31 Jul 2017, 15:21
ދިއްލީ (ޖުލައި 31): އިންޑިއާގެ ހުޅަނގަށް ބޯކޮށް ވާރޭ ވެހި ފެންބޮޑުވުމުގެ ސަބަބުން މަރުވި މީހުންގެ އަދަދު 213 އަށް އަރައިފި އެވެ.
ވިއްސާރައިގެ ސަބަބުން އެންމެ ބޮޑަށް ގެއްލުން ލިބުނު ގުޖުރާތު ސްޓޭޓުގެ ސަރުކާރުން ބުނި ގޮތުގައި އެސްޓޭޓުގެ ބައެއް ސަރަހައްދުތަކުން ފެންގަނޑު ހިނދެމުން ދިޔުމުން މަރުވެފައިވާ މީހުންގެ ހަށިތައް ހޯދަން ވަނީ ފަސޭހަ ވެފަ އެވެ. އަދި މީހުން ސަލާމަތް ކުރާ ފަރާތްތަކުން މިހާރު ދަނީ އެއީ ކޮންބައެއްކަން ޔަގީން ކުރުމުގެ މަސައްކަތް ކުރަމުންނެވެ.
ގުޖުރާތުގެ އޮފިޝަލުން ވިދާޅުވި ގޮތުގައި ބިންތިރި ސަރަހައްދުތަކުގައި ދިރިއުޅޭ ގާތްގަނޑަކަށް 130،000 މީހުން މިހާރު ވަނީ ސަލާމަތީ ސަރަހައްދުތަކަށް ބަދަލުކޮށްފަ އެވެ.
އިންޑިއާގެ ބޮޑުވަޒީރު ނަރެންދުރަ މޯދީ ވަނީ ވިއްސާރައިގެ ސަބަބުން މަރުވި މީހުންގެ އާއިލާތަކަށް ދެ ލައްކަ ރުޕީސް (3117 ޑޮލަރު) އާއި އަނިޔާވި ފަރާތްތަކަށް 50،000 ރުޕީސް ދެއްވާނެ ކަމަށް ވިދާޅުވެފަ އެވެ.
ގުޖުރާތުގެ އިތުރުން އަރުނާޗަލް ޕްރަދޭޝް އާއި އައްސާމް އަށް ވެސް ވިއްސާރައިގެ އަސަރުކޮށްފައިވެ އެވެ. އަދި އޭގެ ސަބަބުން އައްސާމުން މަރުވި މީހުންގެ އަދަދު ވަނީ 77 އަށް އަރައިފަ އެވެ. (ގާޑިއަން)