24 Jul 2017, 13:47
ކަނޑުގެ އަޑިން ގޭސް ހޯދުމަށް ޑްރިލް ކުރުމުގެ މަޝްރޫއެއް ވިއެޓްނާމުން ހުއްޓާލައިފިއެވެ.
ޗައިނާގެ ދެކުނުގެ ކަނޑުގެ ސަރަހައްދުގައި ހިންގަމުންދިޔަ މިމަޝްރޫއު ވިއެޓްނާމުން ހުއްޓާލާފައިމިވަނީ ޗައިނާއިން އެގައުމަށް އިންޒާރުތަކެއް ދިނުމުގެ ސަބަބުންނެވެ.
ދެކުނު އިރުމަތީ އޭޝިއާ ސަރަހައްދުގައި ތެލުގެ ވިޔަފާރީގެ އިންޑަސްޓްރީގައި މަސައްކަތްކުރާ ފަރާތަކުން ބީބީސީއަށް މައުލޫމާތުދޭ ގޮތުގައި ވިއެޓްނާމުން ހިންގަމުންދިޔަ ޑްރިލް ކުރުމުގެ މަޝްރޫއު ކުރިޔަށްދިޔައީ އެގައުމުގެ ފޮރިން އިންވެސްޓްމެންޓެއް ކަމުގައިވާ ރެޕްސޯލް ކުންފުނިން ޚަރަދުކޮށްގެންނެވެ.
މިސަރަހައްދުގައި ހަރަކާތްތެރިވަމުންދިޔަ މިކުންފުނީގެ މީހުންވަނީ އެތަނުން ދާން ފަށާފައެވެ.
ވިއެޓްނާމުގެ ޑިޕްލޮމެޓެއް ހަބަރުދޭގޮތުގައި ޗައިނާ ދެކުނު ކަނޑުގެ ސަރަހައްދުން ގޭސް ފެނުނު ކަން މީގެ ދުވަސްކޮޅެއްކުރިން ވަނީ ކަށަވަރު ކުރެވިފައެވެ.
ޗައިނާއިންވަނީ ވިއެޓްނާމުން ޑްރިލް ކުރުމުގެ މަސައްކަތް ނުހުއްޓައިފި ނަމަ އެގައުމުގެ ސްޕްރެޓްލީ އައިލެންޑްސްއަށް ހަމަލާ ދޭނެކަމަށް އިންޒާރު ދީފައެވެ.