03 Aug 2017, 13:12
ބަންދުގައި ތިބޭ ރައްޔިތުންގެ މަޖިލީހުގެ މެމްބަރުން މަޖިލީހަށް ހާޒިރުކުރަން ނުޖެހޭނެ ކަމަށް މޯލްޑިވްސް ކަރެކްޝަނަލް ސާވިސް އިން ބުނެފި އެވެ.
ކަރެކްޝަންސް އިން މިއަދު ނެރުނު ބަޔާނެއްގައި ބުނެފައި ވަނީ ތަހުގީގަށް ބަންދުކޮށްފައި ތިބޭ މެމްބަރުންނާއި ބަންދުގައި ތިބޭ މަޖިލިސް މެމްބަރުން މަޖިލީހުގެ ޖަލްސާތަކަށް ހާޒިރުކުރަން ޖެހޭނެ ކަމަށް ބަޔާންކޮށްފައި ވަނީ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނުގައި ކަމަށެވެ. ނަމަވެސް އެ ގާނޫނުގައި އެގޮތަށް ކަނޑައަޅާފައިވާ މާއްދާ ސުޕްރީމް ކޯޓުން ވަނީ ބާތިލުކޮށްފައި ކަމަށް އެ ބަޔާނުގައިވެ އެވެ.
އެހެންކަމުން، ކަންކަމުގެ އަސްލު އޮޅޭ ގޮތަށާއި މުޖްތަމައުގެ އަފްރާދުންގެ މެދުގައި އެ މުއައްސަސާއާ މެދު ނުތަނަވަސްކަން އުފެދިދާނެ ގޮތަކަށް މީޑިއާއިންނާއި ވަކިން ޚާއްސަކޮށް ގާނޫނީ ވަކީލުން މައުލޫމާތު ނުފެތުރުމަށް ކަރެކްޝަންސް އިން ވަނީ އިލްތިމާސްކޮށްފަ އެވެ.
ކަރެކްޝަންސް އިން މިހެން ބުނެފައި ވަނީ ދިއްގަރު ދާއިރާގެ މެމްބަރު އަހުމަދު ފާރިސް މައުމޫން މަޖިލީހުގެ ޖަލްސާތަކަށް ހާޒިރުކޮށްދީފައިނުވާތީ އެކަމާ ގުޅިގެން އޭނާގެ ގާނޫނީ ވަކީލުން ކަންބޮޑުވުންފާޅުކޮށްފައި ވަނިކޮށެވެ.