13 Jul 2017, 19:41
ޅ. ނައިފަރު ޕޮލިސް ސްޓޭޝަނުން އިންތިޒާމް ކޮށްގެން އެ ރަށުގެ 35 އަހަރުން މަތީގެ ބޭފުޅުންނަށް އަމާޒުކޮށްގެން ފުޓްސަލް މުބާރާތެއްް ކުރިއަށްގެންދަން ހަމަޖެހިއްޖެއެވެ.
ނައިފަރު ޖުވެނައިލް ވެޓަރަންސް ފުޓްސަލް 2017ގެ ނަމުގައި ބޭއްވުމަށް ހަމަޖެހިފައިވާ އެ މުބާރާތުގައި ހަތަރު ޓީމެއް ވަނީ ބައިވެރިވެފައެވެ. މުބާރާތުގެ ޓައިޓަލް ސްޕޮންސާއަކީ އެ ރަށުގެ އެންމެ ދުވަސްވީ އެއް ޖަމުއްޔާ އަދި އެންމެ ހަރަކާތްތެރި ޖަމުއްޔާކަމަށްވާ ޖުވެނަލް ޖަމުއްޔާއެވެ.
އެ މުބާރާތާއި ގުޅޭ ގޮތުން މުބާރަތް އިންތިޒާމް ކުރާ ފަރާތުން ވިދާޅުވީ މުބާރަތް 35 އަހަރުން މަތީގެ ބޭފުޅުންނަށް އަމާޒުކޮށްގެން ކުރިއަށް ގެންދިޔުމުގެ ބޭނުމަކީ ކުށްމަދު ވެއްޓެއް ގާއިމުކޮށް ކުޅިވަރުގެ ތެރެއިން ރިވެތި އަހްލާގް ދަސްކޮށްދިނުމަށް ކަމަށެވެ.
ފުލުހުންނާއި ގުޅިގެން އެ މުބާރާތް ކުރިއަށް ގެންދަނީ ރައްޔިތުންނާއި ފުލުހުންނާއި ދެމެދު އޮތް ގުޅުން ރަނގަޅުކޮށް ފުޓްބޯޅައިން ކުރި އަރަމުން އަންނަ ނައިފަރު ޒުވާނުންނަށް އެެރަށުގެ ކުރީގެ ކުޅުންތެރިން ކުޅުނު އިރު ދެއްކި އަހްލާގައި ކުޅިވަރުގެ ރޫހް އަލުން ދައްކުވައިދީ އަރަމުން އަންނަ ޖީލަށް ނަމޫނާ ދެއްކުމަށް ކަމަށް ނައިފަރު ޕޮލިސް ސްޓޭޝަނުން މައުލޫމާތު ދެއެވެ.
ނައިފަރުގައި ފަށާ މުބާރަތް ފެށުމަށް ހަމަޖެހިފައިވަނީ މި މަހުގެ 16 ވަނަ ދުވަހުއެވެ. މުބާރާތް ކުރިއަށްދާނީ ނައިފަރު ފުޓްސަލް އެރީނާގައެވެ.