03 Aug 2017, 16:46
މިދުވަސްވަރު ދުނިޔޭގެ ޓްރާންސްފަރ މާކެޓްގައި ގިނަ ބައެއްގެ ލޯތައް އެފަރާތަކަށް އަމާޒުވެފައިވާ އެންމެ މަޝްހޫރު ކުޅުންތެރިއަކީ ބްރެޒިލްގެ ތަރި ނޭމާއެވެ. ފްރާންސްގެ މުއްސަނދި ކްލަބު ޕެރިސް ސެއިންޓް ޖާމެއިން އިން ބާސެލޯނާގެ ތަރި ޖަހައިގަތުމަށް ދަނީ ވަރުގަދަ "ހަނގުރާމަ"އެއް ކުރަމުންނެވެ. އަދި އެންމެފަހުން ކާމިޔާބުގެ އައްސޭރިއަކާ ހަމައަށްވެސް ވަނީ ވާސިލްވެފައެވެ.
ބާސެލޯނާއަކީ ދުނިޔޭގެ ފުޓްބޯޅައިގެ ބާރަކަށްވެފައި، ދުނިޔޭގެ މުއްސަނދި ކްލަބުތަކުގެ ތެރޭގައި ހިނެނޭ ކްލަބަކަށް ވީ ނަމަވެސް، ފައިސާގެ ގޮތުން ޕީއެސްޖީއާ ވާދަކުރުމުގެ ފެންވަރު އެޓީމުގެ ނެތްކަން ޕީއެސްޖީން ވަނީ ދައްކާލައިފައެވެ. އެގޮތުން، ނޭމާގެ ޓްރާންސްފަރ އެކްޓިވޭޓް ކުރާން ބޭނުންނަމަ، އެކަމުގެ ފީއެއްގެ ގޮތުގައި 222 މިލިއަން ޔޫރޯ ހުށަހެޅުމަށް ބާސާއިން އެދުމުން ޕީއެސްޖީން ވަނީ، ދެވަނަ ވިސްނުމަކަށް ވެސް ނުގޮސް އެ އަދަދު ދޭން އެއްބަސްވެފައެވެ. އެއާއެކު ބާސާއިން ޖެހުނީ ހަތިޔާރު ބަހައްޓައި ޕީއެސްޖީއަށް އަމާން ދޭށެވެ.
ލަ ލީގާގެ ޕްރެޒިޑެންޓް ހާވިއަރ ޓޭބާސް ވިދާޅުވީ، ޕީއެސްޖީން އުޅެނީ ފައިނޭންޝަންލް ފެއަރޕްލޭގެ ރޫލްތަކާ ޚިލާފަށް ކަމަށް - ފޮޓޯ: އޭއެސް
މިހާހިސާބުން ނިމުނީއަކީ ނޫނެވެ. އަނެއްކާވެސް ވަރުގަދަ ކޮޅިގަނޑެއް ނެގީއެވެ. ޕީއެސްޖީއަށް އަސްލު ހަނގުރާމަ އަދި ކިރިޔާ ފެށުނީއެވެ. މިފަހަރު ބާސާއެއް ނޫނެވެ. އެހެން ނަމަވެސް ބާސާ ނިސްބަތްވާ ލީގުން މިވަނީ ނޭމާގެ ޓްރާންސްފަރ ހުއްޓުވައިފައެވެ.
ބާސާއިން ނޭމާ އެހެން ކްލަބަކަށް ބަދަލުވާން ހުއްދަ ދިނުމާއެކު އަންގާރަ ދުވަހު ނޭމާ ވަނީ، އޭނާގެ ޓީމް-މޭޓުންނާއެކު ފެއާވެލް ޕާޓީވެސް ބާއްވައިފައެވެ. އަދި ބާސާއިން ވަނީ، ނޭމާގެ ރިލީޒް ކްލޯސް އެކްޓިވޭޓް ކުރުމަށް ބޭނުންވާ 222 މިލިއަން ޔޫރޯ ޕީއެސްޖީން ދައްކާ ނަމަ އޭނާ އެ ކްލަބު ދޫކޮށް ދިއުމުގެ ހުއްދަ ދީފައިވާ ކަން އިއުލާނުކޮށްފައެވެ.
ނޭމާގެ އޭޖެންޓާއި ޕީއެސްޖީގެ މަންދޫބުން މިއަދު ވަނީ، އުފާވެރި މޫނުތަކަކާއެކު "ފައިސާ ގޯނި" ހިފައިގެން ސްޕެއިންގެ ވެރިރަށް މެޑްރިޑްގައި ހުންނަ ލަ ލީގާގެ އޮފީހަށް ޒިޔާރަތްކޮށްފައެވެ. އެހެން ނަމަވެސް ލަ ލީގާއިން ވަނީ، ޕީއެސްޖީގެ ހުށަހެޅުމަށް ފާޅުގައި ނޫނެކޭ ބުނެފައެވެ.
ބާސެލޯނާގެ ބްރެޒިލް ފޯވާޑް ނޭމާ، މިއާމީގައި އެ ޓީމުގެ ފަރިތަކުރުން ތަކުގެ ތެރޭގައި-- ފޮޓޯ: އީއެފްޕީ/ގެޓީ
ލަ ލީގާގެ ޕްރެޒިޑެންޓް ހާވިއަރ ޓޭބާސް ވިދާޅުވީ، ޓްރާންސްފަރ ކަންތަކުގައި ޔޫރަޕްގެ ފުޓްބޯޅައިގެ މައި އިދާރާ (ޔުއެފާ)އިން ވަރަށް ހަރުދަނާ އުސޫލުތަކެއް ގާއިމުކޮށްފައިވާ ކަމަށާއި، އެގޮތުން ބަލާއިރު ނޭމާގެ ޓްރާންސްފަރ ކަންތަކުގައި ޔުއެފާ ފައިނޭންޝަލް ފެއަރޕްލޭގެ ގަވައިދުތައް މުގުރާލާފައި ނޫނީ ޕީއެސްޖީއަށް އެ ޓްރާންސްފަރ ކާމިޔާބު ކުރެވޭނޭ ކަމަށް ގަބޫލު ނުކުރައްވާ ކަމަށެވެ.
"އެއީ ޝައްކެއްވެސް ނެތްގޮތުގައި މާލީގޮތުން އޮޅުވާލުން، އެއީ އެ ކްލަބަށް ކުރެވޭނޭވަރުގެ ޚަރަދެއް ނޫން،" ޕީއެސްޖީއަށް ޚަރަދުކުރުމަށް އޮތް އޮރިކްސް ގަތަރު ސްޕޯޓްސް އިންވެސްޓްމަންޓްސްއަށް އިޝާރާތްކުރައްވައި ޓެބޭސް ވިދާޅުވިއެވެ.
އޭނާ ވިދާޅުވީ، ދައުލަތްތަކުގެ އެހީގައި ޚަރަދުތައް ބަލަހައްޓަމުންދާ ކްލަބުތަކުން ހިންގާ މިފަދަ ނޭދެވޭ އަމަލުތަކުގެ ސަބަބުން، ޔޫރަޕްގައި ޕްރޮފެޝަނަލް ފުޓްބޯޅައަށް ބޮޑެތި ގޮންޖެހުންތަކެއް ކުރިމަތިވެ، ބައިނަލްއަގްވާމީ ޓްރާންސްފަރ މާކެޓަށް ވެސް އޭގެ ނޭދެވޭ އަސަރު ކުރާނޭ ކަމަށެވެ.
ބާސެލޯނާއިން ވަނީ ނޭމާގެ ރިލީސް ކްލޯސް 222 މިލިއަން ޔޫރޯއަށް ބޮޑުކޮށްފައި -- ފޮޓޯ: ގެޓީ
ނޭމާ ވަނީ، އިތުރު ފަސް އަހަރު ދުވަހުގެ އެއްބަސްވުމެއްގައި ބާސާއާއެކު ސޮއިކޮށްފައެވެ. އެހެންކަމުން އެއްބަސްވުމާ އެއްގޮތަށް އޭނާއަށް ބާސާ ދޫކޮށްލެވޭނީ 2021 ވަނަ އަހަރުއެވެ. އެނޫން ހާލަތެއްގައި ބާސާއިން ނޭމާ "އުފުރާލަން" ބޭނުން ނަމަ ޖެހޭނީ އެ ކްލަބުން ނޭމާގެ "ޕްރައިސް ޓެގް"ގައި އަޅުވާފައިވާ 222 މިލިއަން ޔޫރޯ ދައްކާށެވެ. މިއީ މިހާތަނަށް ދުނިޔޭގެ ފުޓްބޯޅައިގައި ވެވޭ ޓްރާންސްފަރގެ އެންމެ ބޮޑު ވިޔަފާރިއަށް ވެގެންދާނެއެވެ.
ބާސާގެ ޕްރެޒިޑެންޓް ޖޯޒެޕް މަރިއާ ބާޓޮމެއު ވިދާޅުވެފައި ވަނީ އެއްވެސް ގޮތެއް ނެތިގެން ނޫނީ އެ ކްބަލުން ނޭމާ ދޫކޮށް ނުލާނޭ ކަމަށެވެ. އެ ކްލަބުގެ އެންމެ މުހިއްމު އެއް ފޯވާޑް، ގަދަކަމުން ގެންދާން ބޭނުންވާ ކޮންމެ ކްލަބަކުންވެސް، ޔުއެފާގެ ފައިނޭންޝަލް ފެއަރޕްލޭ ގަވާއިދުތައް މުގުރާލަން ޖެހޭނޭ ކަމަށް އޭނާ ވަނީ ވިދާޅުވެފައެވެ.