27 Jul 2017, 22:52
ސޯޝަލް މީޑިއާގެ އެކި ވަސީލަތްތައް ބޭނުން ކޮށްގެން ވަކިވަކި ފުލުހުންގެ ފޮޓޯ ޖަހައި، ފުލުހުންގެ ނަމުގައި ހަގީގަތާ ހިލާފު ވާހަކަތައް ފަތުރާ ފަރާތްތައް ހޯދައި އެ ފަރާތްތަކާމެދު ގާނޫނީ ފިޔަވަޅު އަޅާނެ ކަމަށް ފުލުހުން ބުނެފިއެވެ.
ފުލުހުން މިރޭ ނެރުނު ބަޔާނެއްގައި ބުނެފައިވަނީ، ސޯޝަލް މީޑިއާ މެދުވެރިކޮށް ވަކިވަކި ފުލުހުންނަށް އިންޒާރުދީ، ފުލުހުންނާމެދު ރައްޔިތުންގެ ހިތްތަކުގައި ރުޅިވެރިކަމާއި ނަފްރަތު އުފައްދަމުން ގެންދާ ކަމަށެވެ.
އަދި ފުލުހުންނަށް އަނިޔާވެރިވުމަށް ހިތްވަރު ލިބޭ ގޮތަށް ކުރަމުންދާ މަސައްކަތްތައް ނުކުރުމަށާއި ފުލުހުންގެ މުއައްސަސާގެ ގަދަރާއި އިހްތިރާމް ގެއްލުވާލުމަށާއި އެފަދަ ކަންކަމަށް ހިތްވަރު ލިބޭ ގޮތަށް ކުރަމުންދާ ކަންކަން ހުއްޓާލުމަށް އަންގާފައިވެއެވެ.
"އެފަދަ އަމަލުތައް ހިންގާ ފަރާތްތައް ހޯދައި އެ ފަރާތްތަކާމެދު އަޅަންޖެހޭ ގާނޫނީ ފިޔަވަޅު އަޅާނެ ވާހަކަ ދަންނަވަމެވެ." ފުލުހުން ނެރުނު ބަޔާނުގައި ބުނެފައިވެއެވެ.
ފުލުހުންގެ ފޮޓޯ އާއްމުކުރާ ފަރާތްތަކާ މެދު ގާނޫނީ ފިޔަވަޅު އަޅާނެ ކަމަށް ބުނެ ވަރުގަދަ އިންޒާރެއް ދީފައިވާއިރު، އިދިކޮޅު ފަރާތްތަކުން ރޭ މާލޭގައި ކުރި މުޒާހަރާ ކަވަރު ކުރުމުގައި އުޅެނިކޮށް، ނޫސްވެރިންތަކެއް ހައްޔަރުކޮށް އެމީހުންނަށް އަނިޔާކުރި ކަމަށް ބުނާ ފުލުހުންގެ ފޮޓޯ އާއި ވީޑިއޯ ސޯޝަލް މީޑިއާގައި ދަނީ ފަތުރަމުންނެވެ.
ސޯޝަލް މީޑީއާގައި އާންމުވެފައިވާ ވީޑިއޯއަކުން ފެންނަ ގޮތުގައި ނޫސްވެރިއަކު ހައްޔަރުކޮށް ވެހިކަލަށް އެރުވުމަށްފަހު، ފުލުހަކު އެ ނޫސްވެރިޔާގެ ގައިގައި ކޮޅުފައިން ޖަހާތަން ފެނެ އެވެ.
ނަމަވެސް މިހާތަނަކަށް ފުލުހުން އެ މައްސަލަ ތަހުގީގު ކުރާކަމެއް ހާމަކޮށްފައެއް ނުވެ އެވެ. ފުލުހުން ބުނެފައި ވަނީ ފުލުހުންނާ ގުޅޭ ޝަކުވާއެއްވާނަމަ ކަމާބެހޭ ފަރާތްތަކަށް ހުށަހެޅުމަށެވެ.