29 Jul 2017, 12:25
ރާއްޖޭގެ މިނިވަން ކަމަށް 52 އަހަރު ފުރުން މެލޭޝިޔާގައި ފާހަގަކޮށްފި އެވެ.
ކުއާލަލަމްޕޫރުގައި ހުންނަ ދިވެހި އެމްބަސީ އިން މިއަދު ނެރުނު ބަޔާނެއްގައި ބުނީ ޖޭޑަބްލިއު މެރިއޮޓް ހޮޓެލްގެ ބޯލްރޫމްގައި އިއްޔެ ބޭއްވި އެ ހަފްލާ ޝަރަފުވެރިކޮށްދެއްވީ މެލޭޝިޔާގެ ސައިންސް، ޓެކްނޮލޮޖީ އެންޑް އިނޮވޭޝަން މިނިސްޓަރުގެ ނާއިބު ދާތުކް ވީރާ ޑރ. އަބޫ ބަކުރު މުހައްމަދު ދިއާ ކަމަށެވެ.
ދިވެހި އެމްބަސީ އިން ބުނީ ވޭތުވެ ދިޔަ ދެ އަހަރު އެ ހަފްލާ ބާއްވާފައި ވަނީ މެލޭޝިޔާގައި ދިރުއުޅޭ ދިވެހިންނަށް އެކަނި ކަމުގައިވީ ނަމަވެސް މި އަހަރުގެ ހަފްލާ ބާއްވާފައި މެލޭޝިޔާގައި ދިރިއުޅޭ ދިވެހިންގެ އިތުރުން ޑިޕްލޮމެޓިކް ކޮމިއުނިޓީ އާއި މެލޭޝިޔާގެ ސަރުކާރުގެ އެކިއެކި ވުޒާރާތަކުގެ އިސްބޭފުޅުންނާ އަދި ވިޔަފާރި ވެރިން ވެސް ދައުވަތުދީގެން އެހެން ފަހަރު ތަކަށްވުރެ ކުލަގަދަކޮށް ކަމަށެވެ. އެގޮތުން މިފަހަރުގެ ހަފްލާ ބާއްވާފައި ވާނީ " ޕްރޮމޯޓިންގް ޓޭސްޓްސް އެންޑް ކަލާސް އޮފް މޯލްޑިވްސް" މި ޝިޔާރުގެ ދަށުން ކަމަށެވެ. އަދި ހަފްލާ އިތުރަށް މުއްސަންދި ކުރުމަށް ޓަކައި ހަފްލާއަށް ވަޑައިގެންނެވި ބޭރުގެ ބޭފުޅުންނަށް ދައްކާލުމަށް ޓަކައި އެންޒީގެ ހެޔޮއެދުންތަކާ އެކު ބޮޑު ދެ ކަންނެލި ބޯލްރޫމް ތެރޭ ބެހެއްޓުމަށް ޓަކައި ރާއްޖެ އިން ގެންގޮސްފައިވާ ކަމަށެވެ. އަދި މި ހަފްލާއިން ތާޒާ ކަނޑުމަސް ފިހެވެން ހުރުމާއި ދިވެހި ކެއުން ހިމެނޭ ކޯނާއެއް ހުރުން ވެގެން ދިޔައީ ވަޑައިގެންނެވި ބޭފުޅުންގެ ތަރުހީބު ވަރަށް ބޮޑަށް ލިބިގެން ދިޔަ ކަމަކަށެވެ. ހަމަ އެއާ އެކު މޯލްޑިވްސް މާކެޓިންގް އެންޑް ޕަބްލިކް ރިލޭޝަންސްކޯޕަރޭޝަންގެ އެހީތެރިކަމާ އެކު ރާއްޖޭގެ ދެ ރިސޯޓެއްކަމުގައިވާ ފުރަވެލި އައިލެންޑް އެންޑް ސުޕާ އާއި ވެލިގަނޑު އައިލަންޑްސް ރިސޯޓު އެންޑް ސްޕާގެ ލިބިފައިވާ ދެ ހޮލިޑޭ ދެ ޕެކޭޖު ހަފްލާއަށް ވަޑައިގެންނެވި ބޭރުގެ ބޭފުޅުންގެ މެދުގައި ގުރެއް ނެގި ހޮވުނު ދެ ފަރާތަށް އިނާމް ރައްދުކުރެވިފައިވެ އެވެ. އަދި އެއާ އޭޝިޔާގެ ފަރާތުން ހަދިޔާ ކޮށްފައިވާ މެލޭޝިޔާ މާލެ ދެކޮޅު ތިން ޓިކެޓް ވަޑައިގެންނެވި ދިވެހިންގެ މެދުގައި ގުރުއަތުލުމެއް ބާއްވާ ހޮވުނު ތިން ފަރާތަށް ވަނީ ހަވާލުކޮށްފަ އެވެ.