15 Jul 2017, 21:48
ދިވެހި ރައްޔިތުންގެ މެދުގައި ދީނީ ހޭލުންތެރިކަން އިތުރުކޮށް އިސްލާމްދީނުގައި ސިއްހަތަށް ދީފައިވާ މުހިއްމު ކަމާބެހޭގޮތުން ހޭލުންތެރިކުރުވުމަށް އުރުދުންގެ ދަ ފެޑެރޭޝަން އޮފް އިސްލާމިކް މެޑިކަލް އެސޯސިއޭޝަން (ފީމާ)ގެ ވަފުދެއް ރާއްޖެ ވަޑައިގެންފިއެވެ.
މިއީ ރާއްޖޭއިން ބޭރުގެ ފަންނީ މާހިރުން މެދުވެރިކޮށް މުޖުތަމައުގެ ތަފާތު ދާއިރާތަކުގައި ހަރަކާތްތެރިވާ ފަރާތްތަކަށް އަމާޒު ކޮށްގެން މައުލޫމާތު ފޯރުކޮށްދިނުމުގެ ޕްރޮގްރާމްތައް ހިންގުމަށް އިސްލާމިކް މިނިސްޓްރީގެ ދައުވަތަކަށް ފީމާގެ ވަފުދެއް ރާއްޖެ ވަޑައިގަތް ދެވަނަ ފަހަރެވެ.
އިއްޔެ ރާއްޖެ ވަޑައިގަތް ފީމާގެ ވަފުދުގައި އިސްކޮށް ހުންނެވީ ފީމާގެ ޔޫތް ޕްރޮޓެކްޝަން ޕްރޮޖެކްޓުގެ އެގްޒެކެޓިވް ޑައިރެކްޓަރު ޑރ. އަަބްދުލް ހަަމީދު އަބްދުލް ﷲ ސައީީދު އަލްގުޟާ އެވެ. އޭނާއާއެކު އިތުރު ދެ ބޭފުޅުން މިއަހަރުގެ ދަތުރުގައި ބައިވެރިވެވަޑައިގަންނަވައެވެ.
އިސްލާމިކް މިނިސްޓްރީން ބުނީ، ފީމާގެ ވަފްދުން ރާއްޖެއަށް ކުރައްވާ ދަތުރުފުޅުގައި އިމާމުންނާއި ހަތީބުންނަށް މައުލޫމާތު ދިނުމަށް މިއަދު ވޯކްޝޮޕެއް ބާއްވާފައިވާ ކަމަށެވެ.
އަދި އިލްމުވެރިންނާއި އަރަބި ބަސް ދަންނަ މުދައްރިސުންނަށް އަމާޒު ކޮށްގެން މާދަމާ ވޯކްޝޮޕެއް ބާއްވާއިރު، އަންނަ އާދީއްތަ ދުވަހު ފެކަލްޓީ އޮފް ހެލްތު ސައިންސްގެ ދަރިވަރުންނަށް ވޯކްޝޮޕެއް ބާއްވަވާނެ ކަމަށެވެ.
އޭގެ އިތުރުން ހެލްތު މިނިސްޓަރާއި ގައުމީ ޔުނިވާސިޓީގެ ޗާންސެލަރު އަދި ފެކަލްޓީ އޮފް ހެލްތު ސައިންސްގެ ޑީންއާ ވެސް ބައްދަލުކުރެއްވުމަށް ވަނީ ހަމަޖެހިފައެވެ.
ފީމާގެ ބޭފުޅުން ރާއްޖެއަށް ކުރައްވާ ދަތުރުފުޅު ނިންމަވާލެއްވުމަށްފަހު އެނބުރި ގައުމަށް ވަޑައިގަންނަވާނީ އަންނަ އަންގާރަ ދުވަހުއެވެ.
ފީމާ އަކީ ދުނިޔޭގެ އެކިކަންކޮޅުގައި މަސައްކަތް ކުރަމުންދާ ސިއްހީ ފަރުވާދޭ މުސްލިމުންނަށް މެޑިކަލް އެޑިއުކޭޝަން އަދި އެތިކްސްގެ ބިންގަލެއް ގާއިމްކޮށްދީ ދަރިވަރުންގެ ކޭމްޕުތަކާއި އިންސާނިއްޔަތުކަމަށާއި ސިއްހީ އެހީތެރިކަން ފޯރުކޮށްދެމުންދާ ޖަމިއްޔާއެކެވެ.
އެ ޖަމިއްޔާގެ ދަށުން ދުނިޔޭގެ އެކިކަންކޮޅުތަކުގައި 50،000 އަށްވުރެ ގިނަ މުސްލިމް މެޑިކަލް އަދި ސިއްހީ ތަރުޖިބާ ކާރުން މަސައްކަތްކުރެއެވެ.