރެކްޓް ނިމުމަކަށް އަންނާތީ އެ ކްލަބުން ކުރިން އޭނާއަށް އާ ކޮންޓްރެކްޓެއް ހުށަހެޅި ނަމަވެސް އޭރު އޭނާ ވަނީ އެ ކޮންޓްރެކްޓްގައި ސޮއި ކުރުމަށް ދެކޮޅު ހަދައިފަ އެވެ. ފަހުން ޑޮނަރުއްމާގެ ކޮންޓްރެކްޓް އާކޮށްފައި ވަނީ އޭނާއަށް އެ ކްލަބުގެ ގިނަ އަދަދެއްގެ ސަޕޯޓަރުންތަކެއް ފާޑުކިޔަމުން ދަނިކޮށެވެ.
އިއްޔެ ކުޅުނު މެޗުގައި ޑޮނަރުއްމާއަށް މިލާނުގެ ސަޕޯޓަރުންގެ ފަރާތުން ބޮޑު ތަރުހީބެއް ލިބިގެންދިޔަ އިރު، އޭނާ ވަނީ އެ މެޗުގައި ރަނގަޅު ކުޅުމެއް ވެސް ދައްކައިފަ އެވެ. އެގޮތުން މެޗުގެ ފުރަތަމަ ހާފުގައި ކްރައިއޯވާގެ އެލެކްސެންޑްރޫ މިޓްރިޓާ ފޮނުވާލި ހަމަލާއެއް ވަރަށް ހުޝިޔާރުކަމާ އެކު ޑޮނަރުއްމާ މަތަކޮށްފައިވެ އެވެ.
"އަހަރެންނަށް ދިން ބޮޑު ތަރުހީބަށް ސަޕޯޓަރުންނަށް ޝުކުރު އަދާކުރަން. އަހަރެންނަށް ކުރިން އެހެން ވާނެ ކަމަށް ހިއެއް ނުކުރަން. އެކަމަކު އަހަރެން ވަރަށް އުފާވެއްޖެ. މި ޖާޒީގައި އަހަރެންގެ އެންމެ ރަނގަޅު ކުޅުން ދެއްކުމަށް ގަދައަޅާ މަސައްކަތްކުރާނަން. އަހަރެންނަށް ސިފަވެގެންދިޔައީ ކުރިން އެއްވެސް ކަމެއް ހިނގާފައިނުވާހެން،" އިއްޔެގެ މެޗަށް ފަހުމިލާން ޓީވީއަށް ދިން އިންޓަވިއުގައި ޑޮނަރުއްމާ ބުންޏެވެ.
ޑޮނަރުއްމާ ބުނީ، އޭނާ އަބަދުވެސް މަސައްކަތްކުރަމުންދަނީ ކުޅުންތެރިންގެ ފަރާތުން ލިބޭ އެހީއެކޭ އެއްގޮތަށް އޭނާގެ ފަރާތުން ވެސް އެހީތެރިކަން ފޯރުކޮށްދިނުމަށް ކަމަށާއި އެ ޓީމުން ދަނީ ގިނަ މަސައްކަތްތަކެއް ކުރަމުން ކަމަށެވެ. އަދި މިލާނާ ގުޅުނު އާ ކުޅުންތެރިންނާ އެކު އާއިލާއެއްގެ ގޮތުގައި ކާމިޔާބު ހޯދޭނެ ކަމަށް ވެސް އޭނާ ބުންޏެވެ.